HAKING-HAKING 11 - KITTA KAREBA MADECENG

¹ Yéfta iyanaritu séddi tau prajuri iya baranié naporé. Monroi ri Giléad. Ambo'na riyasengngi Giléad iyakiya indo'na séddiwi cakkuribang.

² Iyaro ambo'na mappunnai towi ana'-ana' worowané laingngé iya polé ri bainéna iya essaé. Battowanana iyaro ana'-ana'é, ripaddésu'ni Yéfta ri mennang polé ri bolaé. Makkedai mennang lao ri aléna, “Iko dé' aga-aga mana mulolongeng matu polé ri ambo'ta, saba' ana' poléko ri makkunrai laingngé.”

³ Rimakkuwannanaro massaranni Yéfta polé ri silessu-silessurenna nainappa lao nanaonro ri daéra Tob. Kuwaniro masséddi sibawa sigarembolang tau maja nainappa lao mennang maddampo.

⁴ Siyagangngaré wettu ri munrinna riluruini tau Israélié ri tau Amongngé.

⁵ Wettunna kajajiyang gau'éro, sining tomariyolona Israélié ri Giléad laoni sibawa mérai Yéfta salaiwi daéra Tob.

⁶ Makkedai mennang, “Pimpikki méwai tau Amongngé.”

⁷ Iyakiya mappébaliwi Yéfta, “Tenniyaga iko benci senna'ka? Puraka mupaddésu polé ri bolana ambo'ku. Magi makkekkuwangngé wettummu ri laleng asukkarakengngé, laoko ri iyya?”

⁸ Nappébali mennang, “Poléki nasaba macinnaki kuwammengngi mupimpingngi sininna pabbanuwana Giléad untu' musui bangsa Amongngé makkekkuwangngétto.”

⁹ Nametté Yéfta, “Rékko muwéraka lisu ri Giléad untu' musui bangsa Amongngé, nanawérékki apakalang Puwangnge, iyya ritu mancaji panguwasa ri yasé'mu.”

¹⁰ Nappébali mennang, “Situjuki. Puwangnge ritu sabbinna.”

¹¹ Najoppana Yéfta silaong sining pamimpinna Giléad. Nainappa pabbanuwana Giléad makkai mancaji panguwasa sibawa pamimping. Na ri yolona Puwangnge ri Mizpa, napangoloni Yéfta sining tuntutanna lao ri pabbanuwana Giléad.

¹² Purairo suroni Yéfta tau lao ri arung Among untu' powadai makkuwaé, “Aga asalatta angkanna mumusui wanuwatta?”

¹³ Nabalini arunna bangsa Amongngé iyaro sining suroé, “Wettunna umma Israélié polé ri Maséré, nalai mennang tanata, mappammulai ri Salo Arnon lettu ri Salo Yabok sibawa Salo Yordan. Makkekkuwangngé palisuni iyaro secara damé.”

¹⁴ Nainappa surosi Yéfta tau lao ri arung Among

¹⁵ untu' baliwi makkuwaé, “Dé' sises-siseng umma Israélié narampasa'i tanana tau Moab-é iyaré'ga tanana tau Amongngé.

¹⁶ Wettunna nasalai tau Israélié Maséré, mattujui mennang ri Séppang Akaba lalo ri padang kessi'é nanalettu ri Kadés.

¹⁷ Nainappa suro tau lao ri arung Edom untu' méllau paramisi molai wanuwanna. Iyakiya dé' napalaloi mennang. Nainappa méllauwi mennang gau' padaé ri arung Moab, iyakiya dé'to napalaloi mennang molai daérana. Rimakkuwannanaro monroni tau Israélié ri Kadés.

¹⁸ Nainappa napatteru mennang joppana molai padang kessi'é, iyakiya dé' nalaloiwi daérana Edom sibawa Moab, sangadinna molai laleng mattulilié angkanna lettu ri seddé alauna Moab, ri liwenna Salo Arnon. Makkémani mennang kuwaro, iyakiya dé' nalléttoiwi iyaro saloé, nasaba iyaro daéraé muttama'i daérana Moab.

¹⁹ Purairo suroni umma Israélié tau lao ri Sihon, arunna Amorié ri Hésybon untu' méllau paramisi molai daérana Amori, nasaba maéloi lao ri daérana muto.

²⁰ Iyakiya Sihon dé' napalaloi mennang saba' dé' namateppe makkedaé maélomi bawang lalo. Mala napangarai sininna tentarana nainappa mébbu markas ri Yahas nanaluruiwi Israélié.

²¹ Iyakiya Puwangnge, Allataalana Israélié, mpéréngngi umma Israélié apakalang lao ri Sihon silaong tentarana. Nakkuwaniro umma Israélié lolongengngi sininna tanana tau Amorié iya monroé ri wanuwaéro.

²² Iyaro daérana Amorié natudangiwi mennang mappammulai polé ri Arnon ri seddé yattang, lettu ri seddé manoranna Salo Yabok, sibawa polé ri padang kessi'é ri seddé alau, lettu ri Salo Yordan ri seddé yajang.

²³ Jaji Puwangnge, Allataalana Israélié, iyanaritu paddésu'i sining tau Amorié untu' apentingenna umma'na Puwangnge.

²⁴ Na makkekkuwangngé maélokoga malai lisu? Tana iya nabbéréyangngé Kamos, déwatamuro, lao ri iko naweddingngi tette muwappunnangi. Iyakiya aga iya puraé nabbéréyang Puwangnge, Allataalata lao ri idi, maéloki mattahangengngi.

²⁵ Muwasengngi lebbi kessikko naiya Balak ana' Zipor, arung Moab? Dé' naengka naéwa Balak iyaré'ga mammusu sibawa idi.

²⁶ Tellu ratu taung ittana Israélié tudangiwi Hésybon sibawa Aroér nenniya désa-désaé ri seddéna, sibawa sininna kota-kotaé ri wirinna Salo Arnon. Namagi ri wettuéro dé' muwalai lisu?

²⁷ Dé', dé' tapasala lao ri iko. Iko ritu pasala nasaba muluruiki. Puwangnge ritu haking iya essoéwé pettuiwi parakaraéwé ri yelle'na bangsa Israélié sibawa bangsa Amongngé.”

²⁸ Iyakiya arung Among dé' nabati-batiwi iyaro pasenna Yéfta.

²⁹ Narikuwasaina Yéfta ri Rohna Puwangnge. Nalaona Yéfta célléngiwi daéra Giléad sibawa Manasyé nainappa lisu ri Mizpa ri Giléad. Polé kuwaro napatteruni joppana ri daérana bangsa Amongngé.

³⁰ Najjanciyanni Yéfta iyaé lao ri Puwangnge, “Rékko napalaloka Puwangnge caui tau Amongngé,

³¹ enrengngé lisu sibawa salama, nigi-nigi bunge massu polé ri bolaku untu' duppaika, maéloka makkasuwiyangengngi selaku akkarobangeng ritunu lao ri Puwangnge.”

³² Nainappa nalléttoi Yéfta Salo Yordan untu' musui tau Amongngé, na Puwangnge mpéréngngi apakalang aléna.

³³ Nagasani Yéfta mennang matteru polé ri Aroér lettu ri daéra seddéna Minit – iya manenna duwappulo kota – sibawa lettu sibbéla Abél-Keramim. Maéga senna tau Amon iya maté, angkanna cauni mennang polé ri tau Israélié.

Ana' makkunrainna Yéfta

³⁴ Wettunna lisu Yéfta polé ri Mizpa, poléni ana' makkunrainna duppaiwi sibawa séré-séré nanatetté towi rabanaé. Iyanaro ana'na séddi-séddié.

³⁵ Naitana muwa Yéfta, messé senna'ni Yéfta angkanna nasapé-sapé pakéyanna, nakkedato, “Aduh ana'ku, ancuru'ni atikku! Magi na iko harusu paesséiwi atikku? Puraka mattanro lao ri Puwangnge, nadé'na nawedding ugetteng lisu paimeng!”

³⁶ Nanakkeda iyaro ana'daraé lao ri Yéfta, “Purai Ambo' mattanro lao ri Puwangnge, na Puwangnge pura palaloi Ambo' wale'i jana sining tau Amongngé, balinna Ambo'ro. Jaji aga iya puraé najjanciyang Ambo', sitinajai napajoppa ambo'.”

³⁷ “Banna”, adanna iyaro ana'daraé matteru, “Uwéllauwi séddi passaleng: Wérékka wettu duwampuleng untu' joppa-joppa ri bulué silaong sellao-sellaoku. Kuwaniro maéloka teringiwi totoku, saba' maéloka maté ri wettu parawakku mupa.”

³⁸ Ripalaloni ri ambo'na, nainappa naleppessang lao. Iyaro ana'daraé laoni silaong sellao-sellaona ri bulué untu' messé babuwa kuwaro, nasaba maéloi maté sangadi dé'napa nakawing sibawa mappunnai ana'.

³⁹ Labe'nana duwampuleng, lisuni ri ambo'na, nainappa ambo'na pogau'i aga iya puraé najjanciyang lao ri Puwangnge. Namaténa iyaro ana'daraé ri wettu parawanna mupa. Iyanaro assalenna magi na ri yelle'na tau Israélié, biyasanna

⁴⁰ laowi ana'-ana'daraé patangngesso tungke taung untu' messé babuwa méngngerangngi ana'na Yéfta ri Giléad.