HAKING-HAKING 1 - KITTA KAREBA MADECENG

Natikkenna suku Yéhuda sibawa suku Siméon Adoni-Bézék

¹ Maténana Yosua, makkutanani umma Israélié lao ri Puwangnge, “Puwang, suku kégaénna polé ri idi harusu bunge-bunge lao gasai tau Kanaangngé?”

² Nappébali Puwangnge, “Suku Yéhuda. Purani Uwéréng mennang akuwasang untu' sittaiwi wanuwaéro.”

³ Nanakkeda suku Yéhuda lao ri suku Siméon, “Bantuki musui tau Kanaangngé sibawa sittaiwi daéra iya napattentué Puwangnge untu' idi. Ribantu topo matu sittaiwi daéra iya napattentué Puwangnge untu' iko.” Na suku Siméon

⁴ sibawa Yéhuda laoni mammusu massibawa. Na Puwangnge mpéréngngi mennang apakalang lao ri tau Kanaangngé sibawa tau Féris-é. Seppulo sebbu tentarana balié maté ri Bézék.

⁵ Naruntu'ni mennang Adoni-Bézék, arunna wanuwaéro, nanagasai.

⁶ Larini, iyakiya mallellungngi mennang sibawa tikkengngi nainappa narette indo' jari limanna sibawa jari ijéna.

⁷ Adanna Adoni-Bézék, “Riyolo pituppulo arung pura urette indo' jari limanna sibawa ajéna, nainappa uleppessang manré sésa-sésa inanré iya sempé'é polé ri méjakku. Makkekkuwangngé Allataala gaukekka pada-pada pura ugaukengngéngngi mennang.” Naritiwina Adoni-Bézék, ritiwi ri Yérusalém, nakkuwaniro maté.

Nacauna suku Yéhuda Yérusalém sibawa Hébron

⁸ Naluruini tau Yéhudaé Yérusalém, nanasittai sibawa natunui iyaro kotaé nenniya naunoi pabbanuwana.

⁹ Purairo laosi mennang gasai tau Kanaan iya monroé ri daéra bulué, sibawa ri émpeng-ngémpeng bulu-bulué; makkuwatoro iya monroé ri daéra marakkoé ri seddé yattang,

¹⁰ sibawa ri kota Hébron, iyanaritu kota iya riyasengngé riyolo Kiryat-Arba. Kuwaniro tau Yéhudaé caui appanna Sésai, Ahiman sibawa Talmai.

Nacauna Otniél kota Débir

¹¹ Polé ri Hébron, laoni tau Yéhudaé gasai kota Débir, iya wettuéro riyasengngi Kiryat-Séfer.

¹² Sala séddinna polé ri suku Yéhudaro, iya riyasengngé Kaléb, makkeda, “Nigi-nigi mulléi sittaiwi Kiryat-Séfer, weddingngi kawing sibawa ana' makkunraikku Akhsa.”

¹³ Otniél, ana'na anrinna Kaléb iya riyasengngé Kénas, sittaiwi kotaéro. Nanabbéréyanni Kaléb Akhsa ana'na, mancaji bainéna Otniél.

¹⁴ Ri esso akawingenna mennang, Otniél dessa'i Akhsa kuwammengngi méllauwi sikonrong tana polé ri ambo'na. Nananonnona Akhsa polé ri kaleddé'na, namakkutana Kaléb ri aléna aga nacinnai.

¹⁵ Nappébali Akhsa, “Macinnaka siyagangngaré mata uwai, saba' tana iya nawéréngngékka ambo'ro engkai ri tana iya marakkoé.” Nanariwérénna ri Kaléb mata uwai ri bagiyang yulunna sibawa mata uwai ri bagiyang toddanna.

Apakalang-apakalanna suku Yéhuda sibawa suku Bényamin

¹⁶ Wija-wijanna matuwanna Musa, iyanaritu sining tau Kénié, maccowériwi tau Yéhudaé massu polé ri Yérikho, kota karomaé, nalao ri daéra iya makarossaé ri seddé yattanna Arad ri Yéhuda. Kuwaniro mennang mattette ri tengnga-tengngana bangsa Amalé'.

¹⁷ Nainappa silaong suku Siméon, iyaro suku Yéhuda laowi gasai sibawa caui tau Kanaangngé iya monroé ri kota Zéfat. Nanatanroiwi mennang kotaéro, nainappa nancuru nanasengngi Horma.

^18-19 Puwangnge tulungngi tau Yéhudaé angkanna naulléi mennang sittaiwi daéra bulué. Iyakiya dé' naulléi mennang sittaiwi Gaza, Askélon iyaré'ga Ekron silaong daéra-daéraé ri seddéna, nasaba bangsa-bangsa iya monroé ri sillampé wiring tasi'é mappunnaiwi karéta-karéta musu polé ri bessié; rimakkuwannanaro dé' naulléi tau Yéhudaé paddésu'i mennang.

²⁰ Pada-pada iya puraé napparéntang Musa, riyabbéréyangngi Hébron lao ri Kaléb, saba' tellu golongang appang wijanna Enak pura napaddésu Kaléb polé ri kotaéro.

²¹ Suku Bényamin dé' naulléi paddésu'i tau Yébus-é massu polé ri kota Yérusalém. Iyanaro saba'na naonro mupa tau Yébus-é kuwaro silaong tau Bényamingngé.

Nacauna suku-suku wija-wijanna Yusuf Bétel

^22-23 Suku-suku Efraim sibawa Manasyé wijanna Yusuf, laowi gasai kota Bétel, iya riyasengngé Lus wettuéro. Na Puwangnge tulungngi mennang. Wettunna mata-mataé risuro mattuju lao ri kotaéro,

²⁴ siruntu'i mennang séddi tau worowané iya polé ri kotaé. Adanna mennang lao ri aléna, “Rékko maéloko tulukki kuwammengngi nariyullé muttama ri laleng kotaéwé, maéloki gaukekko sibawa makessing.”

²⁵ Na iyaro tauwé najellokenni mennang laleng muttama'é ri kotaéro. Nainappa sining tau Efraingngé sibawa Manasyé muttamakiwi kotaéro enrengngé mpunoi sininna pabbanuwana, sangadinna tauwéro sibawa sumpulolona.

²⁶ Nainappa létté ri wanuwanna tau Hét-é, nanapatettong séddi kota kuwaro sibawa masengngi Lus. Iyaro kotaé tette mupi riyaseng makkuwaro.

Bangsa-bangsa iya dé'é naripaddésu ri tau Israélié

²⁷ Suku Manasyé dé' napaddésu'i pabbanuwana kota Bét-Séan, Taanakh, Dor, Yibléam sibawa Mégido silaong sining kampongngé ri seddéna. Jaji tau Kanaangngé tette'i monro kuwaro.

²⁸ Mémeng tattambanana awatangenna tau Israélié, napassai mennang tau Kanaangngé mappallaungengngi mennang, iyakiya dé'to mennang napaddésu sisengngi sining tau Kanaangngéro polé kuwaro.

²⁹ Ri kota Gézer, suku Efraim dé' napaddésu'i tau Kanaangngé, pabbanuwana kotaéro. Jaji, tette'i tau Kanaangngé monro kuwaro silaong mennang.

³⁰ Pabbanuwana kota Kitron sibawa Nahalol dé'to napaddésu'i suku Zébulon. Iyanaro saba'na bangsa Kanaangngé tette mupi monro kuwaro silaong mennang, iyakiya iyaro sining tau Kanaangngé ripassai majjama untu' mennang.

³¹ Pabbanuwana kota Ako, Sidon, Ahlab, Akhzib, Hélba, Afék sibawa Réhob dé'to naripaddésu ri suku Asyer.

³² Iyanaro saba'na tau Kanaangngé, pabbanuwa tulénna wanuwaéro monro mupi kuwaro silaong tau Asyer-é.

³³ Pabbanuwana kota Bét-Sémes sibawa Bét-Anat dé'to napaddésu'i suku Naftali. Iyanaro saba'na tau Kanaangngé, pabbanuwa tulénna wanuwaéro monro mupi kuwaro silaong tau Naftalié. Iyakiya, ripassai mennang mappallaungengngi tau Naftalié.

^34-35 Bangsa Amorié tette mupi monro ri Ayalon, Saalbim sibawa Bulu Héres, saba' suku Dan ridessa'i ri mennang lao ri daéra bulué, sibawa dé' naripalalo nonno ri daéra tanété mariyawaé. Iyakiya iyaro bangsa Amorié tuli ritenre'i ri suku Efraim sibawa Manasyé enrengngé ripassai mappallaung untu' iya duwa sukuéro.

³⁶ Ri seddé manoranna Séla, pakkasésénna daérana sining tau Amorié naliwengngi Tuppung Akrabim.