HAGAI 2 - KITTA KAREBA MADECENG

Agellorenna Bolana Puwangnge iya mabarué

¹ Ri tanggala duwappulona séddi, uleng pitu ri laleng taungngéttoro, mabbicarasi Puwangnge naolai Nabi Hagai.

² Puwangnge suroi Hagai mabbicara lao ri Gubernur Zérubabél, Imang Lompo Yosua, enrengngé ra'ya'é untu' palettu'i pasengngéwé,

³ “Engkaga ri yelle'mu iya méngngerangngé mupi pékkugi gellona Bola-Kué riyolo? Makkekkuwangngé pékkugi keadaanna, manuru pallolongemmu? Dé' sises-siseng namappésennang?

⁴ Iyakiya, aja' mupettu paddennuwang, éh iko maneng! Patterui iyaro jama-jamangngé, saba' tette'-Ka matu bantuko.

⁵ Wettummu massu polé ri Maséré, pura-Ka majjanci tuli maélo linrungiko matu. Na makkekkuwangngé Ulinrungi mupo. Jaji, dé' naparelluko manennenneng.

⁶ Ri laleng wettu iya macawé'é maélo-Ka pataggottangngi langié sibawa linoé, pottanangngé sibawa tasi'é.

⁷ Upawéwang manengngi matu sininna bangsaé sibawa ritiwii matu waramparanna lao Kumaiyé, angkanna pennoi matu Bola-Ku sibawa asugirenna mennang.

⁸ Sininna ulawengngé sibawa péra'é ri linoéwé iyanaritu appunnangek-Ku.

⁹ Bola-Ku iya mabarué lebbi magelloi matu naiya riyoloé, na-Uwabbéréyangngi matu kuwaé adaméngengngé sibawa adécéngengngé lao ri bangsa-Ku.” Puwang Iya Pommakuwasaé pura mabbicara.

Barundinna Nabi Hagai sibawa sining imangngé

¹⁰ Ri tanggala duwappulona eppa uleng aséra ri laleng taung maduwaé apparéntanna Arung Darius, mabbicarasi Puwang Iya Pommakuwasaé lao ri Nabi Hagai.

¹¹ Adan-Na, “Ellauwi apettunna sining imangngé passalenna persoalangngéwé:

¹² Akkalarapanna engka tau mala sikare' juku polé ri akkarobangeng iya riyakkasuwiyangengngé lao ri Puwangnge, nainappa natiwi lisu ri laleng leppinna jumbana, nainappa nasibawang jumbanaro nagéssai rotié iyaré'ga séuwaé nasu-nasu, iyaré'ga anggoro'é, iyaré'ga minnya zaitungngé, iyaré'ga inanré agi-agi, aga iya manennaro mancaji mapaccing towi?” Wettunna napangolo Hagai pakkutanaéro, mappébaliwi sining imangngé, “Dé'.”

¹³ Nainappa makkutanasi Hagai, “Akkalarapanna engka tau mancaji najisi' nasaba géssai uju, nainappa nagéssa sala séddinna polé ri inanréro, aga mancaji najisi' towi iyaro inanré?” Nappébali sining imangngé, “Iyyé, tentuni!”

¹⁴ Nainappa makkedasi Hagai, “Napowadai Puwangnge makkedaé iyaro peraturangngé takkenna towi untu' umma Israélié ri wanuwaéwé sibawa lao ri sininna séuwa-séuwaé iya napowassélé'é mennang. Jaji, aga nakkasuwiyangeng mennang ri mézbaéwé iyanaritu najisi'i.”

Puwangnge majjanciyangngi barakka'-Na

¹⁵ Makkedai Puwangnge, “Coba pénessaiwi aga puraé kajajiyang ri yolona essoéwé, iyanaritu dé'napa naripédécéngi Bola-Kué! Pékkugi keadaammu wettuéro?

¹⁶ Poléno mitai goppo gandongngé sibawa muwasengngi lolongekko matu 200 kilo gandong, iyakiya annessana banna engka 100 kilo. Laoko untu' séro' 100 bang anggoro polé ri darong anggoro'é, iyakiya iya engkaé banna 40 bang.

¹⁷ Purana panonno anging pella sibawa bosi batu untu' mancuru'i sininna wassélé dare'mu, iyakiya dé'topa mumaélo lisu ri Iyya.

¹⁸ Iyaé essoé, tanggala duwappulo eppa uleng aséra, purani ripasang pandaménna Bola-Ku! Pénessaiwi aga kajaiyang matu mappammulai essoéwé.

¹⁹ Namuni dé'na gaga gandong monro, sibawa pong anggoro, pong ara, pong dalima sibawa pong zaitungngé dé'pa nabbuwa, iyakiya mappammulai wettuéwé maélo-Ka barakkakiko!”

Jancinna Puwangnge lao ri Zérubabél

²⁰ Iyatoro essoé, iyanaritu tanggala duwapulo eppa uleng aséra, nabbéréyangngi Puwangnge pasen-Na iya maduwaé lao ri Hagai,

²¹ untu' ripalettu ri Gubernur Zérubabél. Adanna Puwangnge, “Dé'na namaitta Ugottangngi langié sibawa linoé,

²² akkarungeng-akkarungengngé Uruttungngi sibawa akuwasanna mennang Uwancuru'i. Karéta-karéta musué sibawa tonangiyéngngi Ubaliccuwai; sininna anyaranna matéi matu sibawa sining pakkinnyaranna sisulléi matu siyuno.

²³ Iyaro essoé iko Zérubabél, atak-Ku, Uwakka matu untu' mapparénta ri laleng asek-Ku. Nasaba iko ritu pura Upilé.” Puwang Iya Pommakuwasaé pura mabbicara.