AYUB 39 - KITTA KAREBA MADECENG

¹ Muwissegga uppanna bémbé bulué rijajiyang ri indo'na? Engkaga naengka mupénessaiwi jonga liyaé jajiyangngi ana'na?

² Muwissegga siyaga ittana mennang mattampu? Mulléga bilangngi wettu mémmana'na?

³ Muwissegga uppanna mennang mallekku, nainappa najajiyang ana'-ana'na?

⁴ Tattamba battowai ana'-ana'na sibawa mawatang ri padang kessi'é; laowi mennang sibawa dé'na nalisu ri indo'na.

⁵ Niga malleppessang kaleddé liya ri ale'é? Niga lukkai tuluna sibawa malleppessangngi mallampareng?

⁶ Uwabbéréyangngi lao ri aléna padang kessi'é selaku bolana sibawa sining padang pejjé untu' onrong naonroi.

⁷ Nabélaiwi kota-kotaé sibawa arowarenna, dé' gaga mulléi pakacuwai sibawa pakkarésoi.

⁸ Padang wellaé ri bulué onrong inanréna, nasappai tanet-taneng manyilaé kuwaro.

⁹ Maéloga makkarésongekko saping liyaé? Maéloga mabbenni ri laleng wakkému?

¹⁰ Mulléga siyoi sibawa passai maddakkalangekko? Mulléga suroi salagai dare'mu?

¹¹ Mulléga mattuwangngi awatangenna iya magala'é, sibawa mabbéréyangngi pallaummu iya matane'é?

¹² Muwatepperiga paddeppungekko éngngalammu, sibawa tiwii lao ri onrong addésekemmu?

¹³ Temmaka gattina kampa pannina manu'-manu' untaé! Iyakiya luttuna coko'é dé' naulléi pada-padangngi.

¹⁴ Manu'-manu' untaé mattelloi ri tanaé, nainappa nasalai; na kessi'é ritu pellaiwi matu tellona.

¹⁵ Dé' namaingekiwi makkedaé naullé nalléjja tauwé sibawa olokolo liyaé léjja'i.

¹⁶ Kédoi samanna ana'na tenniya appunnangenna; dé' napaduliwi rékko siya-siyai bawang usahana.

¹⁷ Iyya ritu mébbui madonggo sibawa matumpeng, dé' Uwéréngngi pangissengeng sibawa akkaleng.

¹⁸ Iyakiya rékko mappammulani lari kencang, nacau anyarangngé nenniya tonangiyéngngi.

¹⁹ Eh Ayub, ikoga mpéréngngi awatangeng anyarangngé sibawa bosang iya tappapi-papié ri cekkonna?

²⁰ Ikoga suroi luppe pada-pada incalé, iya péttauriyéngngi tauwé nasibawang angessu-essunna?

²¹ Nakaéi tanaé ri lompo'é sibawa marennu, mallurui ri ammusurengngé sibawa penno sumange.

²² Dé' naissengngi bettuwanna pellorengngé sibawa métaué; dé' gaga peddang iya mébbuéngngi soro.

²³ Senjata iya nasaléppangngé tonangiyéngngi maggaréncang sibawa millakkillang nakenna cahaya.

²⁴ Nasibawang sumange malluwa-luwa'é lariwi iyaro anyarangngé; rékko moniwi tarompé'é dé' naulléi tahangngi aléna.

²⁵ Mangessu-essui tungke' ripaoni tarompé'é naémmauwi bau ammusurengngé polé mabéla. Naéngkalingai gorana sining parawiraé wettunna mennang mabbéré tanra-tanrang.

²⁶ Mupagguruga luttu bokangngé rékko mattujui ri yattang sibawa panni mallebba?

²⁷ Paréntamuga naccowéri kuwajangngé ri wettu dé'napa naébbui saranna ri bulu iya matanré?

²⁸ Ri coppo'na bulu batué napatettongngi bolana; cappa'na batu-batu macéru'é mancaji bénténna.

²⁹ Polé kuwaro najagaiwi sininna sulapa'é mattiroi matanna sappa anré.

³⁰ Kégi engka maté, kuwanitu aléna, nanaénungngi ana'-ana'na iyaro darana anréna.