AYUB 36 - KITTA KAREBA MADECENG

^1-2 Engkalingani cinampe'pi, sibawa sabbara'no, engka mupa maélo upowada nasabbing Allataala.

³ Malowang pangissengekku; uwakkégunagngi matu iyaro untu' pabuttiwi makkedaé adélé'i Pappancajikku.

⁴ Dé'gaga ada-adakku iya palsué; tau iya mapanré tongengngé engkai ri yolomu.

⁵ Iyaro Allataala poréi! Napahangngi sininna séuwa-séuwaé. Dé' muwi séddi tau Naita matuna.

⁶ Tau madosaé dé' Naleppessangngi tuwo maitta, nawéréngngi adélékeng tau iya manrasa-rasaé.

⁷ Napénessaiwi sining tau malempué, Naébbui mennang makuwasa pada arung-ngarungngé, angkanna ripakalebbii mannennungeng.

⁸ Iyakiya rékko ribalenggui tauwé sibawa ranté bessi, manrasa-rasai nasaba pangkaukenna muto,

⁹ dosa sibawa atemponna mennang natimpa'i matu Allataala.

¹⁰ Nasuroi mennang méngkalingai papparéngngeran-Na sibawa salaiwi jana mennang.

¹¹ Rékko natuntu'i mennang lao ri Allataala sibawa massompa ri aléna, daméi atuwonna mennang sibawa madécéng lettu ri paccappureng atuwonna.

¹² Iyakiya rékko dé' naéngkalingai mennang, matéi matu mennang ri laleng adonggongngé.

¹³ Tau iya dé'é nakképuwang taroi cai; muwi rihukkung ri Puwangnge, dé' namaélo mennang méllau bantuwang.

¹⁴ Maté madodongngi mennang ri wettu malolona, nasaba pennoi atunang atuwonna.

¹⁵ Napaggurui Allataala tolinoé naolai anrasa-rasang, Napakéi asussangngé untu' pamaingekiwi.

¹⁶ Purano napaleppe Allataala polé ri asukkarakengngé, angkanna mulléi péneddingiwi atennangengngé, sibawa pennoi inanré méjang appatalammu.

¹⁷ Iyakiya makkekkuwangngé situru sibawa jamu, mutarimai pahukkumammu.

¹⁸ Jagako, aja' muribengnguwang ri dowi pasoso'é; aja' muripapusa nasaba asugirengngé.

¹⁹ Siya-siya bawang gorako méllau ribantu, paracuma sininna pakkullémmu sibawa awatangemmu.

²⁰ Aja' muuddaningiwi wenni mapettangngé, wettunna bangsa-bangsaé ancuru sibawa lennye.

²¹ Atutuno, aja' mugiling lao ri adorakangngé. Akkattana anrasa-rasammu kuwammengngi musalaiwi jaé.

²² Engngerangngi, iyaro Allataala battowa tongeng akuwasan-Na. Engkaga guru pada-pada héba'-Na?

²³ Nigana mulléi pattentungengngi laleng Aléna iyaré'ga barani tenre'i pogau'i asalang?

²⁴ Tuli ripojiwi nasaba winru-Na, sibawa sipato'ko pakarajai.

²⁵ Naita maneng tauwé pangkauken-Na; iyakiya dé' muwi séddi tau tonget-tongeng pahangngi.

²⁶ Malebbi tongeng Allataala, dé' nariyullé mpellungngiwi iyaré'ga bilangngi jumellana taun-Na.

²⁷ Allataala gettengngi uwai polé ri linoé mancaji ellung nainappa napinra mancaji tetti-tetti uwai bosi.

²⁸ Natiri'i uwai polé ri ellungngé; Nabbolorengngi ri yasé'na rupa tauwé.

²⁹ Dé' muwi séddi tau pahangngi kédona sining ellungngé enrengngé oni guttu ri langié onrong naonroiyé Allataala.

³⁰ Natajangiwi sininna langié sibawa billa, iyakiya borina tasi'é tette'i mapettang kape.

³¹ Iyanaro carana patuwoi bangsa-bangsaé sibawa mpéréngngi inanré iya mabbusassaé.

³² Natikkengngi billa'é sibawa liman-Na sibawa nasuroi sarampa'i nakkattaiyé.

³³ Oni guttué tanrangiwi makkedaé maéloi paappo anginrajaé, muwi olokolo'é naisseng towi dé'na namaitta nalettu anginrajaé.