AYUB 34 - KITTA KAREBA MADECENG

^1-2 Dé'ga mumacca sibawa engka akkaleng? Nah, éngkalingani sininna ada-adakkué.

³ Naisseng tauwé inanré malunra'é rékko nakanyaméi, sibawa ada-ada mapanré rékko naéngkalingai.

⁴ Iyaé persoalangngé harusu'i taparéssa nainappaki massibawa puraiwi.

⁵ Nakkeda Ayub, ‘Dé' gaga asalang ri aléku, iyakiya dé' namaélo Allataala mabbéré aga iya adélé'é lao ri iyya.

⁶ Naangga'ka mabbellé, nasaba powadai dé' umadosa. Maladde loku makkekkuwangngé, namuni dé' upasala.’

⁷ Engkaga naengka muwita tau pada-pada Ayub? Napakatunai Allataala makkolik-koling.

⁸ Napoji massilaong sibawa sining tau madorakaé enrengngé siwollompollong sibawa sining tau madorakaé.

⁹ Makkedai, siya-siya bawang rékko makkuragai pogau'i élona Allataala.

¹⁰ Eh sining tau iya makessingngé, éngkalingai! Masa Allataala Iya Pommakuwasaé pogau'i salaé?

¹¹ Nawale'i tolinoé situru pangkaukenna, nagaukengngi situru kédo-kédona.

¹² Allataala Iya Pommakuwasaé dé' napogau' ja; sininna tauwé Nawéréngngi adélékeng.

¹³ Polé rinigai Allataala tarimai akuwasan-Na? Niga mappaddettangengngi iyaé linoé lao ri Aléna?

¹⁴ Ebara'na Allataala reddu'i nyawana tolinoé, sibawa malai paimeng nappase atuwonna,

¹⁵ maté manengngi anu makkényawaé, sibawa mancaji awui tolinoé pada-pada pammulanna.

¹⁶ Nah, rékko mapanréko, pénessaini, pasanni daucculimmu sibawa éngkalingai.

¹⁷ Aga Allataala iya adélé'é sibawa poréro mupassalai? Aga muwasengngi Allataala nacéccéi adélé'é?

¹⁸ Nahukkungngi Allataala arungngé sibawa panguwasaé rékko majai mennang sibawa madorakai.

¹⁹ Dé' naccowé lao risining arungngé, iyaré'ga lebbirengngi tau sugié naiya tau kasiyasié. Nasaba iya manenna mennang iyanaritu winru-Na.

²⁰ Ri tengnga bennié, weddingngi mennang maté tennasenna-senna. Nahukkungngi Allataala panguwasaé nabinasa tona mennang; magampang Nauno tau poré.

²¹ Najagaiwi atuwonna tolinoé, Naitai sininna jongkana.

²² Dé'gaga apettangeng, muwi pékkugi kape'na, iya weddingngé subbui tau madosaé.

²³ Dé' naparellu Allataala pattentui wettunna, tolinoé polé untu' riadéléki ri Aléna.

²⁴ Tennasalidiki sibawa naparéssa napaléssoi panguwasaé sibawa makkai passulléna.

²⁵ Saba', Naissengngi aga iya Napogau'é; Nanagaléttéi sibawa Naancuru'i mennang ri wennié.

²⁶ Naleppa'i mennang nasaba dosana, ri yolona tau maégaé nahukkungngi mennang.

²⁷ Saba', dé' naturusiwi mennang élo-Na sibawa dé' najampangiwi sininna parénta-Na.

²⁸ Mennang nassabariwi namaddaréké tau kasiyasié naéngkalingai Allataala terinna mennang.

²⁹ Rékko napettuiwi Allataala untu' mammekko bawang, dé' muwi séddi tau barani matu cellai. Rékko nasubbui rupan-Na, dé' muwi séddi tau mulléi runtu'i.

³⁰ Nadé'na pakkullénna bangsa-bangsaé untu' lawa-lawaiwi patenre majaé makuwasa.

³¹ Ayub, muwakuiniga dosamu ri Allataala? puranoga majjanci dé' mumaélo madosana?

³² Puraniga muwéllau kuwammengngi Narijellorekko dosamu? Puranoga mattanro pappésauwi pangkaukemmuro?

³³ Masa natarimai matu Allataala aga iya muwacinnaiyé, dé'nana musitujuiwi pangkaukenna Allataala? Makkekkuwangngé, iko harusu pettuiwi, tenniya iyya. Powadani aga pallolongemmu!

³⁴ Pasti nasitujui matu sininna tau mapanré; tau mapanré iya méngkalingaékka makkedai matu

³⁵ makkedaé mabbicarai Ayub tennapahang, sibawa pangkaukenna dé' nappunnai bettuwang.

³⁶ Rékko ritangngai tonget-tongeng ada-adanna Ayub, manessai matu makkedaé bicaranna pada-padai tau majaé.

³⁷ Asalanna natambaiwi paimeng sibawa séuwa dosa; maronta'i lao ri Allataala, sibawa pakatu-Nai ri yolota.