AYUB 32 - KITTA KAREBA MADECENG

Ada-adanna Elihu

¹ Nasaba mateppe senna'i Ayub ri atongengenna aléna, na iya tellu sahaba'naro dé'na namaélona baliwi.

² Iyakiya kuwaro engka séddi tau riyaseng Elihu ana' Barakheel, séddiwi wijanna Bus polé ri appang Ram. Dé' naulléi tahangngi caina, nasaba napattongengngi Ayub aléna sibawa passalai Allataala.

³ Macai towi lao ri iya telluro sahaba'na Ayub nasaba dé' naulléi mennang bantai ada-adanna Ayub, namuni mennang napassalai.

⁴ Elihu tau iya kaminang maloloé ri yelle'na mennang, rimakkuwannanaro mattajengngi narapi pura maneng mabbicara.

⁵ Naitanana makkedaé iya tellu tauwéro dé' naulléi mappébali, macaini,

⁶ sibawa makkeda makkuwaé, “Malolo mupa, na iko macowano, rimakkuwannanaro métauka sibawa bataka pangoloi pallolongekku.

⁷ Pikkiri'ku, iko ritu harusu mabbicara, iya lebbi macowaé harusu mabbagéyangngi pangissengenna.

⁸ Iyakiya iya mabbéré pangissengeng lao ri tolinoé, banna Rohna Allataala Iya Pommakuwasaé.

⁹ Mancaji mapanréi tauwé, tenniya nasaba macowai; napahangngi tauwé tongengngé, tenniya nasaba malampéi umuru'na.

¹⁰ Rimakkuwannanaro, éngkalingaka; palaloka powadai pallolongekku.

¹¹ Sabbara'ka méngkalingai wettummu mabbicara, sibawa mattajeng wettummu sappa ada-ada iya mapanré.

¹² Upénessaiwi sibawa madécéd-décéng, uwéngkalingako lolongeng asukkarakeng. Asalangngé ri laleng ada-adanna Ayub dé' mulléi pabuttiwi.

¹³ Pékkugi wedding mupowada makkedaé muruntu'ni pangissengengngé? Nasaba tarapassako manyara. Iya weddingngé baliwi Ayub banna Allataala.

¹⁴ Lao ri iko ritu Ayub mabbicara, sibawa tenniya ri aléku, iyakiya dé' uwabbéré matu pappébali pada-pada iko.

¹⁵ Ayub, malippui mennang sibawa dé' naulléi mappébali; dé' gaga naullé mennang powada.

¹⁶ Tettong bawammi mennang, dé'na naulléi mabbicarana. Harusu'ka'ga mattajeng namuni mammekkoi mennang?

¹⁷ Dé', makkekkuwangngé maéloka mpéréngngi pappébali; upalettu'i matu pallolongekku.

¹⁸ Dé'na usabbara mattajeng. Dé'na uwulléni tahangngi ada-adakku.

¹⁹ Rékko mammekkoka bawang, mareppa'ka matu, pada-pada popangngé iya pennoé sibawa anggoro baru.

²⁰ Harusu'ka mabbicara, kuwammengngi natennang atikku; harusu'ka timpa'i témukku sibawa mabbéré pappébali.

²¹ Dé' umaélo méwaiwi muwi niga ri laleng assasangngéwé sibawa dé' muwi séddi tau upoji-poji matu.

²² Muwi cara maggantiyé dé'to uwissengngi, na ébara'na upogau'i iyaro, nahukkukka matu Allataala masitta.