AYUB 31 - KITTA KAREBA MADECENG

¹ Nasibawang tanro puraka majjanci ana'daraé dé' uwitai matu sibawa macinna.

² Aga napogau' Allataala lao ri idi? Pékkugi nawale pangkaukenna tolinoé?

³ Pasti napapoléi acilakangngé sibawa abalaé lao ri tau iya pogau'é ja!

⁴ Pasti naisseng Allataala sininna pangkaukekku; Naitai sininna jongkaku.

⁵ Mattanroka makkedaé dé'pa naengka umacéko-céko; dé' topa naengka ubelléi tauwé.

⁶ Leppessanni natimbakka Allataala ri yasé'na dacing iya tongengngé, nanaissengngi matu makkedaé dé' upasala.

⁷ Ebara'na puraka léssé polé ri laleng iya tongengngé, iyaré'ga tattaré'i atikku ri gau' iya macarépaé, rékko rirotakiwi limakku ri dosaé,

⁸ leppessanni tau laingngé manréi aga iya uwampoé, sibawa ancuru sininna wassélé tanaku.

⁹ Ebara'na engka naengka utattaré lao ri bainéna balibolaku, sibawa massubbu-subbuka, mitai ri munrinna tange'é,

¹⁰ leppessanni bainéku nannasungeng tau laingngé; leppessanni ri ranjanna worowané laingngé léwu.

¹¹ Rékko mémengngi upogau' dosa majaéro, sipato'ka tarima pahukkungeng.

¹² Iyaro dosaé mappaccappui pada-pada api ranakaé, sininna iya uwappunnaiyé cappui natunu.

¹³ Wettunna maddaréké atakku nasaba upasalai ha'na, uwéngkalingai sibawa ugaukengngi sibawa malempu ati.

¹⁴ Rékko dé', pékkugi harusu uwoloi Allataalaku? Aga pappébalikku wettunna polé madélékika?

¹⁵ Tenniyaga Allataala pancajika, pancaji towi iyaro ata-atakku?

¹⁶ Dé'pa naengka nadé' umaélo tulungngi tau kasiyasié, iyaré'ga leppessangngi sining jandaé tuwo pettu paddennuwang.

¹⁷ Dé'pa naengka uleppessangngi ana' béué alupureng, na iyya genne inanré.

¹⁸ Mappammulai baiccu'na upiyarai mennang; sillampé atuwokku upimpingngi mennang.

¹⁹ Rékko uwitai tau iya akurangengngé, kasiyasi senna untu' melli pakéyang,

²⁰ upellaiwi sibawa kaing wol polé ri bimbala'ku muto, nanapojika matu sibawa sissukku ati.

²¹ Akkalarapanna engka naengka utenre'i ana' béué, saba' mateppe'ka pakalai matu parakaraku,

²² leppessanni polo iya duwa taiyyaku angkanna massarang polé ri tubukku.

²³ Dé' umaélo pogau'i makkuwaéro, saba' pahukkungenna Allataala napakecciwi atikku.

²⁴ Dé' naengka uwattuwangngi waramparakku,

²⁵ iyaré'ga mattempowangngi asugirekku.

²⁶ Dé' naengka usompai mata esso iya mattappaé macakka iyaré'ga kéteng iya mattappaé magello.

²⁷ Dé' naengka utattaré ri aléna, iyaré'ga bauwi limakku untu' pakalebbii.

²⁸ Dosa makkuwaéro sipato'i lolongeng pahukkungeng maté; nasaba Allataala Iya Pommakuwasaé nassakkarenni.

²⁹ Dé'pa naengka umasennang nasaba manrasa-rasai balikku, iyaré'ga mariyo-riyo nasaba lolongengngi acilakang.

³⁰ Dé' uwassempajang untu' amaténna balikku; dé' naengka upogau' dosa makkuwaéro.

³¹ Naisseng sining tau iya majjamaé ri iyya, makkedaé dé' masala upanré ri bolaku.

³² Tattimpa'i bolaku lao ri tau iya laowé; dé' naengka uleppessangngi mabbenni ri lalengngé.

³³ Tau laingngé nasubbui dosana, iyakiya iyya dé' nengka upogau'i pada-padaé mennang.

³⁴ Pallolongenna tau maégaé dé' uwétauriwi, sibawa pappakatunana tauwé, dé' upaduliwi. Dé' naengka uwonro ri bolaé iyaré'ga mammekko bawang, banna nasaba métauka ripakatuna matu.

³⁵ Dé'ga gaga tau maélo méngkalingai ada-adakku? Mattanroka makkedaé tongeng manengngiro. Tennapodo Iya Pommakuwasaé balika. Ebara'na teppunna balié lao ri iyya riyoki manengngi angkanna uwita,

³⁶ mabangka'ka matu pasangngi ri salangkakku, sibawa selaku passigera upatoppo'i ri ulukku.

³⁷ Uwabbéréyangngi matu lao ri Allataala sininna iya uwébbué; uwoloiwi Aléna matu sibawa mabangka nenniya tarakka ulué.

³⁸ Ebara'na tana iya urakkalaé uwénnauwi, sibawa urampasa'i polé ri punnana tongengngé,

³⁹ ébara'na cappui wassélé'na uwanré, sibawa patani iya tanengngéngngi uleppessangngi alupureng,

⁴⁰ leppessanni tenniya cadduku sibawa gandong iya tuwoé ri dare'é, sangadinna alekale maddori sibawa ariya.” Sikumiro ada-adanna Ayub.