AYUB 24 - KITTA KAREBA MADECENG

¹ Magi Allataala dé' napattette'i esso angadélékengngé, kuwammengngi sining tau iya missengngéngngi lolongengngi adélékeng?

² Engka sining tau iya paésa'éngngi tanrang pakkaséséngngé, kuwammengngi namancaji malowang tanana. Ménnauwi mennang bimbala makkonrong, sibawa pariwakkéi ri wakké bimbala'na.

³ Kaleddé appunnangenna ana' béué, nalariyangngi mennang; sapinna séddié janda, nasittaiwi mennang selaku boro'.

⁴ Nalawa-lawaiwi mennang tau kasiyasié lolongengngi ha'na, natarapassa massubbu tau iya kasiyasié.

⁵ Jaji, iyaro kasiyasié pada-padai kaleddé liyaé iya sappaé inanré ri padang makkale-kale'é; banna ri onrong-ngonrongngéro bawang engka inanré untu' ana'-ana'na.

⁶ Tarapassai najama dare'na tau laingngé; buwa anggoro'na tau majaé harusu napaddeppungeng.

⁷ Dé' nappunnai parampa sibawa pakéyang pappella tubu ri wennié.

⁸ Marica'i nasaba bosi rajaé ri bulué, nainappa maddeppé ri bulu batué untu' mallinrung.

⁹ Tau majaé napowatai ana' dé'é nappunnai indo ambo, sibawa malai ana'lolona tau kasiyasié iya makkinrengngé ri aléna.

¹⁰ Laowi tau kasiyasié temmappakéyang; malupui ri wettu méngngalana gandong ri dare'é.

¹¹ Polé ri zaitungngé mébbui minnya sibawa polé ri buwa anggoro'é, énungeng, iyakiya aléna madekka senna'i.

¹² Ri kota-kotaé riyéngkalingai addarékénna tau madangngé, sining tau maloé mangobbii méllauwi rijampangi, iyakiya dé' naéngkalingai Allataala sempajanna mennang; dé' Namaélo bati-batiwi.

¹³ Engka sining tau iya sampéyangngéngngi tajangngé sibawa musui, dé' mennang naissengngi sibawa dé' naccowériwi lalenna.

¹⁴ Ri subué moto'i pabbunoé polé ri atinronna, nainappa massu mpunoi tau iya kasiyasié, na ri wettu dé'napa na élé, coco-coco'i pada-pada pangaé.

¹⁵ Paggau' malawengngé tajengngi apolénna denniyarié; napakéi passampo rupaé kuwammengngi dé' nariisseng ri tauwé.

¹⁶ Nabongkara'i pangaé bolaé ri wennié; ri essoé naniniriwi tajangngé sibawa massubbui.

¹⁷ Untu' aléna, mappakatau-tau senna éléé, iyakiya pettang iya maseroé mappésennang.”

Zofar

¹⁸ Namakkeda Zofar, “Malii tau majaé nasaba lémpe rajaé. tana appunnangenna ritanroiwi ri Allataala; masino-sinoni dare anggoro'na makkekkuwangngé; dé'na gaga iya majjamaé kuwaro.

¹⁹ Pada-pada saljué lennye nakenna timo sibawa mata esso, makkuwaniro tau madosaé riyemme ri laleng linona tau maté.

²⁰ Riyallupaiwi ri indo'na muto, sibawa sining latié manréi tubunna. Asenna dé'na narisénge'na matu; ripaccappui pada aju iya maléttungngé.

²¹ Iya manennaro kajajiyangngi nasaba natenre'i sining jandaé, sibawa mapéddarai lao ri indo' iya dé'é nappunnai ana' worowané.

²² Iyakiya Allataala, nasibawang akuwasan-Na, nalellungngi tau poré. Tinda'i Allataala, namaténa tau madorakaé.

²³ Allataala mpéréngngi atuwong manyamengngé, iyakiya jagaiwi dé' temmappettu.

²⁴ Banna cinampe tuwoi sibawa masennang, iyakiya ri munri laowi untu' mannennungeng. Makelle'i pada-pada wella iya dé'é nakkéguna; pada-pada ulé asé iya rirette'é polé ri batanna.

²⁵ Nigana mulléi massakkarengngi gau'éro, iyaré'ga méwai atongengenna ada-adakku?”