AYUB 20 - KITTA KAREBA MADECENG

Zofar

^1-2 Namappébali Zofar, “Eh Ayub, tassinggukka mutaro, macinnaka makkekkuwangngé mabbéréyangngi pappébalikku.

³ Iyaro ada-adammu mappakatuna tongeng, iyakiya uwisseng pékkugi baliwi.

⁴ Dé'ga muwissengngi makkedaé polé ri wettu riyolo, mappammulai ritarona tolino bunge'-bunge'é ri linoé,

⁵ arennunna tomajaé banna cinampe bawang, sibawa asennangenna tau madorakaé sikédé mata?

⁶ Namuni arajanna lettu'i ri bitaraé, angkanna ulunna nagéssai ellungngé,

⁷ iyakiya lennye'i matu mannennungeng, teddéngngi polé ri linoé sibawa cara iya matunaé. Sining tau iya puraé missengngi, makkutanai matu, ‘Eh, kégi laona?’

⁸ Teddéngngi matu pada-pada wajo-wajona nippié, lennye pada-pada pakkitangngé ri wennié.

⁹ Dé'na napaita ri mataé; dé'ni gagana ri onrong naonroiyé.

¹⁰ Iya naénnauwé riyolo polé ri tau iya dé'é nappunnai harusu'i nasulléi ana'-ana'na.

¹¹ Namuni maloloi sibawa poréi, iyakiya dé' namaittana namancaji awu bawang.

^12-13 Temmaka cenninna jaé ri lalang bawana! Rasana sayangngi untu' riyemme masitta; rimakkuwannanaro nataroi ri yawana lilana, kuwammengngi namaitta napéneddingi.

¹⁴ Iyakiya iyaro inanré tappinrai ri laleng babuwaé, mancajiwi racung mapai pattiwi amaténg.

¹⁵ Waramparang riyénnau iya naemme'é, tarapassai naluwa; napassui Allataala polé ri laleng paruna.

¹⁶ Tomajaé ménungngi matu racung pattiwi abalaé, nassabariwi matu maté pada-pada naokkoé ula mamoso.

¹⁷ Dé' napéneddingiwi matu minnya zaitun iya maonaé, iyaré'ga susu sibawa cani tattuppa-tuppa'é.

¹⁸ Sininna asaronna harusu'i napalisu; wassélé usahana dé' matu napéneddingiwi.

¹⁹ Saba' natenre'i sibawa dé' najampangiwi tau iya dé'é nappunnai; narampasa'i sining bola iya dé'é napatettongngi.

²⁰ Nasaba angowanna dé' naissengngi paggangkanna, nadé'na matu nacau.

²¹ Rékko manréi napaccappu maneng, rimakkuwannanaro adécéngenna dé' nattahang.

²² Wettunna maccoppo adécéngenna, anrasa-rasangngé sibawa saraé poléi geppai.

²³ Wettunna marépo lisekiwi babuwana, macai senna'i Allataala sibawa hukkungngi.

²⁴ Rékko lariwi massala polé ri peddang baja'é, riloi matu ri pana tembagaé.

²⁵ Nakennai pana, angkanna malo; cappa pana iya lala'é bettui tubunna, nanasalipurini tau atinna.

²⁶ Ancuru'ni sininna waramparang natarona; aléna silaong sininna kaluwargana nanréi api iya dé'é napalluwa'i tolinoé.

²⁷ Langié timpa'i jana; tokkongngi linoé méwai.

²⁸ Sininna asugirenna cappui matu, nasaba tuppa caina Allataala.

²⁹ Iyanaro totona tau iya madorakaé, toto iya napattentué Allataala untu' aléna.”