AYUB 19 - KITTA KAREBA MADECENG

Ayub

^1-2 Iyakiya mappébaliwi Ayub, “Magi mumatteru cellaka, sibawa sissaka sibawa ada-ada?

³ Makkolik-kolinni mupakatunaka, sibawa temmasirimu mupanrasa-rasaka.

⁴ Akkalarapanna salai pangkaukekku, iyaro dé' naparogiko.

⁵ Mupikkiri'i alému lebbi kessingngi naiya iyya; muwasengngi asussakku buttinna asalakku.

⁶ Issenni makkedaé mattengngakka nasissa Allataala, sibawa ritikkeng ri laleng jebba'-Na.

⁷ Maronta'ka nasaba Abeccokengngéro, iyakiya dé' muwi séddi tau jampangika. Goraka, “Kégani adélékengngé,” iyakiya dé' gaga iya méngkalingaka.

⁸ Natongkoi Allataala lalekku, dé' uwulléi labe, sining lorokku Naébbui mapettang kape.

⁹ Narampasa manengngi waramparakku, sibawa Nasolangiwi aseng makessikku.

¹⁰ Nagasaka polé tulili, pada-pada tau bébbuéngngi ure polé ri tanet-tanengngé, nainappa Naleppessang maddékéréké sibawa makelle, makkuwaniro Nasitta sininna paddennuwakku.

¹¹ Malluwa-luwa'i caina Allataala lao ri iyya; Naangga'ka selaku balin-Na.

¹² Maggasai pasukan-Na tenriyullé téppo'i; nalawai lalekku, sibawa nakeppungngi kémaku.

¹³ Napabélaiwi sumpuloloku polé ri iyya; mancajika tau laing lao ri sininna sissekku.

¹⁴ Napabélai maneng aléna sininna sellao-sellaoku; dé'na naéngngerakka sahaba-sahaba'ku.

¹⁵ Nallupaini ata makkunraikku niga iyya, puwanna mennang; naangga'ka tau iya dé'éppa naissengngi.

¹⁶ Uwobbii atakku, iyakiya dé' nappébali, namuni upalécéi sibawa malemma.

¹⁷ Maja péneddinna bainéku bauwi nappase'ku, dé' namaélo maddeppérika silessurekku.

¹⁸ Nacella-cellaka ana'-ana'é ri lalengngé; rékko tettokka, nacawa-cawaika.

¹⁹ Tasséleng sellao maréppé'ku mitaka; nasalaika mennang iya uwamaséiyé.

²⁰ Buku mani nadoko oli tubukku; céddé bawanna maté sibawa mallajang nyawaku.

²¹ Eh sellao-sellaoku, amaséika, saba' limanna Allataala munruka.

²² Matterui Allataala tenre'ka; magi muturui Aléna? Dé'paga mucau sissaka?

²³ Paccappurenna riokii ada-adakku, angkanna tuli riyéngngerangngi matu;

²⁴ memmuwaré nasibawang bessié riyapparengngi ri batué, kuwammengngi nattahang sillampé wettué.

²⁵ Uwisseng makkedaé ri surugaé engka Méwaika; angkanna poléi matu tulukka.

²⁶ Namuni oliku malo sibawa mallesse-lesse, iyakiya ri wettu mattubukku mupa, uwitai matu Allataala.

²⁷ Nasibawang matakku muto muwitai Aléna, sibawa untu' aléku mancajiwi sahaba. Ancuru atikku saba' makkedako,

²⁸ ‘Pékkugi caranaki teppui?’ Sappako alasang untu' mébbu parakara.

²⁹ Iyakiya, makkekkuwangngé étauno ri peddangngé! Saba' macayii Allataala sibawa hukkungngi tau madosaé; namuwissengngi, makkedaé engka Allataala iya mangadélékiyéngngi tolinoé.”