AYUB 15 - KITTA KAREBA MADECENG

ASSIPABBICARANG MADUWAE 15:1–21:34 Elifas

^1-3 Namappébali Elifas, “Omong kosong, Ayub, dé' tongeng bettuwanna bicarammu! Dé'gaga tau mapanré iya mappébaliyé pada-pada ikoé, dé' namaélo méwai aléna sibawa ada-ada iya dé'é gaga bettuwanna.

⁴ Akkalarapanna iyaro ada-adammu riturusiwi, dé' muwi séddi tau métau iyaré'ga massempajanna lao ri Allataala.

⁵ Ada-adammu pabuttiwi makkedaé pasalako, iyakiya mutongkoi jamu sibawa lécco-lécco ada.

⁶ Dé' naparellu uteppuko sibawa upassala, saba' polé ri ada-adammu muto nariyappissengekko.

⁷ Muwasengngi iko tolino mammulang iya rijajiyangngé? Engkakoga wettunna ripancaji sining bulué?

⁸ Muwéngkalingaga Allataala mébbui rancana-Na? Aga ikoga bawang mappunnai pangissengeng tolino?

⁹ Sininna iya muwissengngé, muwi idi riisseng towi; sininna iya mupahangngé, manessa towi ri idi.

¹⁰ Iyaé pangissengengngé ritarimai polé ri tau iya maubengngé; engka mémenni mennang ri wettu dé'napa narijajiyang ambo'mu!

¹¹ Magi mutarimai passaléwona Allataala? Mabbicaraki sibawa sabbara nenniya malemma ri laleng asen-Na.

¹² Iyakiya ménré'i pellamu, makkaca-kaca matammu;

¹³ macaiko lao ri Allataala sibawa bantai.

¹⁴ Naulléga tolinoé dé' sises-siseng napasala? Weddigga ripattongeng ri yolona Allataala?

¹⁵ Mala muwi lao ri malaéka'é dé'to natepperiwi Allataala; dé' mennang namapaccing ri pakkitan-Na.

¹⁶ Apalagi tolinoé iya majaé sibawa marota'é, iya memme'éngngi jaé pada-pada uwai bawang.

¹⁷ Engkalingai Ayub, upakatajangekko matu séuwa,

¹⁸ iya nappagguruwangngé tau mapanré lao ri iyya. Iyaro pappagguruwangngé natarimai polé ri toriyolona, nanapatterui sibawa sukku lao ri wija-wijanna.

¹⁹ Iyaro wettué dé' gaga tau laing ri wanuwanna mennang; dé' gaga papusai mennang polé ri Allataala.

²⁰ Tau maja iya tenre'éngngi pada-padanna, manennengngi matu sillampé atuwonna.

²¹ Oni-oni maseroé licco'i dauccilinna; ri wettu amangngé poléi parampo'é gasai.

²² Dé'gaga addénnuwangeng ri aléna léssériwi pettangngé, saba' peddanna paunoé lellungngi ri tungke' wettu.

²³ Manu'-manu' nasar-é tajengngi wettu amaténna, maéloi mennang memme'i ujuna. Namainge'na makkedaé massalawuni esso mangolona.

²⁴ Abalaé padai arung poré, sadiyani maélo tikkengngi.

²⁵ Makkuwaniro totona tau iya méwaéngngi Allataala, sibawa barani méwai Iya Pommakuwasaé.

^26-27 Nasibawang atempong nagasai sibawa naéwai Allataala; naakkai kaliyawona, pémmali cau.

²⁸ Mattette'i ri kota-kota iya tassiya-siyaé, risining bola iya dé'é gaga monroiwi. Iyaro kota-kotaé purani ripattentu untu' tette mancaji ruttungeng.

²⁹ Asugirenna iyaro tauwé teddéngngi matu temmabbaté; waramparanna cappu sisengngi matu.

³⁰ Dé' naleppe matu polé ri pettang kape'é; nangurengngi matu api cura'-cura'na. Ancuru'i matu nasaba warungeng bawana Allataala.

³¹ Rékko mateppe'i lao ri iya dé'é nakkéguna, ribengnguwanni matu; sibawa pamale iya natarimaé matu, dé' tona akkégunana.

³² Ri wettu dé'napa narapii wettunna, matéi matu, pada-pada takké makelle iya dé'énna naulléi manyilana.

³³ Pada-padai pong anggoro iya madduttungngénna buwana, pada-pada pong zaitung iya maddunué unganna.

³⁴ Tau majaé dé' matu nabbija; cappui nanré api bola iya ripatettongngé polé ri wassélé pasoso'na.

³⁵ Iyanaro mennang iya rancanaéngngi jaé sibawa pogau'i, tuli tattampu'i bellé ri laleng atinna.”