AYUB 14 - KITTA KAREBA MADECENG

¹ Sipongeng jajinna iyaro tolinoé malemmai, dé' pakkullénna; maponco atuwonna enrengngé pennoi anrasa-rasang.

² Mallengnge'i sibawa makelle pada-pada bungaé; lennye'i pada-pada wajo-wajoé, matteru teddéng.

³ Oh Allataala, masa maélo-Ko mitaka, sibawa pangoloka ri pengadilam-Mu!

⁴ Naulléga tolino iya madosaé mappapolé gau iya sukkué?

⁵ Pura Mupattentuni jumellana umuru'na tolinoé; jumella ulenna purani Mupastikang. Mupattette towi pakkaséséng atuwonna; dé' namakkullé najjalékkai.

⁶ Leppessangngi mappésau aja' muganggui; kuwammengngi naulléi péneddingiwi atuwonna narapi cappu tugasna.

⁷ Engka mupa addennuwang lao ri aju iya ritubbangngé; cura'i matu paimeng, nainappa mattakké.

⁸ Namuni matabu'ni ure'na ri laleng tanaé, sibawa maténi tona nasaba bonnyo'ni,

⁹ iyakiya rékko nagéssai uwai, tuwoi paimeng; pada-pada tanet-taneng maloloé, mompoi cura-cura'na paimeng.

¹⁰ Iyakiya rékko matéi tolinoé, cappui curitana; matéi, nainappa kégani lao?

¹¹ Pada-pada uwai mallajangngé polé ri laleng tapparengngé, pada-pada salo nonnoé uwaina gangka cappu,

¹² makkuwatoro tolinoé iya matéénna: dé' naulléi matu tokkong paimeng. Dé' matu napésedding ri wettu engkana mupa langié, dé'na naengkana naoto polé ri tinrona.

¹³ Subbuka ri laleng linona tau maté; linrungika narapi dé'na Mumacaina. Iyakiya pattentuni wettué untu' méngngerangngi aléku.

¹⁴ Saba', rékko matéi tolinoé, naulléga tuwo paimeng? Polé ri essoé lao ri essoé mattajekka narapi labe iyaé wettu apairekku.

¹⁵ Namuwobbika matu, nauwabbéréto matu pappébali; Mucarinnaika matu paimeng, mahlu' iya Mupancajiyé.

¹⁶ Nainappa Mujagaiwi matu tungke' jongkaku, iyakiya dé'na Mujampangiwi dosaku.

¹⁷ Muwaddampengengngi matu dosaku sibawa Mupassalai; asalakku wettu riyolo Muleddai.

¹⁸ Matti maruttungngi matu sining bulué sibawa tassiya-siya, sibawa bulu batu iya masse'é léssé polé ri onronna.

¹⁹ Risossoi matu sining batué ri uwai iya massolo'é maraja; riyalirengngi matu tanaé ri bosi rajaé. Makkuwaniro Muancuru amménasanna tolinoé.

²⁰ Mucaui untu' mannennungeng; Musuroi lao sibawa Mupinrai tappana.

²¹ Mancaji tau malebbii ana'-ana'na, iyakiya dé' naissengngi. Narékko mancaji matunai mennang, dé'gaga paissengiwi aléna.

²² Banna angéttukeng tubunna napéneddingi; banna sussa atinna iya nanrasa-rasaiyé.”