AYUB 13 - KITTA KAREBA MADECENG

¹ Iya manennaro pura uwita sibawa aléku méngkalingai, nenniya tonget-tongeng upahang.

² Aga muwisseng, uwisseng towi; aja' muwasengngi cauka polé ri iko.

³ Iyakiya maéloka mabbicara sibawa Iya Pommakuwasaé; macinnaka méwaiwi parakaraku ri yolona Allataala.

⁴ Saba' mutongkoi adonggommu sibawa bellé, dé' assilaingenna sibawa sanro-sanro bellé.

⁵ Akkalarapanna dé' mumabbicara, naullé riyangga'ko mapanré.

⁶ Naéngkalingani pabbantaku; pénessaini pangéwaingekku.

⁷ Weddigga nasaba Allataala, mumabbellé? Weddikkoga mabbellé untu' apentingen-Na?

⁸ Weddikkoga maccowé ri Allataala, sibawa méwaiwi selaku pangacara?

⁹ Rékko naparéssako Allataala, makessigga matu wassélé'na? Mulléga bengnguwangngi, pada-pada bengnguwangngi tolinoé?

¹⁰ Rékko maccowéko, namuni sibawa mammekko-mekko, nahukkukko matu Allataala sibawa mabecco.

¹¹ Dé'ga napatassélengngi nyawamu arajanna Allataala? Dé'ga nakeccingiwi atimmu aseronna?

¹² Sininna pangajamu padai awu iya dé'é nakkéguna; pangéwaimmu padai tana lita iya magampangngé mareppa.

¹³ Rimakkuwannanaro ammekkono, leppessakka mabbicara! Dé' upaduliwi muwi maga addimonrinna!

¹⁴ Sadiyaka mappésonang nyawa!

¹⁵ Baranika saba' pettu paddennuwanna! Rékko maéloi Allataala mpunoka, uwabbéréyang bawang, iyakiya uwéwaiwi matu kédo-kédoku ri yolo-Na.

¹⁶ Naullé nasaba abaraningekkuro usalama, saba' tau majaé dé' nabarani matu mangolo ri Allataala!

¹⁷ Makkekkuwangngé éngkalingai madécéd-décéng ada-adakku; pénessaiwi pappakatajakku.

¹⁸ Sadiyani upangolo parakaraku; mateppe'ka, dé' naweddikka ripassala!

¹⁹ Puwang, rékko polé-Ko sibawa teppuka, maéloka mammekko sibawa tajengngi ajjalekku.

²⁰ Iyakiya tarimai iya duwaé paréllaukku, kuwammengngi ubarani moloi-Ko paimeng:

²¹ appésauno sissaka, sibawa aja' Mugeppaka sibawa aserom-Mu!

²² Abbicarani, umappébali matu. Iyaré'ga leppessakka mabbicara, nainappa mubali!

²³ Siyaga égana asalang sibawa dosa iya upogau'é? Sininna pelanggarakku sitinajai Muteppu!

²⁴ Magi Muléssé sibawa massala polé ri aléku? Aga saba'na Muwangga'ka balim-Mu?

²⁵ Bannaka daud-daung iya madduttungngé nakenna anging lalo, masa Mupéttaurika! Bannaka daramé rakko sibawa makelle, pékkugi wedding Mulellukka!

²⁶ Mupattentungekka toto mapaié; Muwale'i asalakku ri wettu maloloku.

²⁷ Musiyoi ajéku sibawa ranté bessi; sininna kédo-kédoku Mujagaiwi. Mala palakajéku, dé' naleppe polé ri pakkitam-Mu.

²⁸ Namancaji marapona pada-pada aju bonnyo'é; pada-pada kaing nanré cecco mancajika matabu.