AYUB 11 - KITTA KAREBA MADECENG

Zofar

^1-2 Nainappa makkeda Zofar, “Dé'ga naribali iyaro omong kosongngé? Harusu'ga tau iya maéga bicaraéro ripattongeng?

³ Ayub, muwasengngi dé' nariyullé baliko? Muwasengngi mammekkoki nasaba pangéllé'mu?

⁴ Manuru pallolongemmu iyaro ada-adammu dé' nasala. Manuru pallolongemmu mapaccikko ri yolona Allataala.

⁵ Iyakiya tennapodo aléna Allataala mabbicara!

⁶ Sibawa tennapodo napaissengi-Ko, makkedaé iyaro pangissengengngé maéga sulapa'na, sibawa dé' naulléi pahangngi tolinoé. Namumainge makkedaé anrasa-rasammu dé' nasiyaga, ripasibanding sibawa pahukkungeng iya sitinajaé mutarima.

⁷ Masa mullé mpellungiwi esse'na Allataala? Masa mullé pahangngi akuwasan-Na?

⁸ Akuwasan-Na lebbi tanréi naiya bitaraé; dé' mulléi rapii sibawa malai. Akuwasan-Na lebbi maliyungngi naiya linona tau maté, dé' sises-siseng mulléi pahangngi.

⁹ Akuwasanna Allataala lebbi malowangngi naiya linoé, sibawa lebbi sakkai naiya tasi malowangngé.

¹⁰ Rékko Natikkekko sibawa natiwiko ri mahkama-Na, nanigana barani lawa-lawaiwi tindakan-Na?

¹¹ Naisseng Allataala tau pojiyéngngi mabbellé; jana mennang dé' naleppe polé ri matan-Na.

¹² Rékko indo kaleddé liyaé jajiyangngi kaleddé makacuwa, nappai tau madonggoé mancaji mapanré.

¹³ Ayub, pépaccingiwi atimmu, assessekaléno! Assempajanno lao ri Allataala!

¹⁴ Patteddénni dosaé polé ri atimmu sibawa pabélaiwi jaé polé ri bolamu!

¹⁵ Naweddikka moloiwi atuwongngé sibawa sabbara nenniya barani; masse'ko matu tettong sibawa dé' naparellu marasa mausé,

¹⁶ mala apeddiremmu dé'na musénge'i; padai lémpe nonnoé, nallupai tauwé.

¹⁷ Lebbi matajangngi matu atuwommu naiya essoé, sibawa wettu-wettu mapettangngé ri laleng atuwommu siccakka tappa éléé.

¹⁸ Masse'ko matu sibawa penno paddennuwang; nalinrungiko Allataala angkanna amakko.

¹⁹ Dé' mumétau matu lao ri balié; maéga tau méllau tulung matu ri iko.

²⁰ Iyakiya tau majaé makkitai matu sibawa malippu, saba' untu' mennang dé' gaga pattulung. Séddi-séddinna amménasanna mennang iyanaritu kuwammengngi naleppu masitta ajjalenna.”