AWATINGENG 3 - KITTA KAREBA MADECENG

Pahukkungeng, atobakeng, paddennuwang

¹ Iyya ritu tau iya puraé péneddingi anrasa-rasang, nasaba nakennaka caina Allataala.

² Pédé mabéla Nassarénréngekka ri laleng onrong iya mapettang kape'é.

³ Riyunruka makkolik-koling, temmamasé puppu esso.

⁴ Naébbui watakkaléku malo senna, sibawa polo buku-bukukku.

⁵ Nasalipurika sibawa sara nenniya anrasa-rasang.

⁶ Napassaka monro ri laleng pettangngé pada-pada tau iya maté ri wettu labe'é.

⁷ Nasibawang balenggu iya masse'é Nasiyoka, angkanna dé'gaga laleng massu ri aléku.

⁸ Kelli'ka méllau pattulung, iyakiya dé' namaélo Allataala maréngkalinga.

⁹ Nalawa-lawaiwi lalekku sibawa témbo'-témbo' batu.

¹⁰ Pada-padai beruwangngé mattajeng, pada-padai singaé mangadang.

¹¹ Nalellukka narapi lésséka polé ri lalengngé, nainappa nasapé-sapé'ka sibawa nasalai.

¹² Napaggettengngi uso pana-Na, sibawa pancajika attujuwanna ana' panana.

¹³ Nabettui tubukku ana' panana gangka natoddo lise lalekku.

¹⁴ Puppu esso nacawa-cawaika sininna tauwé, sibawa ripancaji assindirikeng.

¹⁵ Banna apaireng iya Nawéréngngékka untu' inanré sibawa énungekku.

¹⁶ Naggosokengngi rupakku ri tanaé, Naggappukengngi isikku ri batué angkanna mapolo.

¹⁷ Maittani dé' umarasa saléwangeng; uwallupaini pékkugiwi pappénedding asennangengngé.

¹⁸ Dé'na uwappunnai ataromporeng, lennye'ni paddennuwakku ri Puwangnge.

¹⁹ Pikkiri'i asollérekku sibawa acilakakku samanna manré racung iya mapaié.

²⁰ Matteru-terui upikkiri gau'éro, angkanna tattenre batékku.

²¹ Namuni makkuwaro tokkongngi paimeng paddennuwakku, wettunna uwéngngerang gau'éwé:

²² Pammaséna Puwangnge mannennungengngi, dé' naengka nacappu pammasé-Na,

²³ tuli barui tungke' esso tongeng, matinulu senna'i Puwangnge!

²⁴ Puwangnge iyanaritu waramparakku séddi-séddié. Rimakkuwannanaro, mamménasaka ri Aléna.

Paddennuwang untu' Israélié

²⁵ Makessingngi Puwangnge lao ri tau iya maddennuwangngé ri Aléna, sibawa lao ri tau iya sappaéngngi.

²⁶ Jaji, makessinni mattajekki sibawa tennang narapi polé Puwangnge mabbéré pattulung;

²⁷ makessinni magguruki mancaji sabbara ri wettu malolota mupa.

²⁸ Wettunna Puwangnge mabbéré anrasa-rasang, sitinajaki tudang alé-alé sibawa mammekko.

²⁹ Leppessakki pakariyawai alé sibawa manyara, nasaba naullé engka mupa paddennuwang.

³⁰ Namuni rileppa'ki sibawa ripakatuna, sitinajai ritarima maneng iyaro.

³¹ Saba' dé' nasampéyakki matu Puwangnge untu' mannennungeng.

³² Puranana mabbéré anrasa-rasang maressé babuwasi, nasaba tette'i Namaséiki sibawa pammasé iya dé'é paggangkanna.

³³ Dé' nasibawangngi cenning ati leppessakki manrasa-rasa sibawa messé.

³⁴ Rékko tattenre'i nyawata ri laleng tahanangngé,

³⁵ rékko ateddéngekki ha' iya nabbéréyangngé Puwangnge,

³⁶ nasaba ripasibalékengngi adélékengngé, pastini naisseng Puwangnge sibawa najampangi.

³⁷ Rékko dé' napuwéloi Puwangnge séuwaé, pasti dé' aga-aga naullé pogau' tauwé untu' iyaro.

³⁸ Makessing sibawa maja napajoppai banna nasaba paréntana Puwangnge.

³⁹ Magi naharusu tauwé maddaréké rékko rihukkungngi nasaba dosa-dosana?

^40-41 Makessikki salidikiwi atuwotta, sibawa lisu ri Puwang Allataala ri surugaé. Laono mai tatimpa'i atitta sibawa massempajang,

⁴² “Madosaki sibawa maronta'ki lao ri Iko, oh Puwang, na dé' Muwabbéré paddampeng.

⁴³ Mulellukki sibawa Muwuno, tassubbui paressé babuwa-Mu ri laleng cai-Mu.

⁴⁴ Cai-Mu pada-padai ellung iya maumpe senna'é angkanna sempajatta dé' naulléi bettui.

⁴⁵ Puraki Mupancaji pada-pada warowoé ri pakkitanna sininna linoé.

⁴⁶ Napakatunaki sininna balitta sibawa nacawa-cawai;

⁴⁷ nakennaki acilakang sibawa ancurukeng, enrengngé tuwo ri laleng bahayaé sibawa amétaurengngé.

⁴⁸ Massolo'i uwai matakku pada-pada saloé nasaba ancuru'ni bangsaku.

⁴⁹ Maéloka teri temmappésau,

⁵⁰ narapi Iko, oh Puwang ri surugaé tajampangiki.

⁵¹ Messéni atikku mitai totona sining makkunraié ri kotata.

⁵² Pada-pada manu'-manu'é, nalellukka balié iya temmakkéalasangngé céccéka.

⁵³ Ri laleng bujung iya marakkoé nabuwakka tuwo-tuwo nainappa natébukka sibawa batu.

⁵⁴ Ménré'ni uwai lettu ri ulukku, naumappikkiri, – ‘Cappuni curitaku!’

⁵⁵ Oh Puwang, mangobbika lao ri Iko, polé ri borina bujung iya maliyungngéro.

^56-57 Uwéllauwi sibawa masero aja' Mutongkoi daucculim-Mu lao ri paréllaukku kuwammengngi Mutulukka. Na-Muwéngkalingai sempajakku, na-Mupolé maddeppé; makkeda-Ko, ‘Aja' mumétau.’

⁵⁸ Polé-Ko méwaiwi parakaraku, oh Puwang, purani Mupassalama nyawaku.

^59-60 Muwitai ja iya napogau'é lao ri iyya, rancana majana balié iya céccéékka. Rimakkuwannanaro, oh Puwang, éwaiwi parakaraku.

⁶¹ Iko, Puwang, méngkalingaka ripakatuna; Muwisseng sininna rancanana mennang.

⁶² Nabicaraka mennang puppu esso. Untu' cilakaika, mébbui mennang rancana majaé.

⁶³ Polé ri éléé lettu ri wennié, ripancajika addicawang.

⁶⁴ Hukkungngi mennang situru pangkaukenna, oh Puwang.

⁶⁵ Tanroiwi mennang, sibawa leppessangngi mennang monro ri laleng apettu-paddennuwangngé.

⁶⁶ Lellungngi sibawa paccappu manengngi mennang narapi mennang cappu risaring polé ri linoé.”