ASSURENG 39 - KITTA KAREBA MADECENG

Mébbui pakéyang imangngé

¹ Bézaleel sibawa Aholiab mébbui pakéyang assompang polé ri wol gawu'é, collipao sibawa cella untu' sining imangngé wettunna mennang majjama ri Bili' Mapaccingngé. Pakéyang imangngé untu' Harun riyébbui pada-pada iya napparéntangngé Puwangnge lao ri Musa.

² Efod-é riyébbui polé ri kaing lénang alusu'é, wol gawu'é, collipao sibawa cella, enrengngé wennang ulaweng.

³ Nalanroi mennang létta-létta ulawengngé nainappa narette-rette mancaji wennang marenni, nainappa natennung silaong kaing lénang alusu sibawa wol gawu, collipao sibawa cella.

⁴ Purairo mébbuni duwa tulu passaléppang éfod iya najaié ri benrénna.

⁵ Babbang ritennung alusu'é riyébbui polé ri bahang iya padaé sibawa riyajjairengngi ri éfod-éro angkanna mancaji séddi bagiyang pada-pada iya napparéntangngé Puwangnge lao ri Musa.

⁶ Naasai mennang batu dalimaé nainappa napasang ri laleng pamiring ulawengngé. Nasibawang apanréng nasobbi'i mennang aseng-ngasenna iya seppulo duwa ana'na Yakub ri batu-batuéro.

⁷ Nainappa iyaro batu-batué ripasang ri tulu passaléppanna éfod-é selaku papparéngngerang lao ri iya seppulo duwa suku Israélié, pada-pada iya napparéntangngé Puwangnge lao ri Musa.

Mébbu pattongko aro

⁸ Bézaleel sibawa Aholiab mébbu pattongko aro polé ri bahang iya padaé sibawa éfod, enrengngé padato sulangenna.

⁹ Bentu'na massulapa iya rileppe duwaé, sakkana sibawa lampéna tungke'-tungke' 22 sénti.

¹⁰ Ri pattongko aroéro napasangngi mennang eppa barisi batu paramata. Ri barisi mammulangngé batu dalima, topas sibawa baiduri sépah.

¹¹ Ri barisi maduwaé zamrud, batu nilam sibawa intang.

¹² Ri barisi matellué batu lazuardi, aki' sibawa batu kacubung.

¹³ Ri barisi maeppaé batu pirus, yakut sibawa ratna campaka. Iya seppulo duwa paramataéro risiyoi sibawa ulaweng.

¹⁴ Ri tungke' paramataé riyokii asenna sala séddinna polé ri iya seppulo duwa ana'na Yakub selaku tanrang papparéngngerang lao ri suku-suku Israélié.

¹⁵ Nainappa riyébbureng duwa ranté polé ri ulaweng tuléngngé iya ritulué pada-pada tulué.

¹⁶ Riyébbureng towi duwa gellang ulaweng iya ripasangngé ri iya duwa cappa yasé'na pattongko aroé.

¹⁷ Nainappa iya duwa ranté ulawengngéro riputtama ri laleng tolit-tolingngéro,

¹⁸ sibawa iya duwa cappa'na laingngé riyassiyorengngi ri iya duwa pamirinna, angkanna iyaro pattongko aroé weddingngi ripasisumpung sibawa bagiyang yolona tulu passaléppanna éfod-é.

¹⁹ Nainappa riyébbusi duwa toling ulaweng iya ripasangngé ri pattongko aroéro, ri cappa yawana bagiyang lalenna iya nakennaé éfod.

²⁰ Purairo riyébbui duwa toling ulaweng iya ripasangngé ri bagiyang yolona iya duwa tulu passaléppang éfod-é, seddéna sambungeng pajjaina céddé ri yawa, ri yasé'na babbang polé ri tennungeng alusu'é.

²¹ Situru sibawa paréntana Puwangnge lao ri Musa, tolinna pattongko aroé ripasisumpungngi sibawa tulu gawu'é ri toling éfod-é, angkanna iyaro pattongko aroé tette'i engka ri yasé'na babbangngé sibawa dé' naleppe.

Mébbui pakéyang laingngé untu' sining imangngé

²² Jumba iya ripaké ri yasé'na éfod-é, riyébbu manengngi polé ri wol gawu'é.

²³ Sebbo ellonna ripakkasse'i sibawa pita ritennung kuwammengngi dé' namagampang sapé.

^24-26 Ri wiring yawana mattulili riyébburengngi bélo-bélo buwa dalima polé ri kaing lénang alusu'é enrengngé wol gawu, collipao sibawa cella, riyelle-elle sibawa giringkiring polé ri ulawengngé, situru sibawa paréntana Puwangnge lao ri Musa.

²⁷ Mébbui mennang kaméja untu' Harun sibawa ana'-ana'na,

²⁸ passaputo, saluwara' ponco polé ri lénangngé,

²⁹ sibawa babbang polé ri kaing lénang alusu'é, wol gawu'é, collipao sibawa cella'é, ribélo-béloi sibawa sulangeng, pada-pada iya napparéntangngé Puwangnge lao ri Musa.

³⁰ Riyébbureng towi bélo-bélo polé ri ulaweng tuléngngé, tanranna makkedaé purani mennang ripallaing untu' Puwangnge. Ribélo-béloéro riyokii ada-ada “Ripallaing untu' Puwangnge”.

³¹ Iyaro bélo-béloé ripasangngi ribagiyang yolona passapué, siturui sibawa paréntana Puwangnge lao ri Musa.

Ripattépunna iyaro jama-jamangngé

³² Angkanna ripattépuni sininna jama-jamang mébbuéngngi Kémana Puwangnge. Pura manenni napogau' tau Israélié pada-pada iya napparéntangngé Puwangnge lao ri Musa.

³³ Natiwini mennang lao ri Musa Kémaé sibawa sininna passakke'na, pakkadak-kadanna, sining aju mappolona, alliri-allirinna sibawa pallanggana,

³⁴ pattongko polé ri bingkulang bémbé lai iya ripecco cella'é, pattongkona polé ri bingkulang alusu'é, kaing bowong.

³⁵ Petti Assijancingngé iya mallise'é duwa batu sibawa aju pabbuléna enrengngé pattongkona,

³⁶ méjang sibawa sininna passakke'na enrengngé roti pakkasuwiyangngé,

³⁷ aju lampu polé ri ulaweng tuléngngé, lampu-lampunna sibawa sininna passake'na, minnya untu' lampué,

³⁸ mézba polé ri ulawengngé, minnya upacara, dupa bau, kaing pallawa sumpanna Kémaé,

³⁹ mézba gessaé sibawa anengeng kawe polé ri gessaé, aju pabbuléna sibawa sininna passakke'na; kullang onrong mabbissa sibawa tudangenna,

⁴⁰ ténda-ténda untu' seddé Kémaé sibawa alliri-allirinna enrengngé pallanggana, kaing pallawa pintu gerbang untu' seddéna sibawa sining tuluna, patto-patto Kémaé; sininna paréwanna iya ripaké ri laleng Kémaé,

⁴¹ sibawa pakéyang assompangngé untu' sining imangngé wettunna mennang majjama ri Bili' Mapaccingngé enrengngé pakéyang untu' Harun sibawa ana'-ana'na.

⁴² Pura manenni napogau' tau Israélié sininna jama-jamangngéro pada-pada iya napparéntangngé Puwangnge lao ri Musa.

⁴³ Naparéssani Musa sini-sininnaé sibawa naitai makkedaé purani naébbu mennang pada-pada iya napparéntangngé Puwangnge. Nainappa Musa barakkakiwi mennang.