ASSURENG 37 - KITTA KAREBA MADECENG

Mébbui Petti Assijancingngé

¹ Bézaleel mébbui Petti Assijancingngé polé ri aju akasiaé, lampéna 110 sénti, sakkana sibawa tanréna tungke'-tungke' 66 sénti.

² Bagiyang ri lalenna sibawa ri saliwenna rilapiriwi sibawa ulaweng tuléng, nainappa riyébbureng pamiring ulaweng mattulilingiwi.

³ Nainappa mébbu eppa gellang ulaweng untu' aju pabbuléna nanapasangngi ri iya eppa ajéna pettiéro, duwa toling ri tungke' benrénna.

⁴ Naébbu towi pabbuléna polé ri aju akasiaé, enrengngé nalapiriwi sibawa ulaweng,

⁵ nainappa naputtama iyaro aju pabbuléé ri lalenna tolingngé ri tungke' benrénna pettiéro.

⁶ Nainappa mébbu séddi pattongko polé ri ulaweng tuléngngé, lampéna 110 sénti sibawa sakkana 66 sénti.

⁷ Naébbu towi duwa kérub polé ri ulaweng ri lanroé,

⁸ séddi ri tungke' pattongkonaro. Iya duwa kérub-éro ripasséddiwi sibawa pattongkona

⁹ nariyébbui siyolong, sibawa panni iya mallebba'é sampoi pattongkona iyaro pettié.

Mébbui méjang untu' roti pakkasuwiyangngé

¹⁰ Bézaleel mébbui méjangngé polé ri aju akasiaé, iya lampénaé 88 sénti, sakkana 44 sénti sibawa tanréna 66 sénti.

¹¹ Iyaro méjangngé nalapirini sibawa ulaweng tuléng enrengngé ripasangi pamiring ulaweng mattulili.

¹² Nanaébbui wiring méjangngé sillebba 7,5 sénti. Iyaro wirinna napasangiwi pamiring ulaweng mattulili.

¹³ Naébburenni eppa toling untu' aju pabbuléna nanapasangngi ri iya eppa sung ajéna méjangngé.

¹⁴ Toling pattahanna aju pabbuléna ripasangngi ri seddé wirinna méjangngé.

¹⁵ Iyaro pabbuléé riyébbui polé ri aju akasiaé sibawa rilapiriwi ulaweng.

¹⁶ Mébbu towi penné-penné, cangkiri-cangkiri, kendi-kendi sibawa mangko'-mangko' untu' pakkasuwiyang uwai anggoro. Sininna passakke'na méjangngéro naébbui polé ri ulaweng tuléngngé.

Riyébbuna ajé lampué

¹⁷ Bézaleel mébbui ajé lampué polé ri ulaweng tuléngngé. Tudangeng sibawa akkatenningenna riyébbui polé ri ulaweng rilanroé. Bunga bélo-bélona, muttama'ni uce'-uce' unganna sibawa ampélona ripasséddiwi sibawa akkatenningenna.

¹⁸ Ri akkatenningengngéro riyébburengngi enneng takké, tellu takké ri tungke' benrénna.

¹⁹ Ri tungke' takkéna riyébburengngi bélo-bélo sinrupa tellu bunga badam silaong uce'-uce' unganna sibawa ampélona.

²⁰ Ri akkatenningenna riyébburengngi bélo-bélo maddupa eppa bunga badam silaong uce'-uce' unganna sibawa ampélona.

²¹ Ri yawana tungke' sipasang takkéro riyébburengngi séddi uce'-uce' unga.

²² Sininna ajéna lampuéro silaong uce'-uce'na enrengngé takké-takkéna riyébbui polé ri létta ulaweng rilanroé iya tuléngngé.

²³ Ri ajéna lampuéro naébbui pitu lampu silaong pakkakkasa'na untu' paccingiwi sumbunna sibawa baki'na polé ri ulaweng tuléngngé.

²⁴ Untu' mébbui ajé lampué sibawa passakke'na riyapparelluwangngi 35 kilo ulaweng tuléng.

Mébbui mézba onrong mattunu dupa

²⁵ Bézaleel mébbui polé ri aju akasiaé séddi mézba untu' onrong mattunu dupa. Iyaro mézbaé massulapa'i; lampé sibawa sakkana tungke'-tungke' 45 sénti sibawa tanréna 90 sénti. Ri iya eppa sunna ri yasé riyébburengngi tanru iya masséddié sibawa mézbaéro.

²⁶ Bagiyang yasé'na, iya eppa benrénna sibawa tanru-tanru'na rilapiriwi sibawa ulaweng tuléng enrengngé riyébburengngi pamiring ulaweng mattulili.

²⁷ Naébbureng towi duwa toling ri yawana pamiring ulawengngé ri iya duwa benrénna untu' tahangngi aju pabbuléna mézbaéro.

²⁸ Iyaro pabbuléé poléi ri aju akasiaé sibawa rilapiriwi ulaweng.

Mébbui minnya upacaraé sibawa dupaé

²⁹ Mébbu towi Bézaleel minnya upacara sibawa dupa tuléng iya mabaué, ricampuru pada-pada minnya wangié.