ASSURENG 35 - KITTA KAREBA MADECENG

Peraturanna esso Saba'é

¹ Napaddeppungenni Musa sininna bangsa Israélié nainappa makkeda lao ri mennang, “Iyanaé paréntana Puwangnge untu' iko:

² Engka enneng esso untu' mappallaung, iyakiya esso iya mapitué iyanaritu esso untu' mappésau, esso maraja iya ripallaingngé untu' Puwangnge. Nigi-nigi mappallaung ri esso Saba'é harusu'i rihukkung maté.

³ Iyaro essoé dé' naweddikko palluwa' api ri bolamu.”

Pakkasuwiyang untu' Kémana Puwangnge

⁴ Makkedai Musa lao ri sininna bangsa Israélié, “Makkuwaniyé paréntana Puwangnge!

⁵ Tiwino pakkasuwiyang lao ri Puwangnge. Nigi-nigi ripakédo atinna, harusu'i makkasuwiyangeng ulaweng, péra' sibawa gessa;

⁶ kaing lénang alusu, kaing wol gawu, collipao sibawa cella; kaing polé ri bulu bémbé'é;

⁷ bingkulang bimbala lai iya ripecco cella'é; bingkulang alusu, aju akasia,

⁸ minnya untu' lampué; rampa-rampa untu' minnya upacaraé sibawa untu' dupa iya mabaué;

⁹ paramata dalima sibawa paramata laing untu' ripasang ri waju éfod-é sibawa pattongko arona Imang Lompoé.”

Paréwa-paréwa untu' Kémana Puwangnge

¹⁰ “Sininna panré iya maccaé ri yelle'mu harusu'i polé untu' mébbui sininna iya napparéntangngé Puwangnge, iyanaritu:

¹¹ Kéma, pabbingenna sibawa pattongkona, pakkadak-kadanna sibawa rangkana, sining aju maloppona, tau-tau tange'na sibawa pallanggana.

¹² Petti Assijancingngé sibawa aju pabbuléna, pattongkona sibawa kaing pattongkona;

¹³ méjang sibawa aju pabbuléna, sininna passakke'na enrengngé roti ripatalaé;

¹⁴ ajé lampué untu' pappakatajang sibawa passakke'na, lampu sibawa minnya'na,

¹⁵ mézba onrong mattunu dupa sibawa aju pabbuléna, minnya upacara, dupa iya mabaué, kaing pallawa untu' tange'na Kémaé,

¹⁶ mézba untu' akkarobangeng ritunu sibawa tarali-tarali polé ri gessaé, aju pabbulé sibawa sininna passakke'na; kullang onrong mabbissa sibawa pallanggana,

¹⁷ ténda-ténda untu' paturungenna, alliri-alliri sibawa pallanggana, kaing paddenring tange' paturungenna,

¹⁸ patto-patto sibawa tulu untu' Kémaé sibawa paturungenna;

¹⁹ pakéyang assompang untu' sining imangngé wettunna mennang majjama ri Bili' Mapaccingngé sibawa pakéyang ripallaingngé untu' Imang Harun, enrengngé ana'-ana'na.”

Natiwina pakkasuwiyanna bangsa Israélié

²⁰ Nainappa sininna tau Israélié iya maddeppungengngéro tassiya-siyani,

²¹ nanigi-nigi iya ripakédoé atinna, tiwii pakkasuwiyang lao ri Puwangnge untu' passakke'i Kémana Puwangnge. Natiwi towi mennang sininna iya riyapparelluwangngé untu' assompangngé sibawa bahang untu' pakéyanna imangngé.

²² Nigi-nigi maélo, muwi worowané iyaré'ga makkunrai, polé tiwii pattoddo, anting-nganting, ciccing, ranté sibawa sininna rupanna paréwa ulawengngé untu' riyakkasuwiyangeng lao ri Puwangnge.

²³ Tungke' tau iya mappunnaiyé kaing lénang alusu, kaing wol gawu, collipao iyaré'ga macella, kaing polé ri bulu bémbé'é, bingkulang bimbala lai iya ripecco cella'é, iyaré'ga bingkulang alusu, nakkasuwiyangenni barab-barangngéro.

²⁴ Tungke' tau iya weddingngé massumbangeng péra' iyaré'ga gessa, natiwii untu' Puwangnge. Makkuwatoro napogau' sining tau iya mappunnaiyé aju akasia untu' jama-jamangngéro.

²⁵ Sining makkunrai iya maccaé munu tiwii wennang lénang alusu enrengngé wennang wol gawu, collipao sibawa cella iya puraé mennang naébbu.

²⁶ Munu towi mennang wennang polé ri bulu bémbé'é.

²⁷ Sining pamimpingngé tiwii paramata dalima enrengngé paramata-paramata laingngé untu' ripasang ri éfod-é sibawa pattongko aroé.

²⁸ Tiwi towi mennang rampa-rampa sibawa minnya untu' lampué, minnya upacaraé enrengngé dupa iya mabaué.

²⁹ Sininna tau Israélié macenning atinna tiwii pakkasuwiyanna mennang ri Puwangnge untu' jama-jamang iya napparéntangngé Puwangnge naolai Musa.

Sining panré iya risuroé mébbui Kémana Puwangnge

³⁰ Nainappa makkeda Musa lao ri tau Israélié, “Puwangnge pura piléi Bézaleel ana' Uri, eppona Hur, polé ri suku Yéhuda

³¹ enrengngé mpéréngngi sibawa akuwasan-Na. Allataala mpéréngngi pappéjeppu, amaccang sibawa amampungeng ri laleng sininna rupanna ébbu-ébbu makessingngé,

³² untu' mébbu rancangang iya mapparelluwangngé apanréng, jamai polé ri ulawengngé, péra'é sibawa gessaé;

³³ untu' masai batu paramata iya maéloé ripakkenna; untu' sobbi'i ajué enrengngé sininna rupanna ébbu-ébbu makessing laingngé.

³⁴ Lao ri Bézaleel sibawa Aholiab, ana'na Ahisamakh polé ri suku Dan, Puwangnge mpéréngngi amaccang untu' mappagguruwangngi apanrénna mennang lao ri tau laingngé.

³⁵ Riwéréngngi mennang amaccang ri laleng sininna rupanna jama-jamang iya napogau'é ahli mappaé, parrancangngé sibawa ahli pattennung lénang alusu'é, wol gawu'é, collipaoé sibawa cella'é, enrengngé kaing laingngé. Mennang iyanaritu parrancang iya maccaé sibawa naullé pogau'i sininna rupanna jama-jamangngé.