ASSURENG 28 - KITTA KAREBA MADECENG

Pakéyang imangngé

¹ “Obbii Harun kakamu enrengngé ana'-ana'na Nadab, Abihu, Eléazar sibawa Itamar, namupallaingngi mennang kuwammengngi weddingngi tumaningika selaku imang.

² Ebbuno pakéyang imang untu' Harun, kuwammengngi napaita malebbi.

³ Obbii sininna tukang pajjai iya puraé Uwéréng amaccang. Suroi mennang mébbui pakéyanna Harun, kuwammengngi weddingngi ripallaing untu' tumaningi-Ka selaku imang.

⁴ Suro towi mennang mébbu pattongko aro, éfod, jumba, kaméja risulang, passapu sibawa babbang. Iyaro pakéyang imangngé harusu'i naébbu mennang untu' Harun, kakamu sibawa ana'-ana'na kuwammengngi weddingngi natumaningi-Ka selaku imang.

^5-6 Iyaro pakéyangngé harusu'i mennang naébbu polé ri wol gawu'é, collipao sibawa macella'é, wennang ulaweng sibawa lénang alusu. Ri lainnaéro éfod-é harusu'i ribélo-béloi sibawa sulangeng.

⁷ Duwa tulu passalémpanna éfod-é harusu'i rijai ri benrénna.

⁸ Séddi babbang ritennung alusu polé ri bahang iya padaé harusu'i rijai ri éfod-éro kuwammengngi namasséddi.

^9-12 Alano duwa batu dalima. Sappano séddi panré ulaweng iya maccaé untu' sobbi'i ri batuéro aseng-ngasenna iya seppulo duwa ana'na Yakub situru umuru'na, enneng aseng ri tungke' batu. Nainappa iya duwa batu paramataéro harusu'i ripasang ri laleng pamiring ulawengngé sibawa ritaro ri tulu passalémpang éfod-é selaku tanrang papparéngngerang lao ri iya seppulo duwa suku Israélié. Nasibawang caraéro natiwii Harun asenna mennang ri salangkanna, angkanna Iyya, Puwang, tuli uwéngngerangngi mennang.

¹³ Ri lainnaé iya duwa pamiring ulawengngéro

¹⁴ harusu towi riyébbu duwa ranté polé ri ulaweng tuléngngé iya ritulué pada-pada tulué, untu' ripasang ri pamiring ulawengngéro.”

Pattongko aro

¹⁵ “Ebburengngi Imang Lompoé séddi pattongko aro untu' napaké wettunna maélo missengngi élona Allataala. Bahang sibawa sulanna iyaro pattongko aroé harusu'i pada-pada sibawa bahang enrengngé sulangeng éfod-é.

¹⁶ Bentu'na massulapa sibawa wedding rileppi duwa, lampé sibawa sakkana tungke'-tungke' 22 sénti.

¹⁷ Pasangiwi eppa barisi batu paramata ri pattongko aroéro. Ri barisi mammulangngé batu dalima, topas sibawa baiduri sepah.

¹⁸ Ri barisi maduwaé batu zamrud, batu nilang sibawa intang.

¹⁹ Ri barisi matellué batu lazuardi, batu aki' sibawa batu kacubung.

²⁰ Ri barisi maeppaé batu pirus, yakut sibawa ratna cempaka. Iya seppulo duwa paramataéro harusu'i risiyo sibawa ulaweng.

²¹ Tungke' paramata harusu'i riyoki sala séddinna aseng polé riseppulo duwa ana'na Yakub selaku tanrang papparéngngerangeng lao ri suku-suku Israélié.

²² Ebburengngi iyaro pattongko aroé duwa ranté ulaweng tuléng iya ritulué pada-pada tulué.

²³ Ebbu towi duwa gellang ulaweng namupasangngi ri iya duwa cappa'na ri yasé'na pattongko aroéro

²⁴ nainappa muputtama iya duwaro ranté ulawengngé ri laleng sining gellangngé onna.

²⁵ Iya duwa cappa laing polé ri rantééro harusu'i riyassiyoreng ri iya duwa pamiringngé, kuwammengngi iyaro pattongko aroé weddingngi ripasisumpung sibawa bagiyang yolona tulu passaléppanna éfod-é.

²⁶ Ebbupo duwa toling ulawessi, nainappa mupasang ri pattongko aroéro ri cappa yawana bagiyang ri lalenna iya nakennaé éfod.

²⁷ Purairo, ébbuno duwa toling ulawessi namupasangngi ri bagiyang yolona iya duwa tulu passaléppang éfod-é ri seddéna sambungeng pajjaina mariyawa céddé, ri seddé yasé'na babbang polé ritennungeng alusu'é.

²⁸ Toling pattongko aroé harusu'i ripasisumpung sibawa tulu gawu'é ri toling éfod-é kuwammengngi iyaro pattongko aroéro tette'i engka ri yasé'na babbangngé sibawa dé' naleppe.

²⁹ Wettunna Harun muttama ri onrong mapaccingngé, harusu'i natiwi aseng-ngasenna suku Israélié iya riyokié ri pattongko arona, kuwammengngi Iyya, Puwang, tuli uwéngngerangngi umma'-Ku.

³⁰ Taroi Urim sibawa Tumim ri laleng pattongko aroé untu' napaké Harun rékko mangoloi ri Iyya. Ri wettu-wettu makkuwaéro harusu'i tuli paké pattongko aro, kuwammengngi naulléi missengngi élo-Ku untu' umma Israélié.”

Pakéyang laing untu' imangngé

³¹ “Jumba iya napaké ri yasé'na éfod-é harusu' manengngi riyébbu polé ri wol gawu'é.

³² Sebbo ellonna ripakkasse'i sibawa pita ritennung kuwammengngi dé' namagampang sapé.

^33-34 Ri wiring yawana mattulili harusu'i riyébbureng bélo-bélo buwa dalima polé ri wol gawu'é, collipao sibawa cella riyelle-elleki sibawa giringkiring polé ri ulawengngé.

³⁵ Iyaro jumbaé harusu'i napaké Harun rékko majjamai selaku imang. Wettunna lao ri yolo-Ku ri Bili' Mapaccingngé iyaré'ga salaiwi onrongngéro, paéngkalingai matu oni giringkiringngéro, kuwammengngi aja' namaté.

³⁶ Ebbuno séddi bélo-bélo polé ri ulaweng tuléngngé sibawa sobbikengngi ada-ada ‘Ripallaingngi untu' Puwangnge’.

³⁷ Assiyorengngi iyaro ri passapunna sibawa tulu gawu'.

³⁸ Iyaro bélo-bélo ulawengngé harusu'i napasang Harun ri linrona kuwammengngi Iyya, Puwang, maélo-Ka tarima manengngi pakkasuwiyanna iya natiwié tau Israélié lao ri Iyya, namuni ri laleng natiwina iyaro pakkasuwiyangngé purai pogau' asalang.

³⁹ Kaméjana Harun harusu'i ritennung polé ri lénang alusu'é. Ebbureng towi séddi passapu polé ri lénang alusu'é sibawa babbang iya risulangngé.

⁴⁰ Ebbuno kaméja, babbang sibawa passapu untu' ana'-ana'na Harun kuwammengngi napaita mennang malebbi.

⁴¹ Pasangngi iyaro pakéyangngé ri Harun silessuremmu sibawa ana'-ana'na. Minnyakiwi mennang sibawa minnya zaitun; nasibawang iyaro narilanti mennang sibawa ripallaing untu' tumaningi-Ka selaku imang.

⁴² Nainappa ébburenni mennang saluwara ponco' polé ri kaing lénangngé, labbunna polé ri babuwaé lettu ri poppangngé untu' tongkoi bagiyang watakkalé iya dé'é nasiratang riita.

⁴³ Iyaro saluwara'é harusu'i tuli napaké mennang wettunna muttama ri laleng Kéma-Ku iyaré'ga maddeppériwi mézbaé untu' pogau'i assompangngé selaku imang ri Bili' Mapaccingngé, kuwammengngi dé' namaté mennang nasaba paitai bagiyang watakkaléna iya tessiratangngé riita. Iyaro peraturangngé tette'i takkenna untu' Harun sibawa wija-wijanna.”