ASSURENG 25 - KITTA KAREBA MADECENG

Pakkasuwiyang untu' Kémana Puwangnge

¹ Makkedai Puwangnge lao ri Musa,

² “Suroi tau Israélié tiwi pakkasuwiyangeng lao ri Iyya. Nigi-nigi ripakédo atinna, harusu'i tiwi pakkasuwiyang

³ maddupa: ulaweng, péra' sibawa gessa;

⁴ kaing lénang alusu, kaing wol gawu, collipao sibawa cella, kaing polé ri bulu bémbé'é,

⁵ bingkulang bémbé lai iya ripecco cella'é, bingkulang alusu, aju akasia,

⁶ minnya untu' lampu, rampa-rampa untu' minnya upacara sibawa untu' dupa iya mabaué,

⁷ maddupa-rupang batu paramata untu' riparamataingengngi éfod-é sibawa pattongko arona Imang Lompoé.

⁸ Suroi iyaro bangsaé mébburek-Ka séddi kéma, kuwammengngi weddik-Ka monro ri tengngana mennang.

⁹ Kéma sibawa paréwanna harusu'i mennang naébbu situru rancana iya Ujellokengngéngngi matu.”

Petti Assijancingngé

¹⁰ “Ebbuno séddi petti polé ri aju akasiaé iya lampénaé 110 sénti, sakkana sibawa tanréna tungke'-tungke' 66 sénti.

¹¹ Lapiriwi bagiyang ri lalenna sibawa saliwenna ulaweng tuléng sibawa ébbui pamirinna polé ri ulawengngé.

¹² Untu' aju pabbuléna, ébburengngi eppa toling ulaweng sibawa assakkarengngi ri iya eppa ajéna, duwa toling ri tungke' benrénna.

¹³ Ebbu towi pabbuléna polé ri aju akasiaé namulapiriwi iyaro sibawa ulaweng,

¹⁴ nainappa muputtama iyaro aju pabbuléna ri laleng tolinna ri tungke' benrénna iyaro pettié.

¹⁵ Iyaro aju pabbuléna harusu'i tette engka ri laleng sining tolinnaro, sibawa dé' nawedding ripassu.

¹⁶ Na ri laleng pettiéro harusu'i mutaro iya duwa batué sibawa parénta-parénta iya maéloé Uwérékko.

¹⁷ Ebbui iyaro pattongkona pettié polé ri ulawengngé, lampéna 110 sénti sibawa sakkana 66 sénti.

¹⁸ Ebbuno duwa kérub polé ri ulaweng rilanroé,

¹⁹ séddi ri tungke' cappa pattongkona pettiéro. Iya duwa kérub-éro harusu'i ripasséddi sibawa pattongkona,

²⁰ sibawa riyébbui siyolong panni iya mallebba'é ri tompo'na pettiéro.

²¹ Taroi iya duwa batué ri laleng pettiéro sibawa pasangngi pattongkona ri tompo'na.

²² Ri onrongngéro maélo-Ka méwako sita, sibawa polé ri yasé'na pattongkona, ri yelle'na iya duwa kérub-éro, Uwérékko matu hukkung-hukkuk-Ku untu' bangsa Israélié.”

Méjang untu' mappatala roti

²³ “Ebburengngi séddi méjang polé ri aju akasiaé iya lampénaé 88 sénti, sakkana 44 sénti, sibawa tanréna 66 sénti.

²⁴ Lapiriwi sibawa ulaweng tuléng enrengngé pasangiwi séddi pamiring ulaweng mattulilingiwi.

²⁵ Ebbui wiring méjanna lebba'na 7,5 sénti sibawa wéréngngi pallacce ulaweng mattulilingiwi iyaro wirinna.

²⁶ Ebburengngi eppa toling polé ri ulawengngé sibawa pasangngi iyaro ri iya eppa sunna ri ajéna, macawé ri wirinna.

²⁷ Iyaro tolingngé untu' tahangngi aju pabbuléna kuwammengngi iyaro méjangngé weddingngi riyulé.

²⁸ Iyaro aju pabbuléé harusu'i riyébbu polé ri aju akasiaé sibawa rilapiriwi ulaweng.

²⁹ Ebbuno penné-penné, cangkiri-cangkiri, kendi-kendi sibawa mangko'-mangko' untu' pakkasuwiyang uwai anggoro. Iya manenna passakke'na méjangngéro harusu'i riyébbu polé ri ulaweng tuléngngé.

³⁰ Iyaro méjangngé harusu'i ritaro ri yolona Petti Assijancingngé, sibawa ri tompo'na méjangngé harusu'i tuli tassadiya patala roti.”

Ajé lampu

³¹ “Ebbui ajé lampué polé ri ulaweng tuléngngé. Tudangenna sibawa akkatenningenna harusu'i riyébbu polé ri ulaweng rilanroé; sining bunga bélo-bélona, muttama'ni uce'-uce' unganna sibawa ampélo unganna harusu'i masséddi sibawa tudangenna enrengngé akkatenningenna.

³² Ri akkatenningengngéro harusu'i riyébbureng enneng takké, tellu takké ri tungke' benrénna.

³³ Ri tungke' takkéna harusu'i riyébbureng bélo-bélo maddupa tellu bunga badam sibawa uce'-uce' unganna enrengngé ampélo unganna.

³⁴ Ri akkatenningenna harusu'i riyébbureng bélo-bélo maddupa eppa unga badam sibawa uce'-uce' unganna enrengngé ampélo unganna.

³⁵ Ri tungke' pasang takkéro harusu'i riyébbureng séddi uce'-uce' unga.

³⁶ Sininna iyaro ajé lampué sibawa uce'-uce' unganna enrengngé takké-takkéna harusu'i riyébbu polé ri sipolo ulaweng tuléng rilanroé.

³⁷ Ebburengngi pitu lampu ri ajé lampuéro sibawa pasangngi pékkugi carana angkanna tappana liyoloi.

³⁸ Ebburengngi pakkakkasa' untu' pépaccingiwi sumbu lampué sibawa baki'na polé ri ulaweng tuléngngé.

³⁹ Pakéi telluppulo lima kilo ulaweng untu' mébbui iyaro ajé lampué sibawa sininna pappésakke'na.

⁴⁰ Jagaiwi kuwammengngi ajé lampué riyébbui situru conto iya Ujellokengngékko ri yasé'na buluéro.”