ASSURENG 2 - KITTA KAREBA MADECENG

Jajinna Musa

¹ Iyaro wettué engka séddi worowané polé ri suku Léwi, kawing sibawa séddi makkunrai poléto ri sukuéro.

² Nanajajiyanna iyaro makkunraié séddi ana' worowané. Wettunna naita makkedaé iyaro ana'loloé magello senna, nasubbuni tellumpuleng ittana.

³ Iyakiya iyaro ana'loloé dé' naulléi subbui maitta-itta. Nanalana iyaro indo'na séddi baka polé ri wella arasoé, nanalapiriwi sibawa kamalo kuwammengngi dé' nauttamakiwi uwai. Iyaro ana'loloé nataroni ri laleng bakaéro, nainappa natiwi ri Salo Nil nanataroi ri tengnga-tengngana araso maddapurengngé ri wiring saloéro.

⁴ Kaka makkunrainna iyaro ana'loloé tettongngi mabéla-béla polé kuwaro untu' mitai aga iya kajajiyangngé matu sibawa anrinna.

⁵ Napoléna ana' makkunrainna arungngé. Nonnoi ri saloé untu' cemmé nasining pattumaninna joppa-joppai ri wirinna saloé. Tappa naita muni ana' makkunrainna arungngé iyaro bakaé ri tengnga-tengngana araso maddapurengngé, nainappa nasuro séddi ata makkunrainna malai.

⁶ Wettunna natimpa ana' makkunrainna arungngé iyaro bakaé, naitani engka ana'lolo ri lalenna, naiyaro ana'loloé mattengngangngi teri. Kasiyanni ana' makkunrainna arungngé lao ri aléna sibawa makkeda, “Iyaé ana'na tau Ibranié.”

⁷ Nanakkutanana iyaro kakana ana'loloé lao ri ana' makkunrainna arungngé, “Maéloiga ana'na arungngé usappareng séddi makkunrai Ibrani untu' pasusui iyaro ana'loloé?”

⁸ Nappébali ana'na arungngé, “Makessinni.” Nanalaona iyaro ana'daraé mobbii indo'na muto.

⁹ Nakkeda ana'na arungngé lao ri makkunraiéro, “Tiwini iyaé ana'loloé, namupasusungekka; nawéréppo matu saro indo'ku.” Nanatiwini iyaro ana'loloé sibawa napasusui.

¹⁰ Wettunna battowa-battowani iyaro ana'loloé, nabbéréyanni indo'na lao ri ana'na arungngé. Nainappa ana'na arungngé pancajiwi ana' piyarana. Nakkeda ana'na arungngé, “Uwéréngngi aseng Musa, saba' uwalai polé ri uwai.”

Larinna Musa lao ri Midian

¹¹ Wettunna battowani Musa, laoni sita sining tau sibangsana. Naitani pékkugi mennang ripassa jamai jama-jamang matane'é. Naita toni séddi tau Maséré mpunoi séddi tau Ibrani.

¹² Gilinni Musa mattulili, na wettunna naita makkedaé dé'gaga pénessaiwi, naunoni iyaro tau Maséré'é nainappa nasubbu ujuna ri laleng kessi'é.

¹³ Pappa bajana laosi Musa, nanaitani duwa tau Ibrani mattengngang mallaga. Nakkutana Musa lao ri tau iya pasalaéro, “Magi muwunrui silaommu?”

¹⁴ Nappébali iyaro tauwé, “Niga makkako mancaji pamimping sibawa hakitta? Maélo tokkoga mpunoka, pada-pada tau Maséré iya muwunoéro?” Namétauna Musa sibawa mappikkiri, “Cilaka! Kaissengenni iyaro pangkaukekku.”

^15-16 Wettunna naéngkalinga arungngé passalenna kajajiyangngéro, sappani akkaleng untu' mpunoi Musa. Iyakiya lariwi Musa nanaonro ri wanuwa Midian. Imanna Midian, iya riyasengngé Yitro, mappunnaiwi pitu ana' makkunrai. Riséuwaé esso, wettunna Musa mattengngang tudang ri seddéna séddié bujung, poléni iya pitu ana' makkunrainna Yitro untu' séro uwai sibawa lisekiwi onrong énungeng bémbé sibawa bimbala makkonronna ambo'na mennang.

¹⁷ Iyakiya siyagangngaré pakkampi paddésu'i iyaro ana'-ana'daraé. Nanapoléna Musa tulungngi mennang sibawa paénungengngi olokolo'na mennang.

¹⁸ Wettunna mennang lisu, makkutanani ambo'na, “Magi mumasitta makkuwa lisu iyaé essoé?”

¹⁹ Namappébali mennang, “Engka séddi tau Maséré tulukki polé ri pagganggunna sining pakkampi laingngé. Mala nasérokekki uwai, sibawa paénungengngi olokolo'ta.”

²⁰ Nakkutana Yitro lao ri ana'-ana'na, “Kégani palé makkekkuwangngé? Magi musalaiwi iyaro tauwé? Laono muwobbii tasisama manré.”

²¹ Nasitujuini Musa untu' monro kuwaro. Nainappa Yitro pasiyalai ana'na iya riyasengngé Zipora sibawa Musa.

²² Najajiyanni Zipora séddi ana' worowané. Iyaro ana'é nawérénni aseng Gérsom, nasaba mappikkiri'i Musa, “Séddiki tau laing kuwaé.”

²³ Mattaut-taung ri munrinna maténi arung Maséré. Iyakiya bangsa Israélié maddaréké mupi nasaba ripowatai mennang, angkanna gorani mennang méllau tulung. Lettu'ni ri Allataala kelli'na mennang.

²⁴ Nariyéngkalingana mennang ri Allataala, sibawa naéngngeranni assijancin-Na sibawa Abraham, Ishak sibawa Yakub.

²⁵ Naitani sining tau Israélié ripowata, nanapettuini untu' tulungngi mennang.