ANGIMANGENG 3 - KITTA KAREBA MADECENG

Akkarobangeng pappasidamé

¹ Rékko séddié tau makkasuwiyangeng sikaju saping untu' akkarobangeng pappasidamé, iyaro sapingngé wedding lai, wedding komba, iyakiya dé' nawedding engka sala-salanna.

² Tau iya makkasuwiyangengngéngngi harusu'i napalénne limanna ri tompo ulunna iyaro olokolo'é nainappa nagéré ri yolona sumpanna Kémana Puwangnge. Sining imang wijanna Harun harusu'i mabbolorengngi iyaro dara sapingngé ri iya eppa benrénna mézbaé.

³ Untu' akkarobangeng pappasidamé lao ri Puwangnge, harusu'i imangngé makkasuwiyangengngi sining bagiyangngéwé polé ri olokolo'éro: lunra' iya dokoéngngi lise babuwana,

⁴ ginjalna sibawa lunra'na enrengngé bagiyang iya kaminang makessingngé polé ri atinna.

⁵ Iya manennaro, silaong sibawa akkarobangeng ritunu laingngé, harusu'i ritunu ri yasé'na mézbaé. Baunna iyaro akkarobangeng inanré pésennangiwi atinna Puwangnge.

⁶ Rékko iyaro riyakkasuwiyangengngé untu' akkarobangeng pappasidamé sikajuwi bimbala iyaré'ga bémbé, iyaro olokolo'é weddingngi lai, wedding komba, iyakiya dé' nawedding engka sala-salanna.

⁷ Rékko séddié tau makkasuwiyangeng sikaju bimbala, harusu'i natiwi lao ri Kémana Puwangnge.

⁸ Kuwaniro harusu napalénne limanna ri tompo ulunna iyaro bimbala'é nainappa nagéré ri yolona Kémaé. Nainappa imangngé harusu mabbolorengngi iyaro dara bimbala'é ri iya eppa benrénna mézbaé.

⁹ Untu' akkarobangeng pappasidamé lao ri Puwangnge, harusu'i imangngé makkasuwiyangengngi sining bagiyangngéweé polé ri bimbala'éro: lunra'na, sininna ikko'na iya mallunra'é sibawa rirette'i ri seddéna buku lekke'na, lunra' iya dokoéngngi lise babuwana,

¹⁰ ginjalna sibawa lunra'na enrengngé bagiyang kaminang makessingngé polé ri atinna.

¹¹ Imang iya majjamaé harusu'i natunu manenro ri yasé'na mézbaé untu' akkarobangeng inanré lao ri Puwangnge.

¹² Rékko iya riyakkasuwiyangengngé sikaju bémbé, tau iya makkasuwiyangengngéngngi harusu'i natiwi ri Kémana Puwangnge.

¹³ Kuwaniro harusu napalénne limanna ri tompo ulunna bémbé'éro nainappa nagéré ri yolona Kémaé. Harusu'i imangngé mabbolorengngi iyaro dara olokolo'é ri iya eppa benrénna mézbaé.

¹⁴ Untu' akkarobangeng inanré ri Puwangnge, harusu'i nakkasuwiyangeng imangngé sining bagiyangngéwé polé ri bémbé'éro: lunra' iya dokoéngngi lise babuwana,

¹⁵ ginjalna sibawa lunra'na enrengngé bagiyang kaminang makessingngé polé ri atinna.

¹⁶ Imang iya majjamaé harusu tunu manengngi iyaro ri yasé'na mézbaé. Baunna iyaro akkarobangngé pésennangiwi atinna Puwangnge. Sininna lunra'na iyaro olokolo'é untu' Puwangnge.

¹⁷ Tau Israélié dé' sises-siseng nawedding manré lunra iyaré'ga dara. Iyaro peraturangngé untu' mannennungeng sibawa harusu'i naturusi tungke' tau Israélié kégi-kégi monro.