AMOS 8 - KITTA KAREBA MADECENG

Pakkitang passalenna baka buwa-buwaé

¹ Lolongekka séuwa pakkitassi polé ri Puwang Iya Pommatanré. Mitaka séddi baka mallise buwa iya matasa'é.

² Makkutanai Puwangnge, “Aga muwita, Amos?” Mappébalika, “Séddi baka iya mallise'é buwa-buwa iya matasa'é.” Makkedai Puwangnge, “Matasa'ni wettunna untu' umma'-Ku Israélié. Dé'na Upinrai rancana-Ku sibawa pasti uhukkungngi matu mennang.

³ Iyaro essoé élok-kélongngé ri saorajaé mancaji teriwi matu. Kégi-kégi tattale'-tale'i matu ujué iya puraé riyabbéyang sibawa mammekko-mekko.”

Rihukkunna Israélié

⁴ Engkalingai éh iko iya tenre'éngngi tau kasiyasié ri wanuwaéwé angkanna cappu mennang!

⁵ Makkedako lao ri alému, “Tenniya pato ittana esso-esso ramé-ramé. Macinnaki masitta-sitta balu'si gandotta, iyakiya iyaro ramé-ramé teppudu-pudu paja. Uppannapa maccappa esso Saba'é, kuwammengngi weddikki mammula mabbalu'si? Macinna senna'ki maccatu', pabengnguwang sibawa ola, nenniya macéko-céko sibawa timbangeng.

⁶ Gandong iya masolangngé weddingngi tabalu sibawa elli iya matanré. Sappaki tau kasiyasi iya dé'é naulléi wajai inrenna, namuni iyaro inrengngé banna elli sipasang lapikajé, nataelliwi aléna mancaji atatta.”

⁷ Puwang, Allataalana bangsa Israélié, purani mattanro, “Dé' sises-siseng Uwallupaiwi matu pangkaukenna mennang iya majaé.

⁸ Ténréi matu linoé, sibawa sininna tauwé masussa atiwi matu. Taggotangngi matu sininna wanuwaé sibawa tassompo-sompo pada-pada Salo Nil.

⁹ Engka matu wettunna Uwébbui mata essoé labu ri tangassoé sibawa mapettangngi linoé ri essoé. Iyya, Puwang Iya Pommatanré, pura mabbicara.

¹⁰ Upinrai matu ramé-ramému mancaji abbaratang, sibawa élok-kélommu mancaji mpating. Uwébbuko matu cukkuru'i gemme'mu sibawa paké kaing karung tanrang masara. Mancajiko matu pada-pada ambo' indo' iya teringiyéngngi amaténna ana' tungke'na. Iyaro essoé maccappa'i matu sibawa mappamessé senna.”

¹¹ Makkedai Puwang Iya Pommatanré, “Engka matu wettunna Upapolé abala akkadéreng ri wanuwaéwé. Malupui matu tauwé, iyakiya tenniya malupu lao ri inanré. Madekkai matu tauwé, iyakiya tenniya madekka lao ri uwai. Malupui sibawa madekkai mennang lao ri pasek-Ku.

¹² Solléi matu tauwé polé ri manorang lao ri yattang sibawa polé ri alau lao ri yajang untu' lolongengngi pasek-Ku, iyakiya dé' naruntu'i matu mennang.

¹³ Ri essoéro mala sining tau malolo iya madisid-disingngé marenne'i matu nasaba adekkang.

¹⁴ Sining tau iya mattanroé nasabbing barahalana Samaria sibawa makkeda, ‘Nasabbing déwatana bangsa Dan’, iyaré'ga ‘Nasabbing Déwatana Bérsyéba’ – menrungngi matu sibawa dé'na natokkong paimeng.”