ABBILANGENG 29 - KITTA KAREBA MADECENG

Pakkasuwiyang ri Pésta Taung Mabarué

¹ Ri tanggala séddinna uleng pitu harusu'ko pakangka addeppu-deppungeng untu' massompa, sibawa dé' nawedding pogau' pallaung iya matane'é. Ri essoéro sining tarompé'é harusu'i ripaoni.

² Akkasuwiyangenno lao ri Puwangnge akkarobang ritunu maddupa sikaju saping lai lolo, sikaju bimbala lai, sibawa pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangngé pésennangiwi atinna Puwangnge.

³ Akkasuwiyangeng tokko akkarobangeng ripatala iya riwajikengngé, maddupa labbu ricampuru minnya zaitun: tellukkilo untu' saping laié, duwakkilo untu' bimbala laié,

⁴ sibawa sikilo untu' tungke' ana' bimbala'é.

⁵ Akkasuwiyangeng tokko sikaju bémbé lai untu' akkarobangeng paddampengeng dosa. Nasibawang caraéro mupogau'i upacara palledda dosana umma'é.

⁶ Iyaro sining akkarobangengngé sinrupai pattamba ri akkarobangeng ritunué iya riyakkasuwiyangengngé silaong akkarobangeng ripatalana, ri tanggala séddinna tungke' uleng. Sinrupa towi pattamba ri akkarobangeng ritunu esso-essoé iya riyakkasuwiyangngé silaong sibawa akkarobangeng ripatalaé sibawa akkarobangeng uwai anggoro'na. Baunna iyaro akkarobangeng ritunué pésennangiwi atinna Puwangnge.

Pakkasuwiyang ri Esso Paddampengeng Dosaé

⁷ Ri tanggala seppulona uleng pitu harusu'ko pakangka addeppu-deppungeng untu' massompa. Iyaro essoé harusu'ko mappuwasa sibawa dé' nawedding mappallaung.

⁸ Akkasuwiyanno lao ri Puwangnge akkarobangeng ritunu maddupa sikaju saping lai lolo, sikaju bimbala lai sibawa pitukkaju ana' bimbala lai makkéumuru sitaung, tungke'-tungke' dé' gaga sala-salanna. Baunna iyaro akkarobangengngé pésennangiwi atinna Puwangnge.

⁹ Akkasuwiyanno akkarobangeng ripatala iya riwajikengngé, maddupa labbu ricampuru minnya zaitun: tellukkilo untu' saping lai, duwakkilo untu' bimbala lai,

¹⁰ sibawa sikilo untu' tungke' kajunna ana' bimbala'é.

¹¹ Akkasuwiyangeng tokko sikaju bémbé lai untu' upacara paddampengeng dosana umma'é, rilainnaé akkarobangeng paddampengeng dosaé sibawa akkarobangeng ritunu esso-essoé silaong akkarobangeng ripatalaé sibawa akkarobangeng uwai anggoro iya riyakkasuwiyangngé iyaro essoé.

Pakkasuwiyang ri Pésta Kalampang Daud-daungngé

¹² Ri tanggala seppulona lima uleng pitu harusu'ko pakangka addeppu-deppungeng untu' massompa, sibawa dé' nawedding pogau' jama-jamang iya matane'é. Pitungngesso ittana harusu'ko pakangka ramé-ramé untu' pakalebbii Puwangnge.

¹³ Ri esso mammulangngé akkasuwiyanno lao ri Puwangnge akkarobangeng ritunu maddupa seppulo tellu kajunna saping lai lolo, duwakkaju bimbala lai lolo, sibawa seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangengngé pésennangiwi atinna Puwangnge.

¹⁴ Akkasuwiyangeng tokko akkarobangeng ripatala iya riwajikengngé maddupa labbu ricampuru minnya zaitun: tellu kilo untu' tungke' saping laié, duwakkilo untu' tungke' kajunna ana' bimbala laié,

¹⁵ sibawa sikilo untu' tungke' kajunna ana' bimbala'é. Nasibawang iyaro akkarobangeng ripatalaé harusu towi riyakkasuwiyangeng akkarobangeng uwai anggoro iya riyapparelluwangngé.

¹⁶ Ri lainnaéro akkasuwiyangeng tono sikaju bémbé lai untu' akkarobangeng paddampengeng dosa. Iyaro akkarobangengngé selaku pattamba ri akkarobangeng ritunu esso-essoé silaong akkarobangeng ripatalaé sibawa akkarobangeng uwai anggoro'na.

¹⁷ Ri esso maduwaé akkasuwiyanno seppulo duwa kajunna saping lai lolo, duwakkaju bimbala lai, sibawa seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna.

^18-19 Akkasuwiyangngi silaong iyaro sininna akkarobangeng laingngé pada-pada iya riyapparelluwangngé untu' esso iya mammulangngé.

²⁰ Ri esso iya matellué akkasuwiyanno seppulo séddi kajunna saping lai lolo, duwakkaju bimbala lai, sibawa seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna.

^21-22 Akkasuwiyangngi silaong iyaro sininna akkarobangeng laingngé pada-pada iya riyapparelluwangngé untu' esso mammulangngé.

²³ Ri esso iya maeppaé akkasuwiyanno seppulo kajunna saping lai lolo, duwakkaju bimbala lai, sibawa seppulo eppa kajunna ana' bimbala lai makkéumuru sitaung, tungketungke iya dé'é gaga sala-salanna.

^24-25 Nasibawang iyaro akkasuwiyangngi sininna akkarobangeng laingngé pada-pada iya riyapparelluwangngé ri esso mammulangngé.

²⁶ Ri esso iya malimaé akkasuwiyanno aséra kajunna saping lai lolo, duwakkaju bimbala lai, sibawa seppulo eppa kajunna ana' bimbala lai iya makkéumuru sitaungngé, tungke'-tungke' iya dé'é gaga sala-salanna.

^27-28 Nasibawang iyaro akkasuwiyangeng toni sininna akkarobangeng laingngé pada-pada iya riyapparelluwangngé ri esso mammulangngé.

²⁹ Ri esso iya maennengngé akkasuwiyanno aruwa kajunna saping lai lolo, duwakkaju bimbala lai, seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna.

^30-31 Nasibawang iyaro akkasuwiyangeng toni sininna akkarobangeng laingngé pada-pada iya riyapparelluwangngé ri esso mammulangngé.

³² Ri esso iya mapitué akkasuwiyanno pitukkaju saping lai lolo, duwakkaju bimbala lai, seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna.

^33-34 Nasibawang iyaro akkasuwiyangeng toni sininna akkarobangeng laingngé pada-pada iya riyapparelluwangngé untu' esso iya mammulangngé.

³⁵ Ri esso iya maaruwaé harusu'ko pakangka addeppu-deppungeng untu' massompa sibawa dé' nawedding pogau' jama-jamang matane.

³⁶ Akkasuwiyanno lao ri Puwangnge akkarobangeng ritunu maddupa sikaju saping lai lolo, sikaju bimbala lai, sibawa pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangengngé pésennangiwi atinna Puwangnge.

^37-38 Nasibawang iyaro akkasuwiyangeng toni sininna akkarobangeng laingngé pada-pada iya riyapparelluwangngé untu' esso mammulangngé.

³⁹ Iyanaro sining peraturanna passalenna akkarobangeng ritunué, akkarobangeng ripatalaé, akkarobangeng uwai anggoro'é, enrengngé akkarobangeng pappasidamé iya harusu'é muwakkasuwiyangeng lao ri Puwangnge ri ramé-ramému iya puraé ripattentu. Iyaro sinina akkarobangengngé selaku pattamba ri sining akkarobangeng iya muwakkasuwiyangengngé untu' mappaleppe tinja iyaré'ga akkarobangeng cenning ati.

⁴⁰ Napalettu'ni Musa lao ri bangsa Israélié sininna séuwa-séuwaé iya napparéntangngé Puwangnge lao ri aléna.