ABBILANGENG 27 - KITTA KAREBA MADECENG

Ana'-ana' makkunrainna Zélaféhad

¹ Zélaféhad mappunnaiwi lima ana' makkunrai, iyanaritu Mahla, Noa, Hogla, Milka sibawa Tirza. Ambo'na Zélaféhad iyanaritu Héfer, ambo'na Héfer iyanaritu Giléad. Ambo'na Giléad iyanaritu Makhir, ambo'na Makhir iyanaritu Manasyé, sibawa ambo'na Manasyé iyanaritu Yusuf.

² Iya limaro ana'na Zélaféhad laowi mangolo ri Musa sibawa Imang Eléazar nenniya sining pamimpingngé enrengngé sininna umma iya mattengngangngé maddeppungeng ri seddéna sumpanna Kémana Puwangnge. Adanna mennang,

³ “Maténi ambo'ta ri padang kessi'é nadé' nappunnai ana' worowané. Tenniyai ana' gurunna Kora iya maronta'é lao ri Puwangnge. Iyaro ambo'ta matéi nasaba dosana muto.

⁴ Iyakiya magi naharusu teddéng asenna polé ri bangsa Israélié banna nasaba dé' nappunnai wija-wija worowané? Wérékki tana ammanareng silaong sumpulolona ambo'ta.”

⁵ Nanapalettu'ni Musa parakarana mennanro ri Puwangnge,

⁶ namakkedani Puwangnge lao ri Musa,

⁷ “Aga napowada iyaro ana'-ana'na Zélaféhad mémeng sitinaja. Jaji wérénni mennang tana ammanareng silaong sumpulolona ambo'na mennang. Iyaro manana Zélaféhad harusu'i ripanonno ri ana'-ana'na makkunraié.

⁸ Powadani lao ri bangsa Israélié makkedaé rékko séddié worowané maté nadé' nappunnai ana' worowané, tana manana harusu'i nappammanareng lao ri ana'na makkunraié.

⁹ Rékko dé' nappunnai ana' makkunrai, iyaro tana manana nappammanarengngi lao ri silessurenna worowané.

¹⁰ Rékko dé' nappunnai silessureng worowané, iyaro tanana untu' silessurenna ambo'na iya worowané.

¹¹ Rékko dé' nappunnai silessureng worowané, sibawa dé'to gaga silessureng worowanéna ambo'na, iyaro tanana mancajiwi appunnangenna sellaona iya kaminang maréppé'é ri appanna.” Iyaro attentuwangngé harusu'i napatoi tau Israélié selaku peraturang hukkung iya napparéntangngé Puwangnge naolai Musa.

Ripiléna Yosua selaku passulléna Musa

¹² Nakkeda Puwangnge lao ri Musa, “Enré'no ri Bulu Abarim, napolé kuwaro tironi wanuwa iya maéloé Uwéréngngi tau Israélié.

¹³ Rékko purani mutiro, matéko matu pada-pada kakamu Harun,

¹⁴ saba' ri padang kessi Zin iko sipadduwa pura méwai parénta-Ku. Wettunna ri Mériba sininna ra'ya'é mannoko-noko lao ri Iyya, dé' mumaélo pannessai akuwasak-Ku ri yolona mennang nasaba uwaiéro.” (Iyaro kajajiyangngé kajajiyangngi ri mata uwai Mériba ri Kadés, ri padang kessi Zin.)

¹⁵ Namassempajanna Musa,

¹⁶ “Oh, Puwang Allataala, iya mabbéré atuwong lao risininna iya tuwoé, uwéllauwi, jello'i séddi tau iya mullééngngi pimpingngi iyaé bangsaé;

¹⁷ séddi tau iya mullééngngi mancaji pallima wettunna mennang mammusu. Aja' muleppessangngi iyaé umma'-Mu pada-pada bimbala makkonrong iya dé'é nappunnai pakkampi.”

¹⁸ Nakkeda Puwangnge lao ri Musa, “Obbii Yosua, ana' Nun. Séddiwi tau iya maccaé. Palénne'i limammu ri tompo ulunna.

¹⁹ Suroi tettong ri yolona Imang Eléazar sibawa sininna umma'é. Ri yolona maneng mennang harusu'ko mappallebbangengngi makkedaé Yosua iyanaritu passullému.

²⁰ Abbéréyanni lao ri aléna sibagiyang polé ri akuwasammu, kuwammengngi umma Israélié turusiwi.

²¹ Harusu'i Yosua méllau tangnga polé ri Imang Eléazar, na Eléazar harusu makkutanangngi élo-Ku sibawa pakéi Urim sibawa Tumim. Nasibawang caraéro Eléazar pimpingngi Yosua sibawa sininna bangsa Israélié ri laleng sininna parakaraé iya naoloiyé.”

²² Napogau'ni Musa pada-pada iya riparéntangngéngngi ri Puwangnge. Nasuroni Yosua tettong ri yolona Imang Eléazar sibawa sininna umma'é.

²³ Nanapalénne'ni limanna ri tompo ulunna Yosua sibawa mappallebbangengngi makkedaé Yosua iyanaritu passulléna, pada-pada iya ripowadangngéngngi ri Puwangnge.