ABBILANGENG 26 - KITTA KAREBA MADECENG

Abbilangeng mabbékkaduwaé

¹ Pajanana abalaéro, makkedani Puwangnge lao ri Musa sibawa Eléazar, ana'na Imang Harun,

² “Harusu'ko bilang manengngi umma Israélié situru kaluwargana tungke'-tungke'. Sininna worowané iya makkéumuru'é duwappulo taung liyasé iya mullééngngi mancaji tentara, harusu'i riyoki.”

^3-4 Napogau'ni Musa sibawa Eléazar iyaro paréntaé. Naobbini mennang sininna tau worowané iya makkéumuru'é duwappulo taung liyasé sibawa paddeppungengngi mennang ri tanéténa Moab, ri liwenna Salo Yordan, seddéna kota Yérikho. Iyanaé sining tau Israél iya massué polé ri Maséré:

⁵ Polé ri suku Rubén, ana' macowana Yakub: appanna Hénokh, Palu,

⁶ Hézron sibawa Karmi.

⁷ Tau worowané ri laleng sining appangngéro jumellana 43.730 tau.

⁸ Ana'na Palu iyanaritu Eliab,

⁹ na ana'-ana'na Eliab iyanaritu Némuél, Datan sibawa Abiram. Iyaro Datan sibawa Abiram purani ripilé ri umma'é, iyakiya masséddiwi sibawa sining tau maccowériyéngngi Kora untu' méwai Musa sibawa Harun nenniya méwai Puwangnge.

¹⁰ Namapuwé' tanaé sibawa memme'i mennang angkanna maté silaong Kora nenniya sining tau maccowériyéngngi wettunna apié paccappui 250 tau worowané. Iyaro gau'é mancaji papparéngngerangngi ri tau Israélié.

¹¹ Iyakiya ana'-ana'na Kora dé' naccowé riyuno.

¹² Polé ri suku Siméon: Appanna Némuél, Yamin, Yakhin,

¹³ Zérah sibawa Saul.

¹⁴ Tau worowané ri laleng sining appangngéro jumellana 22.200 tau.

¹⁵ Polé ri suku Gad: Appanna Zéfon, Hagi, Syuni,

¹⁶ Ozni, Eri,

¹⁷ Arod sibawa Aréli.

¹⁸ Tau worowané ri laleng sining appangngéro jumellana 40.500 tau.

^19-21 Polé ri suku Yéhuda: Appanna Syéla, Pérés, Zérah, Hézron sibawa Hamul. Duwa ana'na Yéhuda, iyanaritu Er sibawa Onan, maténi ri tana Kanaan.

²² Tau worowané ri laleng sining appangngéro jumellana 76.500 tau.

²³ Polé ri suku Isakhar: Appanna Tola, Pua,

²⁴ Yasub sibawa Simron.

²⁵ Tau worowané ri laleng sining appangngéro jumellana 64.300 tau.

²⁶ Polé ri suku Zébulon: Appanna Séréd, Elon sibawa Yahleel.

²⁷ Tau worowané ri laleng sining appangngéro jumellana 60.500 tau.

²⁸ Polé ri wija-wija Yusuf, iya mappunnaiyé duwa ana' worowané: suku Manasyé sibawa suku Efraim.

²⁹ Polé ri suku Manasyé: Makhir, ana' Manasyé, iyanaritu ambo'na Giléad; na sining appang iya mangoloéwé iyanaritu wijanna Giléad:

³⁰ Appang Iézer, Hélék,

³¹ Asriél, Sékhem,

³² Sémida sibawa Héfer.

³³ Zélaféhad ana' Héfer dé' nappunnai ana' worowané, banna ana' makkunarai. Ana'na mennang iyanaritu Mahla, Noa, Hogla, Milka sibawa Tirza.

³⁴ Tau worowané ri laleng sining appangngéro jumellana 52.700 tau.

³⁵ Polé ri suku Efraim: Appanna Sutéla, Békher sibawa Tahan.

³⁶ Appanna Eran iyanaritu wija-wija Sutéla.

³⁷ Tau worowané ri laleng sining appangngéro jumellana 32.500 tau. Iyanaro sining appang wija-wija Yusuf.

³⁸ Polé ri suku Bényamin: Appanna Béla, Asybél, Ahiram,

³⁹ Séfufam sibawa Hufam.

⁴⁰ Appanna Aréd sibawa Naaman iyanaritu wija-wija Béla.

⁴¹ Tau worowané ri laleng sining appangngéro jumellana 45.600 tau.

⁴² Polé ri suku Dan: Appanna Suham.

⁴³ Tau worowané ri laleng appangngéro jumellana 64.400 tau.

⁴⁴ Polé ri suku Asyer: Appanna Yimna, Yiswi sibawa Beria.

⁴⁵ Appanna Héber sibawa Malkiél iyanaritu wijanna Beria.

⁴⁶ Asyer mappunaiwi séddi ana' makkunrai iya riyasengngé Séra.

⁴⁷ Tau worowané ri laleng sining appangngéro jumellana 53.400 tau.

⁴⁸ Polé ri suku Naftali: Appanna Yahzeel, Guni,

⁴⁹ Yézer sibawa Syilem.

⁵⁰ Tau worowané ri laleng sining appangngéro jumellana 45.400 tau.

⁵¹ Sininna tau worowané Israélié jumellana 601.730 tau.

⁵² Makkedani Puwangnge lao ri Musa,

⁵³ “Bagéngengngi iyaro tanaé lao ri suku-suku bangsa Israélié situru égana tungke'-tungke' suku.

^54-56 Pogau'i iyaro sibawa cara loteréi. Lao ri suku iya battowaé harusu'i muwéréng bagéyang iya battowaé, sibawa lao ri suku iya baiccu'é, bagiyang iya baiccu'é.”

⁵⁷ Suku Léwié poléi ri appanna Gérson, Kéhat sibawa Mérari.

⁵⁸ Ri laleng wija-wijanna mennang muttama'ni appanna Libni, Hébron, Mahli, Musi sibawa Kora. Kéhat iyanaritu ambo'na Amram.

⁵⁹ Amram kawingngi sibawa Yokhébéd, ana' Léwi. Iyaro Yokébéd jajiwi ri Maséré. Amram sibawa Yokhébéd mappunnaiwi duwa ana' worowané: Harun sibawa Musa, enrengngé séddi ana' makkunrai, Miryam.

⁶⁰ Harun mappunnaiwi eppa ana' worowané: Nadab, Abihu, Eléazar sibawa Itamar.

⁶¹ Nadab sibawa Abihu matéi wettunna mennang makkasuwiyangengngi api iya dé'é napuwéloi Allataala.

⁶² Tau worowané polé ri suku Léwi iya makkéumuru'é siuleng liyasé jumellana 23.000 tau. Ricata'i mennang mallaing polé risining tau sibangsana, nasaba dé' nalolongeng mennang tana mana ri Israélié.

⁶³ Iyanaro daftar iya naébbué Musa sibawa Imang Eléazar passalenna sining appangngé ri Israélié wettunna mennang mabbilang ri tanéténa Moab ri liwenna Salo Yordan seddéna kota Yérikho.

⁶⁴ Polé risining tau iya naokié riyolo Musa sibawa Harun ri padang kessi Sinai, dé'na gaga muwi séddi tau iya tuwoé mupa.

⁶⁵ Puwangnge pura powadai makkedaé maté manengngi matu mennang ri padang kessi'é. Na mémeng maté manengngi mennang, sangadinna Kaléb ana' Yéfune sibawa Yosua ana' Nun.