ABBILANGENG 25 - KITTA KAREBA MADECENG

Bangsa Israélié ri Bulu Péor

¹ Wettunna bangsa Israélié monro ri Lompo Sitim, sining tau worowanéna mennang mammulani malaweng sibawa sining makkunrai Moab iya engkaé kuwaro.

² Iyaro sining makkunraié naérai mennang lao ri pésta-pésta akkarobangngé untu' pakalebbii déwatana mennang. Maccowé toni tau Israélié manréi iyaro akkarobangngé sibawa sompai déwatana tau Moab-é.

³ Nasaba nasompai Baal tau Israélié ri Péor, macaini Puwangnge lao ri mennang sibawa makkeda lao ri Musa,

⁴ “Tikkengngi sininna tau iya kapalaiyéngngi bangsaéro sibawa unoi mennang ri yolona tau maégaé selaku mupajoppana parénta-Ku, kuwammengngi dé'na umacai lao ri bangsaéro.”

⁵ Nanakkedana Musa lao risining hakinna Israélié, “Iko tungke'-tungke' harusu mpunoi sininna tauwé ri laleng sukummu iya puraé sompai Baal ri Péor.”

⁶ Wettunna Musa sibawa sininna umma'é mattengngang mpating ri sumpang Kémana Puwangnge, naitani mennang séddi tau Israél tiwi séddi makkunrai Midian muttama ri laleng kémana.

⁷ Wettunna Pinéhas, ana'na Eléazar, eppona Imang Harun mitai gau'éro, tokkonni nanasalaiwi addeppu-deppungengngéro. Malani séddi bessi

⁸ nanalellungngi iyaro worowané sibawa makkunraié muttama ri laleng kémaéro. Nagajanni iya duwa tauwéro sibawa bessiéro namappésauna abala iya mattengngangngé majjallo ri Israéliéro.

⁹ Iyakiya iya matéénna engkana 24.000 tau.

¹⁰ Namakkeda Puwangnge lao ri Musa,

¹¹ “Pinéhas ana' Eléazar, eppona Imang Harun, mapatoi méwaiwi alebbirek-Ku ri tengnga-tengngana tau Israélié, angkanna nonno cai-Ku sibawa dé'na Ujaji pabbinasai bangsaéro.

¹² Jaji powadanni Pinéhas makkedaé mébbuka séuwa assijancing sibawa aléna.

¹³ Aléna sibawa wija-wijanna Upattette selaku imang untu' mannennungeng, nasaba makkuwamani patona pura méwai-Ka, Allataalana, sibawa pura pakangka pappasidamé untu' dosana tau Israélié.”

¹⁴ Tau Israél iya riyunoé silaong makkunrai Midiangngéro asenna Zimri, ana' Salu, kapalanai séuwa kaluwarga polé ri suku Siméon.

¹⁵ Iyaro makkunraié riyasengngi Kozbi; ana'nai Zur, séddiwi kapala appang ri Midian.

¹⁶ Puwangnge mabbéréyangngi iyaé paréntaé lao ri Musa,

¹⁷ “Ewai tau Midiangngé, sibawa paccappui mennang

¹⁸ nasaba ja iya puraé narancana mennang lao ri iko ri Péor, sibawa nasaba Kozbi ana'nai séddi kapala appang ri Midian. Iyaro Kozbi makkunrai iya maté riyuno wettunna kajajiyang abalaé nasaba kajajiyangngé ri Péor.”