ABBILANGENG 24 - KITTA KAREBA MADECENG

¹ Naissenni Biléam makkekkuwangngé makkedaé napuwéloi Allataala barakkakiwi bangsa Israélié. Rimakkuwannanaro dé' nalao sappa tanra-tanrang pada-pada iya napogau'é ri yolonaé. Makkitai Biléam mattuju ri padang kessi'é,

² sibawa mitai bangsa Israélié iya mattengngangngé makkéma makkonro-konrong situru suku-suku bangsana. Narikuwasaina Biléam ri Rohna Allataala,

³ nanapowadai iyaé botoé, “Iyanaé pasenna Biléam ana' Béor, ada-adanna séddié tau pakkita-kita

⁴ iya puraé méngkalingai ada-adanna Allataala sibawa mitai pappaitana polé ri Iya Pommakuwasaé, rebbai, iyakiya sibawa mata tattimpa.

⁵ Temmaka kessinna sining kémamu éh Yakub, sibawa sining onrong muwonroiyé, éh Israélié!

⁶ Pada-pada lompo malowang iya mallebba'é, iyaré'ga tammeng ri wiring saloé; pada-pada pong gaharu iya natanengngé Puwangnge, iyaré'ga pong aras ri wiring saloé.

⁷ Lolongengngi mennang uwai bosi iya maonaé, lolongengngi uwai maéga pallengnge'é. Kalabbai matu arunna, nacau Agag, sibawa akkarungenna ripakarajai matu.

⁸ Allatalala tiwii mennang massu polé ri Maséré, pada-pada banténg liyaé mammusurengngi mennang. Bangsa-banga balié cappu matu naemme, Naancuru'i buku-bukunna mennang, sibawa Napoloi pana-panana mennang.

⁹ Iyaro bangsaé pada-padai singa laié sibawa singa komba'é, iya makkanroppangngé sibawa léwu. Nigana barani teddui? Tennapodo tau iya barakkakiyéngngékko ribarakkakiwi, sibawa tau iya tanroiyéngngékko ritanroiwi.”

¹⁰ Namacaina Balak pamare'i pajjagguru'na namakkeda lao ri Biléam, “Uwobbiko untu' tanroiwi sining balikku, iyakiya mala mubarakkakiwi mennang narapi wékkatellu.

¹¹ Makkekkuwangngé weddinno lao, lisu ri bolamu! Ujancingekko saro, iyakiya dé' napalaloko Puwangnge tarimai iyaro saroé.”

¹² Nappébali Biléam, “Dé'ga napura upowada lao risining surona Puwakku makkedaé

¹³ namuni nawéréng manekka Puwakku sininna péra'é sibawa ulaweng iya engkaé ri saorajana Puwakku, dé' naweddikka majjalékkaiwi paréntana Puwangnge sibawa pogau'i séuwaé siélo-élo atikku? Banna weddikka powadai aga iya nassurowangngé Puwangnge upowada.”

Sining boto paccappurengngé

¹⁴ Nakkeda Biléam lao ri Balak, “Maélona lisu makkekkuwangngé ri bangsaku. Iyakiya ri wettu dé'napa ulao, makessinni upaissengiwi Puwakku passalenna aga iya napogau'é matu bangsa Israélié lao ri bangsana Puwakku ri munri.”

¹⁵ Nanapowadani Biléam iyaé botoé, “Iyanaé pasenna Biléam, ana' Béor; ada-adanna séddié tau pakkita-kita

¹⁶ iya puraé méngkalingai ada-adanna Allataala, sibawa wedding missengngi Iya Pommatanré; iya mitaéngngi pappaitana polé ri Iya Pommakuwasaé rebbai iyakiya sibawa mata tattimpa.

¹⁷ Uwitai, iyakiya tenniya makkekkuwangngé; utiroi, iyakiya polé mabéla. Séddiwi arung polé ri Israélié assalenna, poléi matu pada-pada wéttowing mattappaé. Sining pamimpinna Moab naancuru'i matu naancuru'i matu bangsa Sét.

¹⁸ Tanana Edom natudangiwi matu balinna, Iyakiya Israélié pogau'i pangkaukeng baranié.

¹⁹ Polé ri Yakub mompoi matu séddi tau panguwasa, iya pabbinasaéngngi sining balinna.”

²⁰ Nainappa ri laleng pappaitaéro naitai Biléam sining tau Amalé'é. Nanapowadani iyaé botoé, “Polé risininna bangsaé ri linoé, Amalé' kaminang makuwasa. Iyakiya iyaro bangsaé paccappurenna, lennye towi matu untu' mannennungeng.”

²¹ Ri laleng pappaitaéro naitai Biléam wija-wijanna Kain, nanapowadani iyaé botoé, “Onrong muwonroiyé mémeng masse'i, pada-pada sarangngé ri tompo'na bulu-bulu batué.

²² Iyakiya iko tau Kénié, ripabbinasako matu, dé'na namaitta naakkako Asyur selaku tawanang.”

²³ Nainappa napowadato Biléam iyaé botoé, “Cilaka! Niga tuwo, rékko Allataala pogau'i gau'éro?

²⁴ Iyakiya polé ri Siprus poléi matu sipasukang kappala, nacaui matu mennang Asyur sibawa Héber, nainappa binasato matu iyaro pasukang kappala'é.”

²⁵ Nainappa sadiya-sadiya Biléam maélo lisu ri onrong naonroiyé, na Balak loa toni.