ABBILANGENG 21 - KITTA KAREBA MADECENG

Nacauna tau Kanaangngé

¹ Arad iyanaritu séddiwi kota ri bagiyang yattanna wanuwa Kanaan. Wettunna naéngkalinga arunna kotaéro makkedaé poléni tau Israélié lalo ri laleng Atarim, laoni gasai mennang sibawa tawangngi siyagangngaré tau ri yelle'na mennang.

² Nainappa mattinja tau Israélié makkuwaé lao ri Puwangnge, “Rékko muwérékki apakalang lao ri bangsaéro, maéloki paccappui mennang sibawa kota-kotana.”

³ Natarimani Puwangnge paréllaunna tau Israélié sibawa tulungngi mennang caui tau Kanaangngé. Nanapaccappuni tau Israélié iyaro sining tau Kanaangngé silaong kota-kotana mennang, nainappa naseng iyaro onrongngé Horma.

Ula polé ri tembagaé

⁴ Nainappa nasalai tau Israélié Bulu Hor, nanalalo ri laleng iya mattujué ri Séppang Akaba, untu' mattulilingiwi daéra Edom. Iyakiya ri tengnga laleng, cappuni asabbarakenna iyaro bangsaé,

⁵ namannoko-noko lao ri Allataala sibawa Musa. Makkedai mennang, “Magi mutiwiki massu polé ri Maséré? Aga untu' mpunoki ri padang kessi'éwé? Kuwaé dé' gaga inanré, sibawa dé'to gaga uwai. Majani pénedditta sibawa inanré iya makawaéwé!”

⁶ Nanapapoléna Puwangnge sining ula mamosoé ri tengnga-tengngana bangsaéro. Maéga tau Israél maté napitto sining ulaéro.

⁷ Nanapoléna iyaro bangsaé mangolo ri Musa sibawa makkeda, “Madosani nasaba mannoko'-noko'ki lao ri Puwangnge sibawa iko. Assempajanno lao ri Puwangnge kuwammengngi naripabélai iyaé sining ulaé polé ri idi.” Nanassempajangenni Musa iyaro bangsaé.

⁸ Nainappa Puwangnge suroi Musa mébbu sikaju ula tembaga nanataroi ri yasé'na séddié alliri. Tungke' tau iya napitto'é ula, majjappai matu rékko naitai ula polé ri tembagaéro.

⁹ Nanaébbuna Musa ula polé ri tembagaé nanataroi ri yasé'na séddié alliri. Tungke' tau iya napitto'é ula, wedding majjappa rékko makkitai lao ri ulaéro.

Polé ri Bulu Hor lao ri Lompo Moab

¹⁰ Joppani tau Israélié, nainappa makkéma ri kota Obot.

¹¹ Nasalainnana iyaro onrongngé, makkémani mennang ri ruttungenna Abarim ri padang kessi'é ri seddé alauna daéra Moab.

¹² Nainappa mennang makkéma ri Lompo Zéréd.

¹³ Polé kuwaro joppasi mennang namakkéma ri liwenna Salo Arnon, ri padang kessi iya mallebba'é ri daérana tau Amorié. Iyaro Salo Arnon mancaji pakkasésénnai daérana tau Moab-é sibawa daérana tau Amorié.

¹⁴ Iyanaro saba'na ri laleng ‘Kitta Musuna Puwangnge’ tarokii: “… Désa Wahéb, ri daéra Sufa sibawa lompo'-lompo'na; Salo Arnon

¹⁵ sibawa émpenna lompo'-lompo'na iya mallebba'é lettu ri désa Ar sibawa mattuju ri pakkasésénna daérana tau Moab-é.”

¹⁶ Polé kuwaro laoni mennang ri onrong iya riyasengngé Beer, bettuwanna sining bujung. Kuwaniro pura Puwangnge makkeda lao ri Musa, “Suroi umma'é maddeppungeng; maélo-Ka mpéréngngi mennang uwai.”

¹⁷ Iyaro wettué napuwélonni bangsa Israélié iyaé élongngé, “Eh sining bujung, abborowanni uwaimu, maéloki duppaiwi sibawa élong.

¹⁸ Bujung iya nakaliyé sining tomariyoloé sibawa sining pamimping bangsaé nakaliwi sibawa tekkeng appimpingenna sibawa tekkeng tanrang akuwasanna mennang.” Polé ri padang kessi'é létté'i mennang ri Matana,

¹⁹ sibawa polé kuwaro lao ri Nahaliél, nainappa lao ri Bamot,

²⁰ nainappa lao ri lompo'na daérana tau Moab-é, ri yawana coppo'na Bulu Pisga iya mangoloé ri padang kessi'é.

Nacauna arung Sihon sibawa arung Og

²¹ Nainappa kiring sining suro bangsa Israélié lao ri Sihon, arunna Amori untu' palettu'i pasengngéwé,

²² “Palaloki molai wanuwanna Puwakku. Idi sibawa olokolo'ta dé' tamaélo léssé polé ri lalengngé sibawa dé' tamaélo muttama risining dare'é iyaré'ga sining palla anggoro'é iyaré'ga ménung uwai polé risining bujungngé. Dé' tamaélo léssé polé ri watattanaé narapi massuki polé ri daérata Puwakku.”

²³ Iyakiya Arung Sihon dé' namaélo palaloi sining tau Israélié molai wanuwanna. Napaddeppungengngi pasukanna nainappa lao ri Yahas ri padang kessi'é sibawa gasai tau Israélié kuwaro.

²⁴ Iyakiya ri laleng ammusurengngéro maéga tentarana tau Amorié riyuno ri tau Israélié. Nainappa tau Israélié tudangiwi daérana mennang polé ri Salo Arnon lettu ri Salo Yabok, iyanaritu pakkasésénna daérana tau Amongngé, saba' iyaro pakkaséséngngé mawatang senna attahangenna.

²⁵ Nanallalengiro nasittai manengngi tau Israélié kotana tau Amorié, muttama'ni Hésybon sibawa sininna kota baiccu'é ri seddéna, nainappa mattette'ni mennang kuwaro.

²⁶ Hésybon iyanaritu ibukotana Arung Sihon. Engka naengka nammusu méwai arung Moab sibawa sittaiwi daérana narapi sibbéla Salo Arnon.

²⁷ Iyanaro saba'na nakkeda tau maccaé makkuwaé, “Laono ri Hésybon, ri kotana Arung Sihon. Macinnaki mitai iyaé kotaéwé ripatettong sibawa ripédécéngi paimeng.

²⁸ Engka séuwa wettu polé ri kotaéwé mallurui pasukanna Sihon pada apié. Iya mancuru'éngngi kota Ar ri Moab, sibawa makuwasaiwi bulu-bulué sillampé Arnon.

²⁹ Eh bangsa Moab, macilakako! Passompa Kamos-é, binasako! Naleppessakko déwatamu mancaji tomanyingkiri, makkunraimmu mancaji tawananna arung Amorié.

³⁰ Iyakiya makkekkuwangngé binasani wija-wijanna mennang, puppu laleng polé ri Hésybon lao ri Dibon, polé ri Nasyum lao ri Nofah seddéna Medéba.”

³¹ Nanallalengiro bangsa Israélié mattette'i ri daérana tau Amorié.

³² Nainappa Musa suroi sining tauwé lao sappa laleng iya kaminang makessingngé untu' gasai kota Yaézer. Nanasittaini tau Israélié iyaro kotaé enrengngé kota-kota baiccu'na ri seddéna sibawa paddésu'i tau Amorié iya monroé kuwaro.

³³ Purairo bélo'ni tau Israélié sibawa joppa ri laleng iya mattujué lao ri Basan. Arung Og polé ri Basan malluruni sibawa pasukanna untu' gasai tau Israélié ri kota Edréi.

³⁴ Makkedani Puwangnge lao ri Musa, “Aja' mumétau ri aléna. Maéloka mpérékko apakalang. Mucaui matu, sininna ra'ya'na sibawa wanuwanna. Gaukenni pada-pada pura mugaukengngéngngi Arung Sihon iya mapparéntaé ri Hésybon.”

³⁵ Nacauni tau Israélié Arung Og sibawa naunona, ana'-ana'na sibawa sininna ra'ya'na; dé' gaga monro. Nainappa natudangi mennang wanuwaéro.