ABBILANGENG 17 - KITTA KAREBA MADECENG

Tekkenna Harun

¹ Makkedai Puwangnge lao ri Musa,

² “Suroi tau Israélié mpérékko seppulo duwa tekkeng, tungke' suku séddi tekkeng, iya harusu'é nabbéréyang pamimping sukué. Okii asenna tungke' pamimping sukuéro ri tekkenna,

³ na asenna Harun ri tekkenna suku Léwié. Untu' tungke' pamimping suku harusu engka séddi tekkeng.

⁴ Tiwii iyaro sining tekkengngé ri Kéma-Ku namupalénne'i ri yolona Petti Assijancingngé, onrok-Ku biyasa siruntu sibawa iko.

⁵ Tekkenna tau iya Upilé, cura'i matu. Nasibawang caraéro Upajjappai matu addarékénna sining tau iya matteru-terué mannoko-noko lao ri iko.”

⁶ Iyaro gau'é napalettu'ni Musa lao ri tau Israélié. Nainappa sining pamimpinna mennang mabbéréyangngi lao ri Musa séddi tekkeng untu' tungke' pamimping suku. Iya manenna engka seppulo duwa peppa'na, na tekkenna Harun engkai ri yelle'na.

⁷ Nanataroni Musa iyaro sining tekkengngé ri laleng Kémana Puwangnge ri yolona Petti Assijancingngé.

⁸ Pappa bajanana, wettunna Musa muttama ri laleng Kémana Puwangnge, naitani makkedaé tekkenna Harun iyanaritu tekkenna suku Léwié, cura'ni. Iyaro tekkengngé mpuce'ni, mpunga sibawa powassélé buwa atapang iya macowaénna!

⁹ Nalani Musa sininna tekkengngéro nainappa nappaitang lao ri tau Israélié. Naitani mennang aga iya puraé kajajiyang, nainappa tungke' pamimping malai tekkenna paimeng.

¹⁰ Namakkeda Puwangnge lao ri Musa, “Palénne'ni tekekenna Harun paimeng ri yolona Petti Assijancingngé. Iyaro tekkengngé harusu'i ritaro selaku papparéngngerang lao ri tau Israélié iya pojiyéngngi maronta'ro makkedaé matéi matu mennang rékko dé' nappésau mannoko-noko.”

¹¹ Napogau'ni Musa aga napparéntang Puwangnge.

¹² Nainappa makkeda tau Israélié lao ri Musa, “Rékko makkuwaitu, cilakani idi'é! Cappuki matu!

¹³ Rékko tau iya maddeppériyéngngi Kémana Puwangnge harusu'i maté, dé'na gaga amménasang ri idi!”