ABBILANGENG 15 - KITTA KAREBA MADECENG

Peraturanna passalenna akkarobangngé

¹ Puwangnge mpéréngngi Musa

² iyaé sining peraturangngé iya harusu'é napogau' bangsa Israélié ri wanuwa iya maéloé nabbéréyang Puwangnge lao ri mennang.

³ Untu' akkarobangeng ritunué iyaré'ga akkarobangeng pappaleppe tinja'é iyaré'ga akkarobangeng cenning atié iyaré'ga akkarobangeng ramé-ramé biyasaé, weddikko makkasuwiyang lao ri Puwangnge: saping lai, bimbala lai, bimbala iyaré'ga bémbé. Baunna iyaro sining akkarobangngé pésennangiwi atinna Puwangnge.

^4-5 Nigi-nigi makkasuwiyang bimbala iyaré'ga bémbé untu' akkarobangeng ritunu lao ri Puwangnge, harusu towi tiwi silaong tungke' kajunna iyaro olokolo'é, sikilo labbu ricampuru sibawa sibang minnya zaitun untu' akkarobangeng ripatalaé, sibawato sibang uwai anggoro.

⁶ Rékko iyaro riyakkarobangngé sikajui bimbala lai, harusu towi riyakkasuwiyangeng duwakkilo labbu ricampuru sibawa séddi sitengnga bang minnya zaitun untu' akkarobangeng ripatalaé,

⁷ sibawa séddi sitengnga bang uwai anggoro. Baunna iyaro akkarobangngé pésennangiwi atinna Puwangnge.

⁸ Rékko iyaro riyakkarobangngé sikajui saping lai untu' akkarobangeng ritunu iyaré'ga akkarobangeng pappaleppe tinja iyaré'ga akkarobangeng pappasidamé,

⁹ harusu towi riyakkasuwiyangeng tellu kilo labbu ricampuru sibawa duwabbang minnya zaitun untu' akkarobangeng ripatalaé,

¹⁰ sibawa duwabbang uwai anggoro. Baunna iyaro akkarobangngé pésennangiwi atinna Puwangnge.

¹¹ Iyanaro harusu riyakkarobangeng sibawangngi tungke' kajunna saping laié, bimbala laié, bimbala'é iyaré'ga bémbé'é.

¹² Rékko iyaro riyakkasuwiyangngé lebbi sikaju olokolo, pakkasuwiyang labbu'é, minnya'é sibawa uwai anggoro'éro harusu towi ritambai situru assibandingenna.

¹³ Iyaro gau'é harusu'i napogau' tungke' tau Israélié wettunna makkasuwiyang akkarobang. Iyaro bau akkarobangngé pésennangiwi atinna Puwangnge.

¹⁴ Séddié tau laing iya monroé ri yelle'mu, muwi untu' cinampe iyaré'ga untu' mattette, harusu'i naturusi sininna atorengngéro rékko makkasuwiyangngi akkarobangeng ripatalaé iya baunnaé pésennangiwi atinna Puwangnge.

^15-16 Sininna hukkungngé sibawa peraturangngé iyanaritu padai untu' iko sibawa untu' tau laing iya monroé ri yelle'mu, saba' iko sibawa mennang iyanaritu padai ri yolona Puwangnge. Na iyaro gau'é kajajiyangngi untu' mannennungeng.

¹⁷ Puwangnge mpéréngngi Musa

¹⁸ iyaé sining peraturangngé iya harusu'é napogau' bangsa Israélié ri wanuwa iya maéloé nabbéréyang Puwangnge lao ri mennang.

¹⁹ Rékko mappammulani muwanré aga napowassélé iyaro wanuwaé, harusu'i mupallaing sibagiyang untu' pakkasuwiyang iya ripallaingngé untu' Puwangnge.

²⁰ Rékko mattunu rotiko polé ri gandong iya bunge' muwéngngalaé, iyaro rotié harusu'i muwakkasuwiyangeng selaku akkarobangeng iya ripallaingngé lao ri Puwangnge. Carana makkasuwiyangengngi padai carana makkasuwiyangengngi gandong iya bunge' rilélué.

²¹ Untu' mannennungeng tungke' roti iya polé ri gandong iya bunge' riyéngngalaéro harusu'i muwabbéréyang selaku pakkasuwiyang iya ripallaingngé lao ri Puwangnge.

^22-24 Rékko dé' muwattungkaiwi mallupaiwi sala séddinna ri yelle'na peraturang iya puraé nabbéréyang Puwangnge lao ri Musa, mappammulai ri esso nabbéréyanna Puwangnge iyaro peraturangngé sibawa mattteru massossoreng, na iyaro asalangngé napogau'i nasaba dé' naissengngi umma'é peraturangngé, sininna umma'é harusu'i makkasuwiyangeng sikaju saping lai untu' akkarobangeng ritunu. Nasibawang iyaro harusu'i riyakkasuwiyangeng akkarobangeng ripatalaé nenniya uwai anggoro'é pada-pada iya ripattentué. Baunna iyaro akkarobangngé pésennangiwi atinna Puwangnge. Ri lainnaéro harusu'i riyakkasuwiyangeng sikaju bimbala lai untu' akkarobangeng paddampengeng dosaé.

²⁵ Nainappa harusu'i napogau' imangngé upacara paddampengeng dosaé untu' umma'é. Nariyaddampengeng matu mennang nasaba iyaro asalangngé dé' nattungkaiwi pogau'i, sibawa nasaba purani mennang tiwi akkarobangeng paddampengeng dosa nenniya akkarobangeng ritunu lao ri Puwangnge.

²⁶ Sininna umma Israélié sibawa tau laing iya monroé ri yelle'na mennang riyaddampengengngi matu, nasaba iya manenna nakennai asalang iya dé'é nattungkairo.

²⁷ Rékko séddi tau bawang dé' nattungkaiwi madosa, harusu'i makkasuwiyangeng sikaju bémbé komba iya makkéumuru sitaungngé untu' akkarobangeng paddampengeng dosa.

²⁸ Harusu'i imangngé pogau' upacara paddampengeng dosa ri yolona Puwangnge, kuwammengngi nariyaddampengeng dosana iyaro tauwé.

²⁹ Iyaro peraturangngé takkenna towi untu' nigi-nigi iya pogau'é dosa sibawa dé' nattungkaiwi, muwi iyaro tau Israél iyaré'ga tau laing iya mattette'é ri yelle'na mennang.

³⁰ Iyakiya rékko séddi tau Israél iyaré'ga séddi tau laing nattungkaiwi pogau' dosa, naangga énténgngi Puwangnge. Iyaro tauwé harusu'i rihukkung maté,

³¹ nasaba naéwai Puwangnge sibawa nattungkaiwi majjalékkaiwi paréntana Puwangnge. Iyaro tauwé matéi nasaba asalanna muto.

Tau iya majjalékkaiyéngngi peraturanna esso Saba'é

³² Wettunna tau Israélié engka ri padang kessi'é, engka séddi worowané ripoléi mattengngang paddeppungeng aju tunung ri esso Saba'é.

³³ Iyaro tauwé ritiwini mangolo ri Musa, Harun sibawa sininna umma'é,

³⁴ nainappa ritahang nasaba dé'pa namanessa harusu'i riyaga.

³⁵ Nakkeda Puwangnge lao ri Musa, “Iyaro tauwé harusu'i rihukkung maté. Harusu'i ritiwi massu ri akkémangngé nakkuwaniro sininna umma'é harusu'i genrungngi batu gangka maté.”

³⁶ Riyassarénréngenni massu ri sininna umma'é polé ri akkémangngé nanagenrungngi batu gangka maté, pada-pada iya napparéntangngé Puwangnge.

Peraturanna passalenna jombé-jombé

³⁷ Puwangnge suroi Musa

³⁸ makkeda lao ri bangsa Israélié, “Ebburengngi jombé-jombé cappa-cappa pakéyammu sibawa siyoi tulu gawu ri tungke' jombéna. Iyaro harusu'i mupogau' massossoreng.

³⁹ Jombé-jombé iyanaritu untu' papparéngngerang: Sises-siseng muwita, muwéngngerangngi sininna parénta-Ku sibawa turusiwi. Narimakkuwannanaro dé' muwallupaika matu untu' maccowériwi cinnamu sibawa pangéloremmu muto.

⁴⁰ Iyaro jombé-jombé paréngngerangiko matu untu' turusiwi sininna parénta-Ku, angkammu tonget-tongeng mancaji appunnangek-Ku.

⁴¹ Iyya'na Puwang Allataalamu; Iyya tiwiko massu polé ri Maséré kuwammengngi Umancaji Allataalamu. Iyya'na Puwang.”