1 YOHANES 3 - KITTA KAREBA MADECENG

Ana'-ana'na Allataala

¹ Itani pékkugi Allataala mamaséiki angkanna nangakuiki selaku ana'-ana'-Na. Mémeng idi iyanaritu Ana'-ana'na Allataala. Iyanaro saba'na lino iya majaéwé dé' naissekki, saba' linoéwé dé' naissengngi Allataala.

² Saudara-saudara iya upojiyé! Idi makkekkuwangngé iyanaritu Ana'-ana'na Allataala, iyakiya keadaatta matti dé'pa namanessa. Iyakiya riissengngi makkedaé rékko poléi Kristus, mancajiki matu pada-pada Aléna, saba' taitai matu ri laleng keadaan-Na iya sitongennaé.

³ Sininna tauwé iya mappunnangiyéngngi iyaé paddennuwangngé lao ri Kristus, najagaiwi aléna kuwammengngi natonget-tongeng mapaccing, mapaccing polé ri dosaé pada-padato Kristus mapaccing.

⁴ Tau iya pogau'é dosa, najjalékkaiwi hukkunna Allataala, saba' dosaé iyanaritu pelanggarang lao ri hukkunna Allataala.

⁵ Muwisseng makkedaé poléi Kristus untu' leddai dosa-dosana tolinoé, sibawa makkedaé dé'gaga dosa ri laleng aléna.

⁶ Sininna tau iya tuwoé masséddi sibawa Kristus, dé' natteru-teru pogau' dosa. Tau iya matteru-terué pogau' dosa, dé' naengka naitai Kristus iyaré'ga naissengngi Aléna.

⁷ Ana'-ana'ku, aja' muleppessangngi muwi niga papusako. Tau iya pogau'éngngi élona Allataala, iyanaritu ana'-ana'na Allataala pada-pada muto Kristus iyanaritu Ana'na Allataala.

⁸ Iyakiya tau iya matteru-terué pogau' dosa, ana'nai iyanaritu Ibillisi', saba' Ibillisi' pammulanna mupa namadosa. Untu' iyanaé napolé Ana'na Allataala, iyanaritu untu' mancuru'i jama-jamanna Ibillisi'.

⁹ Tau iya mancajiyénna Ana'na Allataala, dé' natteru-teru pogau' dosa, saba' sipa'na muto Allataala engka ri aléna. Sibawa nasaba iyaro Allataala Ambo'na, nadé' naulléi matteru-teru pogau' dosa.

¹⁰ Iyanaé assisalanna ana'-ana'na Allataala sibawa ana'-ana'na Ibillisi': nigi-nigi dé' napogau'i élona Allataala, iyaré'ga dé' namaséiwi saudarana, tenniyai ana'na Allataala.

Mamaséiwi séddié lao ri laingngé

¹¹ Pammulanna mupa naripalettu iyaé birittaé lao ri iko: Harusu'ki mamaséiwi séddié lao ri laingngé.

¹² Aja' tapada-pada Kaing, iya mancaji ana' Ibillisi'é sibawa mpunoi padaorowanéna muto. Aga saba'na Kaing naunoi padaorowanéna? Saba' gau'-gau' iya napogau'é salai, iyakiya gau'-gau' iya napogau'é padaorowanéna iyanaritu tongengngi.

¹³ Rimakkuwannanaro, Saudara-saudaraku, aja' muhérang rékko sining taunna linoé nabenciko.

¹⁴ Taissenni makkedaé massuni' polé ri amaténgngé, sibawa létté lao ri atuwongngé. Taissengngi iyaro, saba' tamaséiwi pada-padanna saudarata. Tau iya dé'é namamasé, bettuwanna rikuwasai mupi ri amaténgngé.

¹⁵ Tau iya benciyéngngi saudarana iyanaritu pabbunoi, na muwisseng makkedaé séddié tau pabbuno dé' nappunnai atuwong tongengngé sibawa mannennungengngé.

¹⁶ Nallalengi iyaé nataissengngi carana mamaséiwi pada-padatta: Purani nabbéréyang Kristus atuwon-Na untu' idi. Rimakkuwannanaro, harusu' tokki mabbéréyangngi atuwotta untu' Saudara-saudarata!

¹⁷ Séddié tau iya agennekengngé mitai saudarana akurangeng, iyakiya dé' namaélo tulungngi saudaranaro, pékkugi iyaro tauwé mulléi makkeda makkedaé namaséiwi Allataala?

¹⁸ Ana'-ana'ku! Aja' tamaséiwi banna ri témué iyaré'ga banna ada-ada bawang. Sitinajaki makkamasé sibawa pammasé iya tongengngé, iya ripabuttiyé sibawa pangkauketta.

Abaraningengngé ri yolona Allataala

¹⁹ Pékkugiwi carata missengngi makkedaé muttama'ki ana'-ana'na Allataala iya tongengngé, naweddingngi tennang atitta ri yolona Allataala.

²⁰ Taissenni makkedaé rékko ripasalaki ri atitta, pangissengenna Allataala lebbi battowai naiya pangissengenna ati marilaletta, enrengngé makkedaé naissengngi iya manem-manenna.

²¹ Jaji, Saudara-saudaraku iya upojiyé, rékko ati marilaletta dé' napasalaki, weddikki mangolo ri Allataala sibawa abaraningeng.

²² Na aga riyéllau polé ri Aléna, talolongengngi, nasaba matinuluki ri parénta-parénta-Na sibawa pogau'i aga iya pésennangiyéngngi atin-Na.

²³ Iya napparéntangngé lao ri idi iyanaritu: Harusu'ki mateppe' lao ri Ana'-Na, iyanaritu Yésus Kristus, sibawa harusu'ki sisullé siyamaséi, pada-pada iya puraé napparéntang Kristus lao ri idi.

²⁴ Sininna tau iya matinulué lao ri parénta-paréntana Allataala, tuwoi masséddi sibawa Allataala, enrengngé Allataala tuwoi masséddi sibawa mennang. Sibawa taissengngi makkedaé Allataala tuwoi masséddi sibawa idi, nasaba purai nawérékki Roh-Na.