1 ARUNG-NGARUNG 3 - KITTA KAREBA MADECENG

Massempajanna Salomo méllau pangissengeng

¹ Napancajini Salomo Maséré sellaona sibawa pubainéwi ana' makkunrainna arung Maséré. Iyaro ana' makkunraié natiwii Salomo ri kota Daud untu' monro kuwaro narapi saorajana arungngé sibawa Bolana Puwangnge enrengngé bénténg mattulilingiyéngngi Yérusalém tépu ripatettong.

² Nasaba dé'pa naripatettong Bolana Puwangnge wettuéro, makkarobang mupi ra'ya'é akkarobangeng ri maddupa-rupang onrong.

³ Namaséiwi Salomo Puwangnge sibawa maccowériwi panunju'-panunju' polé ri ambo'na, iyakiya maggéré mupi sibawa makkasuwiyangeng olokolo ri maddupa-rupang onrong.

⁴ Iyakiya assompang iya kaminang kalabbaé engkai ri Gibéon. Biyasai Salomo makkasuwiyangeng akkarobangeng kuwaro. Riséuwaé esso, pada-pada biyasaé, laosi Salomo kuwaro.

⁵ Iyaro wennié nappaitangngi aléna Puwangnge ri aléna ri laleng nippi sibawa makkeda, “Salomo, éllauni aga muwacinnai, iyaro uwérékko matu!”

⁶ Nappébali Salomo, “Puwang, purani Muwappaitang makkedaé muwamaséi senna'i ambo'ku Daud, atammuro. Makessingngi, malempui sibawa matinului ri Iko. Naselaku boro' makkedaé untu' matteru tette'-Ko mamaséiwi, muwéréngngi séddi tau ana' worowané iya mapparéntaé makkekkuwangngé sulléiwi.

⁷ Oh Puwang, Allataalaku, Muwakkaka mancaji arung sulléiwi ambo'ku, namuni malolo senna mupa sibawa dé' naissengngi carana mapparénta.

⁸ Engkaka ri tengnga-tengngana bangsa iya puraé Mupilé mancaji umma'-Mu. Mennang séuwa bangsa iya battowaé iya tenribilangngé jumellana.

⁹ Rimakkuwannanaro, Puwang, tennapodo wérénna apanréng iya uwapparelluwangngé untu' paréntai umma'-Mué sibawa adélé nenniya untu' pasilaingengngi kéga makessing sibawa kéga maja. Rékko dé' nappakkuwaro, pékkugi weddikka paréntai umma'-Mu iya battowaé?”

¹⁰ Masennanni Puwangnge sibawa paréllaunna Salomoro

¹¹ sibawa makkeda lao ri aléna, “Saba' méllauko apanréng untu' mapparénta sibawa adélé, natenniya umuru malampé iyaré'ga asugireng untu' alému iyaré'ga amaténna sining balimmu,

¹² Upennoiwi matu iyaro paréllaummu. Maélo-Ka pancajiko lebbi mapanré sibawa lebbi macca naiya muwi niga, muwi wettu labe'é iyaré'ga wettu mangoloé.

¹³ Mala muwi iya dé'é muwéllauwi Uwéréng tokko matu: gangka tuwomu sugiko matu sibawa ripakalebbi nacau muwi arung laing niga.

¹⁴ Sibawa narékko iko, pada-padako ambo'mu Daud, turusi-Ka enrengngé maccowériwi hukkung-hukkuk-Ku, Uwérékko matu umuru malampé.”

¹⁵ Moto'nana, mainge'ni Salomo makkedaé purani Allataala mabbicara lao ri aléna ri laleng nippi. Nanalisuna ri Yérusalém natettong ri yolona Petti Assijancinna Puwangnge sibawa makkasuwiyangeng akkarobangeng ritunu sibawa akkarobangeng pappasidamé. Nainappa pakangka pésta untu' sininna pegawénna.

Nadélékinna Salomo séddi parakara iya mawatangngé

¹⁶ Riséuwaé esso, duwa tau makkunrai cakkuribang polé mangolo ri Arung Salomo.

^17-18 Sala séddinna mennang makkeda, “Petta Iya Malebbié, iyya sibawa makkunraiéwé monroka sibola. Dé'gaga tau laing iya monroé sibawakki. Siyagangngaré wettu labe'é, jajiyakka séddi ana' worowané. Duwangngesso rimunrinna iyaé makkunraié jajiyang towi séddi ana' worowanéto.

¹⁹ Riséuwaé wenni wettutta matinro, iyaé makkunraié dé' nattungkaiwi tenre'i ana'lolona angkanna maté.

²⁰ Ri tengnga bennié wettukku matinro, moto'ni nanalai ana' loloku polé ri seddéku. Iyaro ana'loloku nataroi ri onrong atinronna, na ana'lolona iya matéénnaro nataroi ri onrong atinrokku.

²¹ Bajana éléé, wettukku pésedding maélo pasusui ana'lolokuro, upoléini maté. Puranana uparéssa madécéd-décéng, manessani tenniya ana'loloku.”

²² Nakkeda iyaro makkunrai laingngé, “Mabbélléi! Iya tuwoéwé ana'loloku, iya matéro ana'lolomu!” Nappébali iyaro makkunrai mammulangngé, “Dé'! Iya matéwé ana'lolomu, iya tuwoéro ana'loloku!” Makkuwaniro mennang massasa ri yolona arungngé.

²³ Namakkeda Arung Salomo, “Pada mangakuko makkedaé ana'lolo iya tuwoéwé ana'mu na tenniya iyaro maté.”

²⁴ Purana makkeda makkuwaro nasuroni arungngé tauwé mala peddang.

²⁵ Nainappa napparéntang arungngé, “Poloi ana'lolo iya tuwoéro mancaji duwa namuwéréngngi tassipolona tungke'-tungke' iyaro makkunraié.”

²⁶ Naéngkalingana paréntaéro, makkedani indo' tongenna ana' éro, “Taddampengekka, Datu, aja' taunoi ana'éro. Wéréng bawanni.” Iyaro indo'é makkeda makkuwairo nasaba napoji senna'i ana'na. Iyakiya iyaro makkunrai laingngé makkedai, “Ya, polo bawanni, leppessanni dé'gaga séddi tau polé ri idi lolongengngi!”

²⁷ Namakkedana Salomo, “Aja' muwunoi iyaro ana'loloé! Abbéréyangngi lao ri makkunrai mammulangngéro – aléna ritu indo'na.”

²⁸ Wettunna naéngkalinga bangsa Israélié passalenna apettunna Salomo ri laleng parakaraéro, bengngani mennang sibawa pakalebbii. Saba' manessani makkedaé Allataala pura mpéréngngi pangissengeng untu' kédo adélé.