I Yal Yau 10 - Sră Goh 2018

Bơta yal yau bơtau Dabit dê ( 10:1 – 29:30 ) Bơta chơt Sol mơ ală kòn klau khai dê

¹ Tŭ hơ̆ cau Philistin tòmlơh mơ Israel; cau Israel ntoat dô di đap cau Philistin, mơ oă cau gơkòl tơnchơt hơđang mơnơm Gilbôa.

² Cau Philistin ting jat Sol mơ ală kòn klau khai dê, mơ bol khai tơnchơt Jônathan, Abinadap mơ Malkisua la ală kòn klau Sol dê.

³ Bơta tòmlơh gơ ntềt pràn ngan di Sol, mơ tòm tŭ ală cau ling pañ àtak bàn khai, ală cau ling pañ khai jê sồt kơnjơ̆ ngan.

⁴ Gen Sol đơs mơ cau àñ phan tòmlơh khai dê lah: “Tă tĕ đào mê dê mơ srơp añ, nàng ală cau ò siat gơltau ne ò tus dơñŏ tơnhial añ.” Mơya cau àñ phan tòmlơh khai dê ò bài lơh bơh khai rngòt rngơt ngan. Behơ̆ Sol bơtào đào khai dê mơ tòmpừ să di cồng gơ.

⁵ Tòm tŭ cau àñ phan tòmlơh Sol di gŏ Sol neh chơt, khai kung tòmpừ să khai di cồng đào khai dê mơ chơt.

⁶ Behơ̆ Sol mơ pe nă kòn klau khai dê neh chơt, mơ jơh dô hìu khai dê chơt bal mơ gơp.

⁷ Tòm tŭ jơh ală cau Israel tòm thòng gŏ mpồl ling neh ntoat dô mơ Sol mơ ală kòn klau khai dê neh chơt, bol khai sang lòi ală ƀòn dờng bol khai dê mơ ntoat dô. Mơ ală cau Philistin tus mơ tòmpìt ai ală ƀòn dờng hơ̆.

⁸ Ngai tơnơ̆, tòm tŭ ală cau Philistin tus nàng hồ ai phan soh cau chơt dê, bol khai bàn Sol mơ ală kòn klau khai dê gơpừ chơt hơđang mơnơm Gilbôa.

⁹ Bol khai tă ai ồi ào khai dê, koh bồ khai ai ală phan tòmlơh khai dê, mơ sồr cau lòt yal jơnau hơ̆ tòm làm jơh lơgar Philistin, digùl ală yàng rùp ràk bol khai dê mơ làng bol bol khai dê.

¹⁰ Bol khai ơn ală phan tòmlơh Sol dê tòm bơmồng yàng bol khai dê, mơ yồng bồ Sol tòm bơmồng Dagôn dê.

¹¹ Tòm tŭ jơh ală cau ơm tòm Jabes Galaat kơno jơh ală bơta mơ cau Philistin neh lơh di Sol,

¹² jơh ală cau klau pràn kơldang khin cha bol khai dê ñă lòt mơ ai ƀồc Sol mơ ală kòn klau khai dê mơ cèng tus hơ Jabes. Gen bol khai chu ală ƀồc hơ̆ tòm tiah dô nơm chi cha tòm Jabes, mơ bol khai ơt sa tòm poh ngai.

¹³ Behơ̆ Sol neh chơt tài bơh khai ò dòn song mơ Yàng Jehôwa, khai ò prap gàr jơnau Yàng Jehôwa dê, tian gơs khai kung hòi lùp dô nă cau bơjơu gru nàng tề lam khai,

¹⁴ mơ ò hòi lùp Yàng Jehôwa. Gen tàng! Yàng Jehôwa tơnchơt khai mơ tơrwơl lơgar Dabit in la kòn klau Jese dê.