I Kôrintô 16 - Sră Goh 2018

Pơnah crap wơl ( 16:1-24 ) Bơta rì jền

¹ Bơh bơta rì jền ală cau sàng goh in tòm Jude, be añ neh sồr ală Hìu Jum Goh Galati be lơi, gen oh mi kung lơh jat behơ̆ sơl.

² Ngai sơnròp tòm kòp poh, kòp nă jat bơta cồng nha he dê mơ prap lòi is, tồ ò càng rì jền tòm tŭ añ tus.

³ Tòm tŭ añ tus, gen añ rơp sồr ală cau oh mi neh sac nàng cèng sră pơyoa mơ jền pà gòi oh mi dê tus hơ Jerusalem.

⁴ Dilah añ pal càng lòt, gen bol khai rơp lòt bal mơ añ sơl.

Bơta lơh nền lài Pol dê

⁵ Añ rơp tus còp oh mi tơnơ̆ mơ tŭ añ neh lòt gan Masedoan, bơh añ pal lòt gan Masedoan.

⁶ Digơlan añ rơp ơm mơ oh mi, hala kung ơm jơh kơnhai mrềt, tồ geh oh mi jun añ tiah lơi añ kòñ lòt.

⁷ Bơh tŭ do añ ò di mìng kòñ tìp mơ oh mi tòm tŭ lòt gan lơm, mơya dilah Yàng ai gơnoar gen añ kơp kòñ ơm mơ oh mi dô êt jŏ.

⁸ Mơya añ rơp ơm tòm Ephesô jơl tus di ngai pơjum sa Ngai Pram Jơt,

⁹ bơh neh gơs dô nơm mpồng dờng ơnàng neh pò mơ gơs kwơ tòm broă añ in, mơ kung gơs oă cau sò tơm sơl.

¹⁰ Dilah Timôthe tus, dong kòl tĕ khai nàng ơm bal mơ oh mi dô bă niam, bơh khai duh broă Yàng kung be añ sơl.

¹¹ Behơ̆ bañ gơs cau lơi sền òsơp di khai, mơya jun tĕ khai lòt gùng ring lơngai nàng khai tus hơ añ, bơh añ kơp gơn khai tus bal mơ ală oh mi hơ̆.

¹² Ai bơh Apôlôs la oh mi he, añ neh jơh nùs chồl khai lòt bal mơ ală oh mi hơ̆ nàng tus còp oh mi, mơya tŭ do khai ò bài lòt; tòm tŭ Yàng ai tŭ lơmpah, gen khai rơp lòt tus.

¹³ Oh mi drơng kơp tĕ, ơm kơ̆ tĕ tòm bơta dòn, lơh tĕ be cau dờng, mơ pràn kơldang tĕ.

¹⁴ Jơh ală broă oh mi lơh gen ai tĕ nùs kòñ gơboh mơ lơh.

¹⁵ Ơ oh mi, gơs dô jơnau tơngkah tai, oh mi git lah hìu nhă Stephanas la plai bồ sơnam lơgar Acai, mơ bol khai lơh nền duh broă ală cau sàng goh in.

¹⁶ Añ dan ală oh mi kung dòn bơr ală cau behơ̆, mơ kòp nă cau kong bòl glar lơh broă bal mơ bol khai.

¹⁷ Añ hòn chò bơh Stephanas, Phôtuna, mơ Acaikơ tus tềng do, bơh bol khai neh lơh wil tơl tòm bơta siơ̆u oh mi dê,

¹⁸ mơ lơh hwềng nùs añ jê mơ oh mi dê geh rài bòl. Behơ̆ pal sền dờng màng ală cau behơ̆.

¹⁹ Ală Hìu Jum Goh tòm Asia còp să oh mi. Akila mơ Prissil bal mơ Hìu Jum Goh pơjum tòm hìu bol khai dê jơh nùs còp să oh mi tòm Yàng.

²⁰ Jơh ală oh mi do còp să oh mi, ai tĕ bơta còp să sàng goh mơ còp să bal.

²¹ Do la tê tòm añ la Pol cih ală jơnau còp să añ jê.

²² Dilah cau lơi ò kòñ gơboh di Yàng, gen pal gơkòl srat rma. Yàng bol he dê tus!

²³ Dan bơta nđàc Yàng Jesu Krist dê ơm bal mơ oh mi.

²⁴ Nùs kòñ gơboh añ jê ơm bal mơ jơh ală oh mi tòm Yàng Krist Jesu. Amen.