Hebrơ 1 - Sră Goh 2018

I. Bơta Ho Bal Pa bơh Yàng Jesu Krist bơtào la màng ryŭ rlau ( 1:1 – 10:18 ) Jơnau Yàng Tom Trồ Bơh Kòn Kơnràñ Dê

¹ Tòm rài yau, Yàng Tom Trồ neh ngui ală cau gơnoar hwơr nàng đơs oă dơ̆, oă bơta mơ ală ồng pàng bol he dê,

² tus di ală ngai lồi dut do Kơnràñ đơs mơ bol he bơh Kòn mơ Kơnràñ neh pồ bơtào nàng pơrdòn jơh ală phan, kung kơnòm di Kòn mơ Kơnràñ neh crơng gơs dunnia.

³ Kòn hơ̆ pơnđàng wơl bơta gơklŏ Yàng Tom Trồ dê, mơ la rùp tòm toh ngan să tòm Yàng Tom Trồ dê. Kòn hơ̆ ai jơnau gơnap gơnoar Kơnràñ dê đo jơh ală phan. Tơnơ̆ mơ tŭ neh lơh sir bơta rào goh glài rau, gen nggui đah ma Yàng Tom Trồ Bơtau Gơnap Gơnoar dờng rlau jơh hơđang trồ,

⁴ Kơnràñ gơlik gơs dờng màng rlau mơ ală cau gơnrơh, gen sơnđan Kơnràñ kung geh pơrdòn la màng ryŭ rlau mơ ală cau gơnrơh behơ̆ sơl.

Yàng Jesu Krist màng ryŭ rlau mơ cau gơnrơh

⁵ Bơh gơs tŭ lơi Yàng Tom Trồ đơs mơ cau gơnrơh lơi lah: “Mê la Kòn Añ jê, Ngai do Añ neh tơnggơs mê,” sơl ơ? Hala đơs tai lah: “Añ rơp lơh gơs Bèp Khai dê, Khai rơp lơh gơs Kòn Añ jê,” sơl ơ?

⁶ Mơ tai, dơ̆ Kơnràñ jun Kòn tơnhoa tus tòm dunnia, gen đơs lah: “Jơh ală cau gơnrơh Yàng Tom Trồ dê pal duh khoai Kòn.”

⁷ Tòm tŭ đơs bơh ală cau gơnrơh gen Kơnràñ đơs lah: “Yàng Tom Trồ lơh ală cau gơnrơh Kơnràñ dê be càl, Mơ ală cau duh broă Kơnràñ dê be lơmpiat ồs.”

⁸ Mơya tòm tŭ đơs bơh Kòn gen Kơnràñ đơs lah: “Ơ Yàng Tom Trồ, sơbàn Yàng dê gam sùm sùm ò lồi. Gai gơnoar at bồ lơgar Yàng dê la gai gơnoar at bồ song ring.

⁹ Kơnràñ kòñ gơboh di bơta song ring, gơjrañ kơuềng di bơta ò jat bơta boh lam. Gen tàng Yàng Tom Trồ, la Yàng Tom Trồ Kơnràñ dê, neh bong mơñà Kơnràñ in mơ mơñà bơta hòn chò, Rlau mơ ală gơp bơyô Kơnràñ dê.”

¹⁰ Kơnràñ kung đơs lah: “Ơ Yàng, bơh sơnròp Yàng neh bơtào gơs mơnàng plai ù, Ală tap trồ kung la broă tê Kơnràñ dê.

¹¹ Trồ tiah rơp roh rui, mơya Yàng gam sùm sùm; Trồ tiah rơp klar siar be ồi ào,

¹² Kơnràñ rơp pồt gơ be ào bơdìh, Gơ rơp tòmgơl be ồi ào, Mơya Yàng gam be òs, Ală nam Yàng dê ò tŭ lơi lồi.”

¹³ Gơs tŭ lơi Yàng Tom Trồ đơs mơ cau gơnrơh lơi lah: “Nggui tĕ đah ma Añ, Jơl tus di tŭ Añ ơn ală cau sò tơm mê dê lơh gơs kơrnòl jơng mê dê sơl ơ?”

¹⁴ Jơh ală cau gơnrơh hơ̆ ò di la ală hwềng òs duh broă, kong sồr lòt nàng dong broă ală cau rơp pơrdòn bơta dong klàs ò ơ?