Esai 52 - Sră Goh 2018

¹ Ơ Siôn, kah rngal tĕ, kah rngal tĕ, soh tĕ bơta pràn ai dê. Ơ Jerusalem la ƀòn dờng sàng goh, soh tĕ ồi ào hàng mơnĕ ai dê. Cau ò siat gơltau mơ cau ƀơ̆ ƀơl rơp ò mut tòm tiah ai dê tai.

² Guh tĕ, rtuh tĕ să tòm bol mê bơh thul ơmul, Ơ Jerusalem tiah gơkòl kup cèng. Ơ kòn ùr Siôn la cau kòl kup cèng, hồ tĕ che kơt bơh di ngko ai dê.

³ Bơh Yàng Jehôwa đơs be do: “Bol ai neh kong tac ò geh phan lơi, mơ bol ai kung rơp geh tơwài wơl ò tơm jền priă.”

⁴ Jehôwa Yàng Tom Trồ đơs be do: “Neh jŏ jòng ngan làng bol Añ jê neh mù hơ Ejiptơ nàng ơm tềng hơ̆ be làng bol bơdìh; kung behơ̆ sơl, cau Asiri neh rồn bơklơn bol khai ò bồ.

⁵ Gen tàng tŭ do, ñchi Añ lơh tềng do taih?” Yàng Jehôwa đơs lah: “Sền ne, hơ̆ la làng bol Añ jê neh kong kup cèng ò bồ ơ? Ală cau at bồ bol khai dê pơt wòl.” Yàng Jehôwa đơs behơ̆ mơ gam pơnjat sùm, “sơnđan Añ jê gơkòl sền òsơp sùm kòp ngai.

⁶ Gen tàng làng bol Añ jê rơp git sơnđan Añ; gen tàng tòm ngai hơ̆ bol khai rơp git Bơtau neh đơs: ‘Hơ̆ la Añ’.”

⁷ Hàng mơnĕ ò git nđò hơđang ală mơnơm, ală mpàng jơng ală cau cèng jơnau niam, bơto yal bơta lơngap lơngai, yal tơlik bơta dong klàs, mơ đơs mơ Siôn lah: “Yàng Tom Trồ mê at bồ!”

⁸ Iat tĕ! Ală cau ling kơp gàr mê dê ai jơnau đơs chò, bol khai đơs chò hòn chò bal. Bơh bol khai rơp gŏ mơ mat tòm bol khai dê, tòm tŭ Yàng Jehôwa rê wơl hơ Siôn.

⁹ Ơ ală tiah tơrlah tơrlơm Jerusalem dê, ai tĕ jơnau đơs chò hòn chò bal, bơh Yàng Jehôwa neh pơndòm pơniang làng bol Kơnràñ dê, Kơnràñ neh tơwài wơl Jerusalem.

¹⁰ Yàng Jehôwa rơp ràng tơlik tơwòr tê sàng goh Kơnràñ dê di đap mat jơh ală lơgar; mơ jơh ală tiah lồi dut plai ù rơp gŏ bơta dong klàs Yàng Tom Trồ bol he dê.

¹¹ Cah is tĕ, cah is tĕ, lik tĕ bơh tềng hơ̆! Bañ ƀư di phan ƀơ̆ ƀơl! Lik tĕ bơh digùl hơ̆ mơ lơh tĕ să tòm bol mê gơlik sàng goh, bol mê la ală cau tui àñ ală phan ngui Yàng Jehôwa dê.

¹² Mơya bol mê rơp ò lik lòt sơrbac sơrbang mơ ò càng ntoat dô; bơh Yàng Jehôwa rơp lòt di đap bol mê, mơ Yàng Tom Trồ Israel dê rơp la Bơtau sền gàr đah ngkòi bol mê dê.

Bơta jê sồt mơ bơta gơklŏ Cau Duh Broă dê

¹³ Do, cau duh broă Añ rơp la cau pas gơs; Khai rơp geh yò tơngguh, mơ geh jòng ro hơđang rlau jơh.

¹⁴ Kung be gơs oă cau gŏ Kơnràñ mơ ai lơh krơi, muh mat Kơnràñ ò niam rlau mơ jơh ală cau ndai, rùp să Kơnràñ ò gam be rùp să kòn mơnus tai.

¹⁵ Behơ̆, Kơnràñ rơp lơh oă lơgar nrơt nrơl bơh Kơnràñ. Ală bơtau rơp tơmềm bơr bơh Kơnràñ, bơh bol khai rơp gŏ bơta òhềt gơs cau yal bol khai in, mơ bol khai rơp sền gŏ loh làng bơta bol khai òhềt kơno.