Ejekiel 48 - Sră Goh 2018

Bơta tòmpà lơgar

¹ “Do la ală jơi bơtiàn, cih jat sơnđan: Di dê nhàr đah đang, Dan rơp gơs dô pơnah; gơ rơp lòt jat gùng bơh Hetlôn tus hơ Lebo Hamat; Hajar Enan mơ nhàr đah đang Damas di gah Hamat rơp la dô pơnah nhàr gơ dê bơh đah mattơngai lik tus hơ đah mattơngai mut.

² Aser rơp gơs dô pơnah; gơ lòt jat nhàr ù tiah Dan dê bơh đah mattơngai lik tus hơ đah mattơngai mut.

³ Neptali rơp gơs dô pơnah; gơ lòt jat nhàr ù tiah Aser dê bơh đah mattơngai lik tus hơ đah mattơngai mut.

⁴ Manase rơp gơs dô pơnah; gơ rơp lòt jat nhàr ù tiah Neptali dê bơh đah mattơngai lik tus hơ đah mattơngai mut.

⁵ Epraim rơp gơs dô pơnah; gơ rơp lòt jat nhàr ù tiah Manase dê bơh đah mattơngai lik tus hơ đah mattơngai mut.

⁶ Ruben rơp gơs dô pơnah: gơ rơp lòt jat nhàr ù tiah Epraim dê bơh đah mattơngai lik tus hơ đah mattơngai mut.

⁷ Juda rơp gơs dô pơnah: gơ rơp lòt jat nhàr ù tiah Ruben dê bơh đah mattơngai lik tus hơ đah mattơngai mut.

⁸ Lòt jat rò nhàr ù tiah Juda dê bơh đah mattơngai lik tus hơ đah mattơngai mut rơp la pơnah bol mê rơp ơn is lơh gơs dô nơm phan ơn. Gơ rơp gơs bàr jơt pram rbô tal ơnàng, mơ jòng ròt gơ dê bơh đah mattơngai lik tus hơ đah mattơngai mut rơp ndròm bal mơ dô pơnah tòm ală pơnah tòmpà jơi bơtiàn in; hìu duh khoai rơp ơm digùl gơ.

⁹ Pơnah ơn is mơ bol mê rơp ơn Yàng Jehôwa in rơp la bàr jơt pram rbô tal jòng ròt mơ jơt rbô tal ơnàng.

¹⁰ Gơ rơp la dô pơnah ù tiah ơn is sàng goh ală cau gơnoar ơn phan duh khoai in. Đah đang gơ rơp la bàr jơt pram rbô tal jòng ròt, đah mattơngai mut rơp la jơt rbô tal ơnàng, mơ đah mattơngai lik la jơt rbô tal ơnàng, mơ bàr jơt pram rbô tal jòng ròt đah đơm. Digùl gơ rơp la hìu duh khoai Yàng Jehôwa dê.

¹¹ Hơ̆ la pơnah ơn is ală cau gơnoar ơn phan duh khoai in la kòn sau Jadôk, la ală cau dòn song duh broă Añ jê mơ ò gŏ lòt tìs nrah kung be ală cau Lebi neh lòt tòm tŭ làng bol Israel lòt tìs nrah.

¹² Gơ rơp la dô nơm phan ai gòi krơi is ai bol khai in bơh di pơnah sàng goh lơgar dê, dô pơnah sàng goh rlau jơh, gơ lòt jat nhàr ù tiah cau Lebi dê,

¹³ lòt jat rò gah ù tiah ală cau gơnoar ơn phan duh khoai dê, ală cau Lebi rơp geh ai dô pơnah bàr jơt pram rbô tal jòng ròt mơ jơt rbô tal ơnàng. Jơh đah jòng ròt gơ dê la bàr jơt pram rbô tal mơ đah ơnàng gơ dê la jơt rbô tal.

¹⁴ Bol khai ò rgơi tac hala tòmgơl dô pet lơi tòm hơ̆; do la ù tiah niam rlau jơh mơ ò rgơi jào tòm tê cau ndai, tài bơh gơ neh ơn is sàng goh Yàng Jehôwa in.

¹⁵ Kơnhwàl gam wơl, pram rbô tal ơnàng mơ bàr jơt pram rbô tal jòng ròt rơp la ù tiah ngui bal ƀòn dờng dê nàng bơt hìu hala lòi gơs ƀlàng ñhơt phan poan jơng in. Ƀòn dờng rơp bơt digùl tiah hơ̆

¹⁶ mơ rơp gơs poan rbô pram rhiang tal đah đang, poan rbô pram rhiang tal đah mattơngai lik mơ poan rbô pram rhiang tal đah mattơngai mut.

¹⁷ Ƀlàng ñhơt phan poan jơng in ƀòn dờng dê rơp gơs bàr rhiang pram jơt tal đah đang, bàr rhiang pram jơt tal đah đơm, bàr rhiang pram jơt tal đah mattơngai lik, mơ bàr rhiang pram jơt tal đah mattơngai mut.

¹⁸ Pơnah gam wơl kơnhwàl hơ̆ dê, lòt jat rò gah nhàr pơnah ơn is sàng goh dê, mơ lòt jat rò gah jòng ròt gơ dê rơp la jơt rbô tal đah mattơngai lik mơ jơt rbô tal đah mattơngai mut. Plai đo gơlik gơs bơh ù tiah hơ̆ rơp ngui lơh gơs phan sa ală cau in lơh broă tòm ƀòn dờng.

¹⁹ Ală cau lơh broă tòm ƀòn dờng mơ tùc tam ù tiah hơ̆ rơp la cau tus bơh jơh ală jơi bơtiàn Israel dê.

²⁰ Jơh dô pơnah hơ̆ gơs poan gah ring bal, kòp gah la bàr jơt pram rbô tal. Bol mê rơp ơn pơnah ù tiah sàng goh bal mơ phan jơtài ƀòn dờng dê.

²¹ Pơnah gam wơl di bàr gah bơh ù tiah ơn is sàng goh mơ phan jơtài ƀòn dờng dê rơp gơrê bal mơ cau bơtau. Gơ rơp lòt wèt hơ đah mattơngai lik bơh di bàr jơt pram rbô tal pơnah ơn is sàng goh dê tus hơ nhàr đah mattơngai lik, mơ gơ lòt wèt hơ đah mattơngai mut bơh di bàr jơt pram rbô tal tus di nhàr đah mattơngai mut. Jơh bàr kơnhwàl do gơ lòt jat rò gah jòng ròt ală pơnah ù tiah ală jơi bơtiàn dê rơp gơrê bal mơ cau bơtau, mơ pơnah ơn is sàng goh bal mơ tiah sàng goh hìu duh khoai dê rơp ơm digùl gơ dê.

²² Behơ̆, phan jơtài cau Lebi dê mơ phan jơtài ƀòn dờng dê rơp ơm digùl phan gơrê bal mơ cau bơtau. Pơnah gơrê bal mơ cau bơtau rơp ơm digùl nhàr ù tiah Juda dê mơ nhàr ù tiah Benjamin dê.

²³ Ai đah pơnah ală jơi bơtiàn ndai gen Benjamin rơp gơs dô pơnah; gơ rơp lòt bơh di đah mattơngai lik tus hơ đah mattơngai mut.

²⁴ Simeôn rơp gơs dô pơnah; gơ rơp lòt jat nhàr ù tiah Benjamin dê bơh đah mattơngai lik tus hơ đah mattơngai mut.

²⁵ Isaka rơp gơs dô pơnah; gơ rơp lòt jat nhàr ù tiah Simeôn dê bơh đah mattơngai lik tus hơ đah mattơngai mut.

²⁶ Jebulun rơp gơs dô pơnah; gơ rơp lòt jat nhàr ù tiah Isaka dê bơh đah mattơngai lik tus hơ đah mattơngai mut.

²⁷ Gat rơp gơs dô pơnah; gơ rơp lòt jat nhàr ù tiah Jebulun dê bơh đah mattơngai lik tus di đah mattơngai mut.

²⁸ Nhàr đah đơm ù tiah Gat dê rơp lòt bơh di Tamar tus di dà Meriba Kades, lồc behơ̆ jat rò gah Croh dà Ejiptơ tus di Dàlềng Dờng.

²⁹ Hơ̆ la lơgar mơ mê pal tă khà ai ală jơi bơtiàn Israel in lơh gơs sre brê, mơ hơ̆ la ală pơnah bol khai gơs,” Jehôwa Yàng Tom Trồ đơs behơ̆.

Ală mpồng ƀòn dờng dê

³⁰ Do la ală gùng lik bơh di ƀòn dờng: Rơp sơntòm bơh đah đang la đah gơs poan rbô pram rhiang tal jòng ròt,

³¹ ală mpồng ƀòn dờng dê rơp geh sơnđan jat sơnđan ală jơi bơtiàn Israel dê. Pe nơm mpồng đah đang rơp la mpồng Ruben, mpồng Juda, mơ mpồng Lebi.

³² Đah mattơngai lik gơs poan rbô pram rhiang tal jòng ròt, rơp gơs pe mpồng: hơ̆ la mpồng Jôsep, mpồng Benjamin mơ mpồng Dan.

³³ Đah đơm mơ cau neh was jòng ròt la poan rbô pram rhiang tal, rơp gơs pe nơm mpồng: hơ̆ la mpồng Simeôn, mpồng Isaka mơ mpồng Jebulun.

³⁴ Đah mattơngai mut gơs poan rbô pram rhiang tal jòng ròt rơp gơs pe nơm mpồng pơnggàr: hơ̆ la mpồng pơnggàr Gat, mpồng pơnggàr Aser mơ mpồng pơnggàr Neptali.

³⁵ Jơh gùt dar ƀòn dờng rơp la jơt phàm rbô tal. Mơ sơnđan ƀòn dờng bơh di tŭ hơ̆ rơp la: “YÀNG JEHÔWA ƠM TỀNG HƠ̆.”