Yohana 18 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwiguĩlua kwa kĩYesu

¹ Pĩna nutambula izi, ũYesu nupũna palumuĩ nĩamanigua aakue, nulongola kwityumbĩ lya kamongo Kidoloni pĩna alĩ kĩtanga. Nũingĩla muumo umuene nĩamanigua aakue.

² NũYuda, umusakia waakue, alĩ wĩĩzĩ paasio kunsooko ũYesu nĩamanigua aakue alĩ akĩlundĩĩlaa paasio nkua kunkua.

³ Luulo, ũYuda pĩna nuligia ĩkĩũmbĩ kya ĩlaasi nĩĩtumi a apolia naakulu nĩApalisayo, nuenda kuasio niimulĩ nintala nĩmata.

⁴ Iio ũYesu kunsooko alumanile tũlũ nazĩkakumuagaana, nupũna nuaĩĩla, “Mukumudũũma waani?”

⁵ Naamushookeelia, “ũYesu Munazaleti.” Nuaĩĩla, “Ingĩ neene.” ũYuda, umusakia waakue, aluĩmĩkile palumuĩ nĩndĩo.

⁶ Pĩna nuaĩĩla, “Ingĩ neene,” naashooka kĩnũũma naagua pansĩ.

⁷ Nuakolia kaubĩlĩ, “Mukumudũũma waani.” Naaũga, “ũYesu Munazaleti.”

⁸ ũYesu nuashookeelia, “Nuaĩĩla kĩna ingĩ neene. Malĩĩ mwindũũma ĩne, alekĩ ĩa ende.”

⁹ koona lutimĩĩligue ulukaani nalutambulue, “Ĩa naalumpĩĩle sika alĩ nĩalimĩlĩĩlie kaumuĩ.”

¹⁰ Paapo uSimoni Petelo, naalutĩĩte iyũmba, nulĩsopoola numutema umusese wa mupolia namukulu, numudumula ukutũi wa kĩgoosia. ĩLiina lya musese alĩ Malikusi.

¹¹ Paapo ũYesu numuĩĩla uPetelo, “Shookeelia iyũmba mukĩnina. ĩKĩĩko numpĩĩle uTata, nsiite kukĩkopelane?”

¹² Paapo ĩkĩũmbi kya ĩlaasi numukulu waao nĩĩtumi a Ayahũdi naamuguĩla ũYesu naamutũnga,

¹³ naamulongolia tangua kwa kĩAnasi, kunsooko alĩ mukuĩ wa kĩKayapa naalĩ mupolia namukulu umuaka nuasio.

¹⁴ nuKayapa muene aluapĩĩle ĩAyahũdi ĩkialo kĩna ijĩpĩĩle muntu umuĩ wakie kunsooko ya antu.

uPetelo ukumukaana ũYesu

¹⁵ uSimoni Petelo numutiata ũYesu, numumanigua nuĩngĩ. uMumanigua nuasio alĩ mumanue numupolia namukuluu, nũingĩla palumuĩ nũYesu mukĩanda kya mupolia namukulu.

¹⁶ Ĩpa uPetelo nuĩmĩka kunzi pamulango. Iio umumanigua nuasio nuĩngĩ naalĩ mumanue numupolia namukulu nupũna, naĩtambuĩla numulindĩĩla-mulango, numũingĩlia uPetelo.

¹⁷ Paapo ĩkatũgua kalindĩĩla-mulango nakamuĩĩla uPetelo, “Sika uene umuĩ wa amanigua a muntu uyo?” uNuasio nuũga, “Ĩne sikaka neene.”

¹⁸ ĩAsese nĩĩtumi alĩ ĩĩmĩkile naikoleelia umooto wa makala naioota kunsooko alĩ mpepo. uPetelo alĩ yĩensi palumuĩ ndĩo, nuĩmĩkile nwioota umooto.

¹⁹ Paapo umupolia namukulu numukolia ũYesu impola za amanigua aakue nimpola za umania waakue.

²⁰ ũYesu nushookeelia, “Ĩne alĩ ntambuĩle tengetenge muna unkũmbigyulu; ĩne intondo tũlũ nukumanagiaa mũshũnagogi numuNumba ya kĩNzua pĩna ĩkĩlundĩĩlĩĩlaa ĩAyahũdi tũlũ; sika ntambuĩle kalukaani kukĩmpisĩ-mpisĩ.

²¹ Nĩkĩ winkolia ĩne. Akolie naalĩ akũigagiaa naalĩ nukuaĩĩlaa. Laaa, ĩo amanile naalĩ nukuzitambula ĩne.”

²² Pĩna nutambula izi umuĩ wa ĩtumi naaluĩmĩkile paasio numukua ũYesu lupĩĩ, nuũga, “Iione ukumushookeelia umupolia namukulu?”

²³ ũYesu numushookeelia, “Kanga ĩntambuĩle ibĩĩ, ukuĩle uubĩĩ waasio; kanga iiza, wankua nĩkĩ?”

²⁴ Paapo uAnasi numutuala mutũngue kwa kĩKayapa umupolia namukulu.

²⁵ NuSimoni Petelo alĩ wĩĩmĩkile nwioota umooto. Naamuĩĩla, “Sika uuene umuĩ wa amanigua aakue?” Uyu nukaana nuũga, “Sikaka neene.”

²⁶ Umuĩ wa asese a mupolia namukulu, muntua wa kĩnuasio naalĩ mudumulue ukutuĩ nuPetelo, nuũga, “Ĩne sika aza nukuooniene mukĩtanga mwĩensi nduyo?”

²⁷ Paapo uPetelo nukaana kangĩ; ĩkamuĩ umumbĩ nukunkula.

ũYesu ntongela ya kĩPilatu, mutemi wa kĩLumĩ

²⁸ Paapo naamupũnia ũYesu kwa kĩKayapa, naamutuala kwijumba lya kĩtemi mũgyĩngu. Io sika alĩ ingĩĩle mwijumba lya kĩtemi, alekipũũta umũiko, ĩpa alĩe ĩnkolo ya Pasaka.

²⁹ Paapo uPilatu nupũna kunzi nuũga, “Muleetile usokia kĩ kumuntu uzu.”

³⁰ Naashookeelia naamuĩĩla, “Kanga uyu ĩsika mutenda ibĩĩ sika aza kumuleetile kumuako.”

³¹ Iio uPilatu nuaĩĩla, “Musolĩ uniinie mumulamule kuUlagĩĩlio waani.” ĩAyahũdi naamushookeelia, “Kuasiitĩligue ishie kukumuulaga umuntu.”

³² Itĩ ulukaani lwa kĩYesu lutimĩĩligue naalutambuĩle, nalagĩĩla nkia kĩ nukikia.

³³ Paapo uPilatu nũingĩla mwijumba lya kĩtemi kangĩ, numuĩta ũYesu, numuĩĩla, “Ue uue mutemi wa Ayahũdine?”

³⁴ ũYesu nushookeelia, “Ue witambula wing'enene itĩ, kanga ĩngĩ naakuĩĩlĩĩle impola zaane?”

³⁵ uPilatu nushookeelia, “Mbii, ĩne nĩMuyahũdine? ĩndugu yaako nĩapolia naakulu aza akuleetile ue kumuane. Utendile yaani?”

³⁶ ũYesu nushookeelia, “uUtemi waane sika wa unkũmbigyulu uu, kanga uutemi waane ĩazaa wa unkũmbigyulu uu, ĩĩtumĩ aane aza ijile kĩnsomeelia ndekiĩĩkua mumĩkono ya Ayahũdi. Ĩpa gua, uutemi waane sika wa ĩpa.”

³⁷ Iio uPilatu numuĩĩla, “Ue umutemine gile?” ũYesu nushookeelia, “Kĩna ue waũgaa, ĩne neene numutemi. Ĩne alĩ numulelue kunsooko ĩĩ, nukunsooko ĩĩ nijile muna unkũmbigyulu, koona nkuĩle ĩtai. Wensi nwa tai ukunzigagiaa ululi luane.”

³⁸ uPilatu numuĩĩla, “ĩTai kuuza yaani?” Pĩna nutambula izi nupũna kangĩ kuAyahũdi, nuaĩĩla, “Ĩne sika naona kalukaani kumuakue.

³⁹ Ĩpa kunsiani ĩkoolĩ ntendo numutũngulĩlie umuĩ palutondo lwa Pasaka. Musiiile numutũngulĩlie umutemi wa Ayahũdine?”

⁴⁰ Paapo naakuutĩĩla kangĩ, naaũga, “Sika wayu ĩpa uBalaba!” uBalaba alĩ muleegelania.