Ukũnukulua 8 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mĩlĩlo ya madede namupũngatĩ

¹ Pĩna uMuana-nkolo nuuũnanga umuntoozo wa mupũngatĩ, nayĩĩ ituulũ dũũ mwigyulu zĩ katungo kakupĩ.

² Nanĩaona ĩamalaĩka mupũngatĩ nakuuza ĩĩmĩkile ntongela ya kĩNzua, naapeegua madede mupũngatĩ.

³ Numalaĩka muua nuuza nuĩmĩka ntongela ya witekelo, utĩĩte kĩseme kya zahabũ, nupeegua ulũmba wingĩ, wausaalĩnkanie palumuĩ nuulompi wa eelu tũlũ witekelo wa zahabũ nawĩĩlĩ ntongela ityengu lya kĩtemi.

⁴ Nĩliuki lya ulũmba nalĩnankĩla kuntongela ya kiNzua palumuĩ nuulompi wa eelu kwipũna mumukono wa kĩmalaĩka.

⁵ uMalaĩka nukĩsola ĩkĩseme nukijulia umooto wa upolelio, nuutaaga munsĩĩ, naitũla mugũgũmo ninduli, nimpĩĩto, numumanga.

⁶ Nĩamalaĩka naa mupũngatĩ naatĩĩte ĩmadede mupũngatĩ naĩlĩganĩĩlia amalĩlie.

⁷ uMalaĩka nwa muandio nulĩlĩlia idyede, niĩ mbũla ya magũe numooto naishaalĩnkana nĩmĩgali, naitaagua munsĩĩ; ityũmpĩ lya katatu lya nsĩĩ nalĩsonsua, nityũmpĩ lya katatu lya makota nalĩsonsua, ĩmasanzĩ namatotũ tũlũ namasonsua sue.

⁸ uMalaĩka nwa kabĩlĩ nulĩlĩlia idyede, nĩkĩntu zĩ nkonko nkulu niakĩĩle umooto nakĩtaagua munanza; ityũmpĩ lya katatu lya nanza nalĩtũla mĩgali.

⁹ iTyumpĩ lya katatu lya iyumbe nakuuzaa ikoolĩ munanza naipanga naikia, nityũmpĩ lya katatu lya mapango nalionoonua.

¹⁰ uMalaĩka nwa katatu nulĩlĩlia idyede, nsonda nkulu nĩgua kwipũna kwigyulu, niakĩĩle zĩ kienge, nĩguĩla mwityũmpĩ lya katatu lya miongo, numunjiĩlio za maazĩ.

¹¹ Nĩliina lya nsonda yukuĩtaguaa Ukalĩ; nityũmpĩ lya katatu lya maazĩ nalĩtũla makalĩ, nĩantu iingĩ naakia kumazĩ maasio kunsooko alĩ makalĩpagiguaa.

¹² uMalaĩka nwa kanĩĩ nulĩlĩlia idyede, ityũmpĩ lya katatu lya mpasu nalĩkuua, nityũmpĩ lya katatu lya mueli, nityũmpĩ lya katatu lya nsonda, koona ityũmpĩ liakue lya katatu liĩ wiilu, umunsĩ ulekimĩlĩka ityũmpĩ liakue lya katatu, sunga utiku iio-iioo.

¹³ Namona nanĩigia ndĩĩ nĩpũpũta pakatĩ igyulu, nĩlĩla kululi lukulu, “Ukĩa, ukĩa, ukĩa, waao naakuuzaa ĩĩlĩ muna nsĩĩ, kunsooko ya mĩlĩlo nĩsaagile nya madede ma amalaĩka naatatu, naakilĩlia!”