Maliko 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muntu nwa mukono mulema wikamigua

¹ Nũingĩla mũshũnagogi; muasio alukoolĩ muntu nwa mukono mulema.

² Naamukũsĩla kaukakumukamia palutondo lwa wikyali, koona amusokie.

³ Numuĩĩla umuntu nwa mukono mulema: ĩĨmĩĩka pakatĩ!

⁴ Nuaĩĩla: Mũikone palutondo lwa wikyali kwitenda naiiza, katia kwitenda naibĩĩ; kwigyũna ĩnkolo ya muntu, katia kwiulaga? Naatuulia.

⁵ Nuakĩnduĩla poo kuutaki, nuona usungu kunsooko ya ukakũ wa nkolo zaao, numuĩĩla umuntu, golola umukono waako! Nuugolola; umukono waakue naukamia.

⁶ Ĩkamuĩ naalongola ĩApalisayo, naakomia ĩkialo palumuĩ nĩantu a kĩHelode amuulage kunzĩla kĩ.

Ukamigua nawĩngĩ

⁷ ũYesu nulega nĩamanigua aakue, nuenda kunanza. Yũmbĩ kyulu nalĩmutiata kwipũna kũGalilaya nukuUyahũdi,

⁸ nukũYelusalemũ, nukuIdũmea, nukũtyumbĩ liYolidani, nukunandĩ za Tilo nĩSidoni; yũmbĩ kyulu pĩna naligyũlia zensi naalukuzitendaa, nalyumuagaana.

⁹ Nuaĩĩla ĩamanigua aakue amuzĩpĩlĩlie ipyango kunsooko ya mulundo, uleke kumutuunĩĩlia.

¹⁰ Kuitĩ aluakamilie iingĩ, sunga tũlũ naalĩ akuagaa naamupilimĩkĩlia koona amuapaatie.

¹¹ Nĩmasĩĩmuĩ pĩna alĩ makumuonaa, namagua ntongela yaakue, namakuuta, namaũga, “Ue uue Muana wa kĩNzua!”

¹² Numagilia maleke kumukũmuula.

ũYesu ukuasaagula ĩatumua aakue naikyumi naabĩlĩ

¹³ Nunankĩla munkonko, nuĩĩta naalualoilue umuene, naamuagaana.

¹⁴ Nuaĩĩka kyumi naabĩlĩ yĩĩ yĩensi nduyo, waaatume kwitanantia,

¹⁵ ĩĩ nuusũũmi wa kuĩnga ĩmasĩĩmuĩ.

¹⁶ Nuaĩĩka ĩa naikyumi naabĩlĩ; numupeela uSimoni ĩliina lya Petelo;

¹⁷ nuYakobo ũsha Zebedayo nuYohana umunũna wa kĩYakobo, nuapeela ĩliina lya Boanelego, ĩndogolelio yaakue aana a mugũgũmo;

¹⁸ nuAndelea, nuPilipo, nuBalitolomayo, nuMatayo, nuTomaso, nuYakobo ũsha Alpayo, nuTadayo, nuSimoni Mukananayo,

¹⁹ nũYuda nwa kuIsikaliote, uyo naalumusakilie. Nũingĩla munumba,

ũYesu wishookeelia ishokio ya kĩna ukĩtumaa kungũlũ za kĩShetani

²⁰ iyũmbĩ nalyumulundĩkĩĩla kangĩ sunga sika naasũũma kwilĩa india.

²¹ Pĩna ĩantua naiigia, naalongola kukumuguĩla, naaũga, “Wasalaa!”

²² ĩAlangi naalĩ atimile kwipũna kũYelusalemũ naaũga, “Mutĩĩtue nuBelizebuli, nukungũlũ ya mukulu wa masĩĩmuĩ wiĩnga ĩmasĩĩmuĩ.”

²³ Nuĩĩta, nuaĩĩla kumpiani, “Wishuma mbii ũShetani kukumuĩnga ũShetani.

²⁴ Kanga uutemi wĩĩ kĩpũka nkaani uweene, uutemi waasio sika wishũũma kwiĩĩmĩka.

²⁵ Nĩnumba kanga yĩĩ kĩpũka nkaani ĩnene, ĩnumba niasio sikishũũma kwiĩĩmĩka.

²⁶ NũShetani kanga wĩuukĩĩle umuene nukũtemanuka, sika wishũũma kwiĩĩmĩka, utĩĩte ukinĩĩlo.

²⁷ Sika wishũũma gua nunumuĩ kwiingĩla munumba ya munangũlũ nukukuzishĩmba inshao zaakue, kanga ĩsikumutũngile tangua umunangũlũ; paapo waaze kumĩsĩmba ĩnumba yakue.

²⁸ Tai namuĩĩla, ĩaana-antu ikileegeligua uutimu wensi nuutuki waao wensi naikipũnia,

²⁹ ĩpa unuasio nukakumutukĩla uMuau Muelu, mugila kauleegeligua wa utimu sunga ĩkalĩ nakalĩ, ĩpa utĩĩte umulandu wa kalĩ nakalĩ.” (

³⁰ Kĩna iio naalĩ aũgile, “Munalĩsĩĩmuĩ.”)

Kĩnũna kya tai

³¹ uNina nĩanũna naaaza, naĩĩmĩka panzi, naamutuma umuntu kukumuĩta.

³² Niyũmbĩ nalikyalansile nalyumulundĩkĩlĩĩle, nalyumuĩĩla, “Laaa, umaau waako nĩanũna aako akoolĩ panzi, akukudũũma.”

³³ Nuashookeelia nuũga, “uMaau waane nĩanũna aane aani?”

³⁴ Nualaaanga naalĩ amupilimĩkĩlĩĩlie, nuũga, “Laaĩ umaau waane nĩanũna aane!

³⁵ Wensi nukuutendaa uuloa wa kĩNzua, uuyo munũna waane, numugũlĩ waane, numaau waane.”