Maliko 15 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ntongela ya kĩPilatu, mutemi wa kĩLumĩ

¹ Ĩkamuĩ pĩna naweela ĩapolia naakulu palumuĩ nĩanampala nĩalangi nilindĩ liensi naakoomia ĩkialo, naamutũnga ũYesu, naamutuala naamuĩĩka mumikono ya kĩPilatu.

² uPilatu numukolia, “Ue uuene umutemi wa Ayahũdi?” Nushookeelia nuũga, “Iio kĩna uũgile ue.”

³ Nĩapolia naakulu alĩ akumusokia nkaani ningĩ.

⁴ uPilatu numukolia kangĩ, nuũga, sika wishookeelia kalukaanine, Laaa, nkaani zinga naakukusokia?

⁵ ũYesu sika nushookeelia kalukaani kangĩ, sunga uPilatu nukulĩlua.

⁶ Palutondo nalukulu ukuatũngulĩlagiaa mutũngua umuĩ, naamulompile.

⁷ Alukoolĩ muntu nukuĩtaguaa Balaba, alĩ mutũngue palumuĩ nĩanaluntampa naaulagana muluntampa luasio.

⁸ iYũmbĩ naliĩza, naliandia kwilompa lĩtendelue kĩna kuuza wijiĩli.

⁹ uPilatu nuashookeelia nuũga, “Musiiilene numutũngulĩlie umutemi wa Ayahũdi.”

¹⁰ Kuitĩ alĩ walĩngaa kĩna ĩapolia naakulu alĩ amupũnilie kuwĩĩlũ.

¹¹ ĩApolia naakulu naalĩsuagĩĩlia iyũmbĩ koona waatũngulĩlie uBalaba.

¹² uPilatu nushookeelia kangĩ nuaĩĩla, nteendeeii gua ninduyu namuũgile umutemi wa Ayahũdi?

¹³ Naakulia ĩkĩlanga kangĩ, “Mukononteele mumusalaba!”

¹⁴ uPilatu nuaĩĩla, ubĩĩ kĩ naalutendile? Naĩkakia dũũ kwikulia ĩkĩlanga, “Mukononteele!”

¹⁵ uPilatu nusiia kukulĩloeelia iyũmbĩ, nuatũngulĩlia uBalaba, numupũnia ũYesu pĩna naamukua ĩmĩkoa, koona wakononteelue mumusalaba.

Ĩlaasi akumupopota ũYesu

¹⁶ Nĩĩlaasi naamusola mukĩanda kijumba lya kĩtemi naĩlundĩĩla palumuĩ yũmbĩ liensi lya ĩlaasi.

¹⁷ Naamujiala ntiila nkasũkũ, naataa ngala ya miigia, naamujiala mwityũe,

¹⁸ naandia kukumulamukia, weelaa, mutemi wa Ayahũdi!

¹⁹ Naamukua ninkome mwityũe, naamutiĩla ĩmatĩ, naatũngama nukukumutekela.

²⁰ Pĩna naakondia kukumupopota, naamujiula ĩntiila nankasũkũ, naamujiala intiila zaakue umuene, naamutuala kunzi koona amukononteele mumusalaba.

ũYesu wikononteelua mumusalaba

²¹ Naamukankanĩka muntu umuĩ naalukĩlile upũnile kumugunda, Simoni nwa kuKilene ushee wakĩ Alekizando nuLũpo, wakenke umusalaba waakue.

²² Naamutuala kuasio kuGoligota, ĩndogolelio yaakue, panungulu ityũe.

²³ Naamupeela umubinio naalĩ musangigue niilago, ĩpa sika nuanũnkula.

²⁴ Naamukononteela mumusalaba, naoomolana intiila zaakue, naazikuĩla nsimbi, muntu wensi wasole kĩ.

²⁵ Alĩ nsaa ya katatu naamukononteela.

²⁶ Alĩ ukoolĩ wandĩkua wa usokigua waakue naalĩ wandĩkue pakiania, “MUTEMI WA AYAHŨDI.”

²⁷ Palumuĩ ninduyo alĩ aakonontelĩĩle aleegelania abĩlĩ, umuĩ kumukono waakue wa kĩgoosia, umuĩ kumukono waakue wa kĩkĩĩma.

²⁸ Paapo gua uwandĩkua nautimĩĩligua naalĩ utambulue, “Nualĩĩligua palumuĩ nĩaleki.”

²⁹ Nĩasio naalĩ ikĩla munzila naakumutukĩla, naiangazia ĩmatũe, naiũga, kaaa! Uwe mukola kumĩtaula ĩnumba ya kiNzua nukukumĩzenga kuntondo zitatu,

³⁰ ĩgũne, tima gua mumusalaba.

³¹ Iio-iioo ĩapolia naakulu gaa naamupopota eene kueene palumuĩ nĩalangi, naiiũga, alukuagũnaa naĩngĩ, sikusũũmile kukĩgũna umuene.

³² uKilisito, mutemi wa Ĩsilaeli, nwatime ĩpaino mumusalaba kuone nukwishuĩĩla. Sunga aao naalĩ akononteelue palumuĩ nduyo naakumutukĩla.

Kwikia kwa kĩYesu

³³ Pĩna nayĩĩ nsaa ya mutandatu, naitũla kiiti munsĩĩ yensi, sunga kunsaa ikyenda.

³⁴ Nĩpansaa ikyenda ũYesu nwĩtunta ululi luakue nangũlũ, “Eloi, Eloi, Lama sabakitani.” ĩNdogolilio yaakue, “Nzua waane, Nzua waane, nĩkĩ wandekaa?”

³⁵ Nĩnaĩngĩ naalĩ ĩĩmĩkile paasio pĩna naiigia, naaũga, laaĩ ukumuĩta uElia.

³⁶ Umuĩ numanka, nuenda nwijulia sipongo umubinio namukalĩ, nuĩĩkĩla mulunangĩ numukopia, nuũga, “Lekĩ, kulaae malĩ uElia ukiiza kumutimia.”

³⁷ NũYesu nwĩtunta ululi, nutiĩka ĩnkolo.

³⁸ iPyupa lya numba ya kĩNzua nalĩtanduka mpĩngĩlĩ zibĩlĩ, kwipũna kukiania sunga pansĩ.

³⁹ uMukulu wa ulugu naalĩ wĩĩmĩkile paasio naitungĩnkĩĩne, pĩna nuona ya kĩna watiĩka ĩnkolo itĩ, nuũga, “Tai umuntu uyu alĩ Muana wa kĩNzua.”

⁴⁰ Alĩ akoolĩ ĩasungu naalĩ ilaaĩla kulĩ, numwiyũmbĩ liasio alĩ akoolĩ uMalia nwa kuMagidala nuMalia unina wa kĩYakobo namuniino nũYose, nuSolome;

⁴¹ Ĩaasio alĩ ĩtiatile ninduyo pĩna alĩ ĩĩlĩ kũGalilaya nukukumutumĩla, nĩĩĩa naĩngĩ iingĩ naalĩ anankĩĩle ensi sunga kũYelusalemũ.

ũYesu wiĩĩkua mukĩbĩĩla

⁴² Pĩna naitũla mpĩndĩ, kunsooko alĩ lutondo lwa Wĩzĩpĩĩlia, luasio naalĩ lutiatue nulutondo lwa wikyali;

⁴³ nuenda uYosepũ umuntu nwa kuAlimatea, munakialo wa lukũmo, ninduyo umuene utũngĩĩle uutemi wa kĩNzua, nugimia kwiingĩla ntongela ya kĩPilatu, nuulompa umuĩlĩ wa kĩYesu.

⁴⁴ Ĩpa uPilatu nukulĩlua kunsooko wakaawa kũkia. Numuĩta umukulu wa ulugu numukolia kawakiaa katũngo

⁴⁵ Pĩna nuĩĩlua numukulu wa ulugu kĩna wakiaa, numulekela uYosepu umuimba.

⁴⁶ Nugula ĩntiila nankamũ, numũikia, numutũnga ĩntiila niasio, numuĩĩka mukĩbĩĩla naalĩ kĩkũnue mwigyũe, nupingilitia igyũe pamulango wa kĩbĩĩla.

⁴⁷ nuMalia nwa kuMugidala nuMalia unina wa kiYose naalaaa pĩna alĩ muĩĩkue.