Luka 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usuguli wa kupela

¹ iTyũngo lĩĩlo alĩ akoolĩ antu naalĩ akumuĩĩla impola za Agalĩlaya ĩaasio uPilatu naalusaalĩnkĩĩnie ĩmĩgali yaao palumuĩ nĩmapolia maao.

² Nushookeelia nuaĩĩla, “Musĩĩgilene ya kĩna ĩAgalĩlaya aasio alĩ anamĩlandu nangũlũ kwikĩla ĩAgalĩlaya tũlũ naĩngĩ kunsooko naalĩ aagigue itĩ?

³ Namuĩĩla sika iio; ĩpa kanga musiitipela, niniinie ensi mukimalua iio-iioo.

⁴ Katia ĩaasio naikyumi namunaana naalĩ atũlatĩĩligue nĩnumba nandĩĩpũ uko kuSoloamu nĩaulaga, musĩĩgilene ya kĩna ĩaasio alĩ atimuli kwikĩla ĩantu tũlũ naĩngĩ naalĩ ikyalile mũYelusalemũ?

⁵ Namuĩĩla sika iio; ĩpa kanga musiitipela niniinie ensi mukimalua iio-iioo.”

Mpiani ya mukuu nasika ukupĩaa inkali

⁶ Nutambula ĩmpiani ĩyĩ, “Muntu umuĩ alutĩĩte mukuu nalĩ mupandĩlue mumugunda waakue nwa mĩzabiibu; nulongola wende wakale inkali muasio, nuulia.

⁷ Numuĩĩla umukendegeeli wa mĩzabiibu, ‘Laaa, ĩmiaka ĩtatu ĩĩnukuuza nanidũũma inkali mumukuu uu ĩpa sika naniziona; uuteme. Nĩkĩ ukoonoonaa nĩnsĩĩ gaa.’

⁸ Nushookeelia nummuĩĩla; ‘Shekulu, uuleke umuaka wau udũũ sunga nuugĩngĩle, nuwiitĩle nuutope,

⁹ nĩnduo kanga upĩe inkali umuaka naũjile, iiza; kanga usiitipĩa, paapo gua uuteme.’”

Musungu naalĩ mukamigue palutondo lwa wikyali

¹⁰ Palutondo lwa wikyali alĩ wimania mũshũnagogi lĩmuĩ.

¹¹ Laaa, alukoolĩ musungu naalutĩĩte ĩlĩsĩĩmuĩ lya uneketũ ĩmiaka kyumi namunaana, ninduyo alĩ wĩpetile, sika alusũũmile kwigoloka.

¹² ũYesu pĩna numuona, numuĩta numuĩĩla; “Maau, watũnguĩlaguaa muuneketũ waako.”

¹³ Nuĩĩka ĩmĩkono yaakue mumuakue, ninduyo ĩkamuĩ nugoloka, numukulia uNzua.

¹⁴ Ĩpa umukulu wishũnagogi nutaka kunsooko ũYesu alumukamilie umuntu palutondo lwa wikyali, nushookeelia nuaĩĩla ĩanamulundo; “Zikoolĩ intondo mutandatu nazijĩpĩĩle kukĩtuma ĩmĩlĩmo, iio gua nzuĩ mukamigue muntondo zaasio, ĩpa sika palutondo lwa wikyali.”

¹⁵ Paapo ũShekulu numushookeelia nuũga; “Inie anamampĩlu wensi mumiani sikukumĩtũnguĩlaane ĩng'ombe yaakue katia ndoguĩ yaakue mumpongolo palutondo lwa wikyali, wende kumĩkopia?

¹⁶ Numusungu uyu namuana wa kĩIbũlahimu, ũShetani nwamutũngile kumiaka kyumi namunaana, sika aza ijĩpĩĩlene watũnguĩlue muutũngua uu palutondo lwa wikyali?”

¹⁷ Pĩna nutambula izi, naakolua inshoni tũlũ naalĩ ĩkĩkunguma ninduyo, numulundo wensi naulumba kunsooko ya nkaani zensi nankulu naalĩ ntendue ninduyo.

Mpiani za kapeke ka haladali nĩigaaĩ

¹⁸ Nuũga gua; “uUtemi wa kĩNzua wĩpianile niyaani? Nineene nuupianĩkĩĩlie niyaani.”

¹⁹ Wĩpianile zĩ kapeke ka haladali (kapeke nakaniino zĩ mbeu ya ukusi) naalukasolile umuntu nukapandĩla mumugunda wakue; nakalia nakatũla kyota; ninoni za mukiania naziishũũpĩlia muntambĩ zaakue.

²⁰ Nulikitia nkua yakabĩlĩ, “Nuupianie niyaani uutemi wa kĩNzua?

²¹ Wĩpianile niigaaĩ naalũisholile umusungu nũishaalĩnkania mumiuuli naalĩ ijuile nungu zitatu sunga yensi nĩgaasigua.”

Nzĩla nampini nya kuingĩla muupanga wa kalĩ nakalĩ

²² Nunduyo alĩ wikĩla mukaa numũishaalĩ nũmania mumusĩnzo wakue pĩna alulunziĩ kũYelusalemũ.

²³ Muntu umuĩ numukolia; “Shekulu ĩantu naakugũnĩkaa akeeine?” Nuaĩĩla;

²⁴ “Ĩkamatĩkiĩ kwiingĩla kumulango namupinĩ, Kuitĩ namuĩĩla ya kĩna iingĩ ikishiia kwiingĩla. Alemue.

²⁵ Kwipũna paapo pĩna umukola numba ukiuuka nukukulũgyalĩla uluĩgĩ, niniinie mukiĩĩmĩka kunzi nukukinintia paluĩgi ĩmwiũga, ‘Shekulu, ukũgyuĩle,’ ninduyo ukishookeelia wamuĩĩle, ‘Sika numuĩzĩ kĩna mupũnile.’

²⁶ Paapo mukiandia kwiũga, ‘Alĩ kukulĩaa nukwikopa ntongela yaako nunduue alukukumanagiaa muishaalĩ yĩĩtu.’

²⁷ Ninduyo ukiũga, ‘Namuĩĩla, sika numuĩzĩ kĩna mupũnile. Legĩ kumuane inie tũlũ naalĩ mukutendaa namabĩĩ!’

²⁸ Paasio kikitũla kĩlĩlo nukwikelia ĩmiino pĩna mukakumuona uIbũlahiimu nuIsaki nuYakobo nĩanakĩdagu ensi muutemi wa kĩNzua, niniinie uniinie ĩmwataagilue kunzi.

²⁹ Nĩantu ikiiza kwipũna kukĩĩlĩma nukumueli nukusũkũma nukutakama, nĩndĩo ĩkakikyalansa pandia muutemi wa kĩNzua.

³⁰ Laaa, akoolĩ naa mumalĩĩlio naikitũla a muandio; akoolĩ naamuandio naikitũla a mumalĩĩlio.”

Ulugu wa kĩHelode

³¹ iTyũngo lĩĩlo ityũmpĩ lya Apalisayo naamuagaana naamuĩĩla; “Lega kwipũna ĩpa kunsooko uHelode usiiile kukukuulaga.”

³² Nuaĩĩla, “Lendĩ mumuĩĩle unuasio nukiteenda musugu, ‘Laaa, nantende numudaau nukumaĩnga ĩmasĩĩmuĩ nukukuakamia ĩaluĩle; palutondo lwa katatu nikikondia ulugendo luane.’

³³ Ĩpa injĩpĩĩle kwiamba nzĩla yaane nantende numudaau nzĩa, kuitĩ sika ishũũmĩkile umunakĩdagu waulague isiititũla mũYelusalemũ.

ũYesu ukumĩlĩĩla iYelusalemũ

³⁴ “Ee Yelusalemũ Yelusalemũ, nukuaulagaa ĩanakĩdagu nukukuatũla ĩmagũe naatumue kumuako; nkua zinga kuuza nsiile kukuailingĩĩla ĩaana aako kĩna yoi ĩnkuku nyukupiiligĩĩlaa ipiana piakue mumbaa zaakue, ĩpa sika namugomba.

³⁵ Laaĩ, ĩnumba yaani yaazaa shaamua! Kuitĩ namuĩĩla, sika mukimona sunga pĩna mukiũga, wakũmazukigue nũjile muliina lya kĩShekulu.”