MATTHAI 7 - Laibaibal Thiang (BSI)

¹ “Sawi na si nâkhnga lo, mi va sawi hlah.

² Zeitintiah mi na sawi hna bantukin, mi nih an in sawi ve lai; na tahnâk hmangin tah na si ve lai.

³ Zeiruangahdah nangmah mit i thingpel hmanh ruat loin na unau mit i hmunthûr fa te na hmuh khawh?

⁴ Zeitindah na unau sinah, na mit chung i hmunthûr fa te kha ka lakter tuah na ti khawh lai;’ zohhmanh, nangmah mit ah thingpel a um a si lo maw?

⁵ Mi depde pa! Na mit chung i thingpel kha chuah hmaisa, cuticun na unau mit i hmunthûr fate kha chuah awkah fiang tein na hmuh khawh lai.

⁶ A thiangmi thil cu uico vape hlah; vok hmaikâ zongah lungvar va chia hlah; an lamh chih lai i nangmah tiangin an in thlehbauh sual lai.

⁷ Hal law, pêk na si lai; kawl law, na hmuh lai; king law, on piak na si lai.

⁸ Zeitintiah a haltu kha an pêk i a kawltu nih a hmuh i a kingtu kha onpiak a si tawn.

⁹ A fapa nih changreu a hal lio ah lungtum a petu ahotal an um hnga maw?

¹⁰ Ngasa an in hal lio ah, rul a petu nan um hnga maw?

¹¹ Nanmah misual hmanh nih nan fale thilṭha pêk nan hngalh ahcun; van i nan Pa nih cun a haltu sinah thilṭha cu a pe chinchin hnga lo maw?

¹² Cucaah minih ka cungah tuah hna seh ti na duhmi kha, mi cung zongah va tuah ve, zeitintiah hihi nawlbia le Profet hna bia cu a si.

¹³ Kutka bi ah lut u; zeitintiah rawhralnâk a phâkpitu kutka le lam cu a kau i cu lam i a kalmi cu mi tampi an si.

¹⁴ Asinain nunnâk i luhnâk kutka cu a bi, a lam zong a har i a zulmi zong tlawmte an si.

¹⁵ Profet deu kha i ralring u; tuu phaw aih in nan sinah an ra lai na in an chunglei tu cu a hrangmi cenghngia an si.

¹⁶ An theitlai in nan hngalh hna lai. Hlingbur ah misur thei an lo bal lo, saihmurhling kungah theipi a tlai bal lo.

¹⁷ Cubantukin thingṭha cu a thei a ṭha, thingchia cu a thei zong a chia.

¹⁸ Thingṭha in thei chia a tlai ballo i thingchia in thei ṭha a tlai bal lo.

¹⁹ Theiṭha a tlai lomi thing cu an hau i mei ah an khangh tawn.

²⁰ Cucaah annih cu an theitlai in nan hngalh khawh hna lai.

²¹ Bawipa, Bawipa, aka timi pauh nih, vanbawi pennâk ah a lut lai lo; van i ka Pa duhnâk a tuahtu lawnglawng an lut lai.

²² Cuniah cun mi tampi nih, Bawipa, Bawipa, na min in phung kan chim, na min in khuachia kan ṭhawl hna; na min in khuaruahhar thil tampi kan tuah a si lo mei,’ an ti te lai.

²³ Khi tikah, ‘Nannih nawlbuartu hna, kan hngal bal hna lo; ka sinin i ṭhen u!’ tiah ka ti te hna lai.

²⁴ Cucaah, hi ka bia a thei i a zulmi cu mifim, lungpi cungah inn a satu he tahchunh a si;

²⁵ ruah a sur i tilet a tho, thlitu hrangin cu inn cu a nam len nain lungpi cungah sakmi a si caah a rawk kho lo.

²⁶ Asinain ka chimmi bia a thei nain a zul lomi cu, mihrut, these cung i inn a sami he tahchunh an si;

²⁷ ruah a sur i tilet a tho, thlitu hrangin cu inn cu a nam tikah a rawk dih. A rawh ning cu a fak ngaingai,” tiah a ti.

²⁸ Jesuh nih cu bia a chim dih in, a cawnpiak mi ah an khuaruah a har ngai ngai.

²⁹ Zeitintiah nawlbia cawnpiaktu bantuk si loin, nawlngeihnâk he a cawnpiak hna caah.