Marko 1 - Gvray Shànshér Mòngkà Kagvp Àngshv́r

Tìløp Yohaní mvshǿl shø̀:nò we

¹ Gvray Àngcèpè Yesu Kristuò Dvbùshv̀ngkà mvpv̀ng.

² “Èyà:ngò, Ngàí Ngà dvzv́r Nà vzv̀ngzv̀ng dvzv́r dakngò nø̀, à:ngí Nà dvpvt tvrà dègǿa dae.

³ Rvgaq mvgung yv́ngø tiqgǿ vkiq we kàshaq nø, ‘Kàngpè dvpvt tvrà dègǿanø̀ng, Àng dvpvt tvrà mèdónganø̀ng,’” wa kàdvtutshú Esaya kàru taq vru yà:ngà dø,

⁴ Tìløp Yohan nø rvgaq mvgung yv́ng di nø̀, mvrà chutna lúnlv́m dvpvt, nøt língshì nø̀ tìløpshì rà we mvshǿl dvsha:ngòe.

⁵ Wekvt Yuda gùrwang køp nv̀ng Yerusalem wamà vsv̀ngrì shvngbe nø, Yohan yv́ngsv̀ng di nø̀ àngmaq mvrà vchángshìe. Wekvt Yohaní àngmaq sv̀ng Yordan Tìwàng yv́ng tìløpmaòe.

⁶ Yohan nø golawu møl bèlaq gwashì nø̀ juq taq nø shace juqnv́m nv́mshìe. Àng nø cóngkut nv̀ng zømwàng kwátì vm nø̀ vle.

⁷ À:ngí mvshǿl dvsha:ngò we taq, “Ngà mvdv̀m jòrnònggùn te pè nø, ngà mèpvng di daqe. Ngà nø ngǿmshø̀ng nø̀ Àng híshvnam svnhǿng pǿna we vshuq wáshìlv́m gø màpǿng.

⁸ Ngàí nø nàmaq sv̀ng tì taq løpmìe. À:ngí nø Shànshér Pvlàcè taq nàmaq sv̀ng èløpmvtnø̀nge,” a:lòe.

Yesu sv̀ng tiløp zíò we

⁹ Wenila taq, Galili móng Nazaret mvrìng kèní Yesu dì ráì nø̀, Yordan Tìwàng yv́ng Yohaní Àng sv̀ng tìløpmaòe.

¹⁰ Tì vdòng kèní kungshì lú:ngì chàng, muqlàng vtáná:mì nø̀, Gvray Pvlàcè nø kaø dø Àng mvdv̀m lashì daqì we À:ngí yv̀ng bǿà.

¹¹ Wekvt muqlàng kèní kà shø̀n daqì nø̀, “Nà nø Ngà shóngshø̀ng we Ngàcèpè èíe. Nà sv̀ng Ngà gvzà dvbònge,” wae.

Sataní Yesu dvlø:tnò we

¹² Wekvt chàng, Shànshér Pvlàcèí Àng kaq rvgaq mvgung sv̀ng dí dvzá:ròe.

¹³ Rvgaq mvgung yv́ngø vbìcé ni døp Àng sv̀ng Sataní dvlø:tnò nø̀ Àng nø zømwàng nìnàrì nv̀ng tiqdø vle. Wedvgvp muqlàng dvzv́rrìí Àng sv̀ng dvzø:mòe.

Yesuí Galili móng bv̀nlì pà:ngò we

¹⁴ Herodní Yohan sv̀ng róng bǿà mèpvng, Yesu nø Galili móng sv̀ng dì ráì nø̀,

¹⁵ “Rvtø̀ vhøm ráì, Gvray móngdàn gø tvp níshì daqì. Nøt èlíngshìnø̀ng nø̀, Dvbùshv̀ngkà sv̀ng èkv́m ránø̀ng,” wa Gvray Dvbùshv̀ngkà dvsha:ngòe.

¹⁶ Yesu nø Galili Tìnúngmè shvnvng di dvgvp, Simon nv̀ng àngnvmpè Anderu nø tìnúngmè taq shǿmgún dvgupke da we À:ngí yv̀ng bǿà. Kadø íe wani àngní nø nga vkwìke vsv̀ng íe.

¹⁷ Yesuí, “Ngà mèpvng ècv̀n ráshì. Nàní kaq vsv̀ng vkwíshú wáshì dvzv́rlv́m íe,” a:lòe.

¹⁸ Wekvt chàng, àngníí shǿmgúnrì ca là:ngò nø̀ Àng mèpvng cv̀n bǿà.

¹⁹ Vzv̀ng kaq tiqramcè dìá:mì dvgvp, kùngshí vdòngø shǿmgúnrì dvceshì we Zebedi àngcè Yaku nv̀ng àngnvmpè Yohan sv̀ng À:ngí yv̀ng bǿà.

²⁰ Wekvt À:ngí àngní sv̀ng chàng goò nìnø, àngnínà:mí gø àngpè Zebedi sv̀ng lv̀ngzvngrì nv̀ng tiqdø kùngshí vdòngø ca là:ngò nø̀ Àng mèpvng cv̀n bǿà.

Cáng lù:ngò we

²¹ Àngmaq nø Kapernum mvrìng sv̀ng gòngá:mì. Wekvt Narnií Àng nø júrøt chø̀m sv̀ng chàng di nø̀ shvngø:tnòe.

²² À:ngí shvngø:tnò kàrì sv̀ng àngmaq gvzà dae. Kadø íe wani À:ngí nø dvrá svrarì dø mø̀í, vmíng vkv́ng vl we vsv̀ng dø àngmaq sv̀ng shvngø:tnòe.

²³ Àngmaq júrøt chø̀m yv́ng cáng dvchøp we tiqpè vl we, wela:ngí àng vkiq lú:ngì nø̀,

²⁴ “Nazaretpè Yesué, Nà nv̀ng nøngmaq pà singlv́m vle má? Nà nø nøngmaq sv̀ng shvmv́nglv́m èdì daqì má? Nà kagǿ èí we ngàí shánge, Gvrayò Shànshérpè lèíni!” a:lòe.

²⁵ Wekvt Yesuí, “Dø màwá èvl! Àng yv́ngkèní èlúshì,” wa nga:nòe.

²⁶ Mvmv́ng cá:ngí wepè sv̀ng nipnip vdv́n dvzá:rò dá:ngí, shaqmèí vkiq sórí àng kèní lúshiá:mì.

²⁷ Wekvt àngmaq shvngbe tasv̀ng vrøtke høq rìràá:mì nø̀, “Pà í ráì! Vmíng vkv́ng vl we shvngøtkà àngshv́r tiqpv̀n lví dá:rì. Cángrì kaq À:ngí dvká:mò ke, àngmaq nø Àng kà sv̀ng tá dá:rì,” wae.

²⁸ Wela:ngí Galili móng køp sv̀ng Àng dang shv̀ngkà dvshvng bǿà.

Za rì dvba:nò nø̀ cáng lù:ngò we

²⁹ Àngmaq nø júrøt chø̀m kèní búng daqì weó chàng, Yaku ó Yohan nv̀ng tiqdø, Simon nv̀ng Anderu àngnínvm chø̀m sv̀ng dìá:mì.

³⁰ Wedvgvp Simon àngnìmè nø góng vkatshì rvt vyálshìe. Àngmaqí Yesu sv̀ng àng za lòng wekvt ni dvtáòe.

³¹ Yesu dì ráì weí, àng wur zø̀:mò nø̀ kung bǿà nìnø, àng góng vkatshì lòng baná:mì. Wekvt à:ngí àngmaq sv̀ng dvzø:mòe.

³² Nv̀m vle nø̀ dø ráì kvt, àngmaqí za rì nv̀ng cáng dvchøp rì shvngbe Àng yv́ng shøla:tnà.

³³ Mvrìng vsv̀ng shvngbe nø, bv́ngkà chit yv́ng dvkǿmshìe.

³⁴ Záyv̀ng àngpv̀npà:ní za vsv̀ng mvme gǿ À:ngí dvban bǿà. Cáng gø mvme lùng bǿà. Àng nø Kristu í we cángrìí sháò rvt, À:ngí àngmaq kaq kà shǿn màdvzá:rò.

Yesuí mvgágá vjúrø:tnò we

³⁵ Sháng mvgágá maqmà:ní Yesu nø kungshì dv̀ng, chø̀m kèní búngá:mì nø̀ mòngzø̀l we tiqyv́ng sv̀ng dì nø̀ vjúrø:tnòe.

³⁶ Simon nv̀ng àng lamboqrìí Àng sv̀ng láa:tnà.

³⁷ Àngmaqí Àng sv̀ng yv̀ng bǿà kvt, “Vsv̀ng shvngbeí Nà sv̀ng èláe,” a:lòe.

³⁸ Yesuí nø, “Gùrhøm vl we dvgá mvrìngrì sv̀ng gø Ngaí mvshǿl dvshvng lúnlv́m dvpvt dìì. Pàwá wani yalòng rvt ni Ngà dø̀ng dakngà we íe,” wa vtá:nòe.

³⁹ Àng nø Galili móng køp sv̀ng di nø̀, àngmaq júrøt chø̀mrì taq mvshǿl dvsha:ngò nø̀ cángrì lù:ngòe.

Mvnggvng dvshè:rò we

⁴⁰ Mvngga:ngí za we tiqgǿ dì ráì nø̀ Àng mv́rdv̀ngø pvnciq tushì sórí, “Nà èwv́mshì nìnø, ngà sv̀ng dvshér èngutnàe,” wa kórshìe.

⁴¹ Yesuí mvré lú:ngà. Wekvt wur zúshì nø̀ àng sv̀ng shu:pmò sórí, “Ngà wv́mshø̀nge. Leq shèrvm,” a:lòe.

⁴² Wela:ngí mvnggang vna baná:mì nø̀ àng nø shèrá:mì.

⁴³ Wekvt Yesuí gvpnaq dvká:mò nø̀, tiqdvshaqí shvloò sórí,

⁴⁴ “Nàyáshì! Kagǿ sv̀ng gø yalòng bvttut dvshvng mvdaq. Íwe èdivm nø̀, shvrúngshúpè sv̀ng nà góng dètánshìvm. Vrá, vsv̀ng mv́rdv̀ng nà èshèrá:mì we shvkse ílv́m dvpvt, Moshií dèkv́m yv̀ngshà we núngpà shèrúngaò,” a:lòe.

⁴⁵ Wedø ínìgø, wepè búngá:mì nø̀ yadang kayv́ng màyv́ng dvshvng bǿà. Wervt Yesu nø vsà:ngí sháò dø mvrìng vdòng góng màshvla høq íá:mì nø̀ mvrìng vtv́r vsv̀ng màvl rvgaq yv́ngø vle. Ínìgø vsv̀ngrì nø kakaq màkaq kèní Yesu yv́ngsv̀ng wedøni dí mvnshì ráì.