Solomone 6 - Geeshsha Maxaafa

Yerusalaame Geela7ota

¹ Maccasa ubbaafe lo77iyare, ne laggey awu bidee? Nu neera koyana mela I bida gina nuus oda.

Geela7iw

² Ta siiqoy dorsa wude heemmanaw, lo77o ciishsha shiishanaw, shitto maatay de7iya atakiltiya giddo bis.

³ Taani ta siiquwaba; ta siiqoy tabaa; I ciishsha giddon wude heemmees.

Panthaa

⁴ Ta siiqe, ne Tirsa katameeda lo77aasa; Yerusalaameda daro lo77aasa. Bandira oykidi salpiya, olanchoda yashshaasa.

⁵ Enti tana un7ethida gisho, hayyana ne ayfiya taape dentha. Ne binaanay Galada zumaape wodhiya, deesha wude daanees.

⁶ Ne achay meecetidi keyiya, ubbay mente yeliya, enta giddon awucayey bayna dorsa wude mela.

⁷ Ne nam7u shakalay guulunthaa giddora xeelliya wode, nam7u kessidi phalqida oromaane daanosona.

⁸ Usupun tammu macca kawoti, hospun tammu laggethoti, tayboy bayna geela7oti de7oosona.

⁹ Shin borey bayna ta holliya taw dumma; iya ba aayes issinno. Iyo yelida aayiya ubbaafe aathada iyo dosawusu; Geela7oti iyo be7idi, “Hanna anjetidaaro” yaagosona; macca kawotinne laggethoti iyo sabboosona.

Yerusalaame Geela7ota

¹⁰ Hanna wonta xalqeda doliyara, ageenada poo7iyara, xalqeda caddiyara, bandira oykidi salpe keyida, olanchoda yashshiyara hanna oonee?

Panthaa

¹¹ Taani zangaaran toketida mithata be7anaw, woyney aacidako oromaaney ayfidaako xeellanaw, duge ocholone gade wodhas.

¹² Ta qoponna de7ishin ta amoy tana efidi, kawa asaa para gaareta giddon tana utisis.

Yerusalaame Geela7ota

¹³ Neno Sulaamape yidaare, haaya; haa simma; Nu nena loythidi xeellana mela haa simma. Daro asaa sinthan yexiya asada, tana ayis xeelleetii?