Mazmure 78 - Geeshsha Maxaafa

Kaalliya Yeletethaas Oda

Asaafi Akeekan Xaafida Ginxo

¹ Ta asaw, ta timirtiya si7ite; ta doonape keyiya qaala hayzidi si7ite.

² Taani ta doona leemison dooyana; benipe geemmida xuura qoncisana.

³ Nuuni si7idaysanne eridaysa, nu aawati nuus odidaysata odana.

⁴ Hessata nuuni enta naytape qosoko; Godaas bessiya galataa, iya wolqaanne malaalsiya iya oosuwa, yaana yeletas odana.

⁵ I Yayqooba zerethaas kiitaa, Isra7eele asaas higgiya immis. Kase nu aawati banta nayta he higgiya tamaarsana mela kiittis.

⁶ Kaalliya yeletay hessa erana mela, enta naytika banta naytas buroo yeletana naytas erisanaasa.

⁷ He wode enti Xoossan ammanetena; I oothidaba balokona; iya kiitaa naagana.

⁸ Enti kase banta aawatada wozana muume yeleta, geellanne ammanetona yeleta, Xoossan minnidi eqenna yeleta gidokona.

⁹ Efreema asay donge dancikoka, ola gallas guye simmidosona.

¹⁰ Enti Xoossaa caaquwa naagibookona; iya higgiyan hemetonna ixidosona.

¹¹ Enti I oothida oosuwanne I bessida malaata dogidosona.

¹² I enta aawata sinthan Gibxe biittan, Xo7aane Denban malaata oothis.

¹³ Abbaa shaakidi giddora enta pinthis; haatha shaakidi yan han godada essis.

¹⁴ I enta gallas shaaran, qamma tama poo7on kaalethis.

¹⁵ I mela biittan zaalla phalqidi, abbada daro haathi enta ushshis.

¹⁶ Zaallafe haathe pultisidi, shaafa haathada gogisis.

¹⁷ Shin enti iya bolla nagara gujidi oothidosona; Ubbaafe Dhoqa Xoossaa bolla mela biittan makallidosona.

¹⁸ Banta amotida kathaa oychidi, Xoossaa erishe paacidosona.

¹⁹ Enti Xoossaa bolla haysada yaagidi haasayidosona; “Mela biittan Xoossay nuus kathi giigisanaw danda7ii?

²⁰ Zaalla shocin pultoy keyidi shaafa haathi goggis; shin I nuus kathi immanaw danda7ii? Woyko ba asaas asho immanaw danda7ii?” yaagidosona.

²¹ Goday hessa si7ida wode daro hanqetis; Yayqooba kochata bolla tami eexis; Isra7eele bolla iya hanqoy daris.

²² Hessika enti Xoossan ammanibookona; woyko iya ashuwan ammanetibokona.

²³ Gidoshin, dhoqa saluwa kiittis; salo pengiya dooyis.

²⁴ Enta muzanaw manna bukisis; salo kathaa entaw immis.

²⁵ Kiitanchota kathi asay mis; Xoossay entaw miyaba darsidi immis.

²⁶ Doloha carkoy carkana mela oothis; ba wolqan dugeha carkuwa denthis.

²⁷ I asaas asho biitta kessis; paalliya kafota abba gaxa shafeda bukisis.

²⁸ Enti de7iya bessan, dunkaaniya yuushon wodhisis.

²⁹ Enti amotidaysa entaw immis; midi banta ganjiya gathidosona.

³⁰ Shin enti banta amuwa aathona de7ishin, ashoy enta doonan buroo de7ishin,

³¹ Xoossaa hanqoy enta bolla wodhis; enta giddofe wolqaama asata wodhis; Isra7eelepe na7atethata dhukis.

³² He ubbay haninka nagara ooso aggibokona; daro malaata oothinka ammanibookona.

³³ Hessa gisho, I enta gallasata hada oothis; enta laythata dagaman ongis.

³⁴ Xoossay entafe baggaa wodhiya wode iya koydosona, banta nagaraa paaxidi iyako simmidosona.

³⁵ Xoossay enta zaalla gideysa, Ubbaafe Dhoqa Xoossay enta wozeysa, gideysa hassayidosona.

³⁶ Shin enti banta inxarsan wordotidosona; banta doonan cimmidosona.

³⁷ Enta wozanay Xoossan minnidi eqenna; iya caaquwas ammanetokona.

³⁸ Shin I enta maaris enta nagaraa atto gis; enta dhaysibeenna. Daro wode ba hanquwa teqis; ba gaduwa kumethi enta bolla yeddibeenna.

³⁹ Enti hayqiya asho gideysanne keyidi simmonna shempo gideysa akeekis.

⁴⁰ Enti mela biittan iya bolla aapun toho makallidona! Mela biittan iya aapun toho lancisidonaa!

⁴¹ Enti zaari zaaridi Xoossaa paacidosona; Isra7eele Geeshshaa yiloyidosona.

⁴² Entana morketa kushepe ashshida gallasaa, un7ethiya asaape wozida wolqaa dogidosona.

⁴³ I Gibxen oothida malaata, Xo7aane Denban oothida malaalsiya oosuwa hassaybookona.

⁴⁴ Enta shaafa haathata suuthu laammis; hessa gisho, Gibxe asay shaafatape uyanaw danda7ibookona.

⁴⁵ Enta waaysiya udunxetanne enta biitta dhaysiya shodheta kiittis.

⁴⁶ Dolida kathaa duggos, enti daaburida ayfiya booles immis.

⁴⁷ Enta woyniya shachan, enta balasiya carkon dhaysis.

⁴⁸ Enta meheta shachan wodhis; enta dorsata dadan wursis.

⁴⁹ Dhaysiya kiitancho cugara, ba suulliya hanquwa, yiluwa, ixuwanne gaduwa enta bolla yeddis.

⁵⁰ Ba hanquwas oge giigisis; enta dhayos aathidi immis; enta hayqope ashshibeenna.

⁵¹ Gibxe bayra nayta ubbaa shocis; Kaama dunkaanen koyro nayta wodhis;

⁵² Shin ba asaa dorsada kessis; wudeda mela biittan heemmis.

⁵³ I enta saro kaalethida gisho babibookona; shin enta morketa abbay mittis.

⁵⁴ I enta ba geeshsha biitta, ba ushacha kushen xoonidi oykida zuma bolla ehis.

⁵⁵ I enta sinthafe kawotethata gooddis; enta biitta Isra7eele kochatas laata oothidi shaakis; ba asaas enta keethaa immis.

⁵⁶ Gidoshin, Ubbaafe Dhoqa Xoossaa bolla makallidosona; iya paacidosona; iya higgiya kiitetibookona.

⁵⁷ Enti banta aawatada geellatanne minnidi eqonna asi gididosona; wobe toorada wora wodhidosona.

⁵⁸ Dhoqa goyinno bessatan iya yiloyidosona; banta eeqatara iya qanaatisidosona.

⁵⁹ Xoossay hessa si7ida wode shenetis; Isra7eele ubbaa kadhis.

⁶⁰ Seelon I de7iya ba bessaa, asaa giddon I de7iya ba dunkaaniya aggis.

⁶¹ Xoossa wolqaasinne bonchuwas malaata gidida Taabotiya morketa kushen aathidi immis.

⁶² I ba asaa bolla shenetis; enta mashshas aathidi immis.

⁶³ Na7atethati ubbay taman meetetidosona; geela7oti azina gelonna attidosona.

⁶⁴ Enta kahineti mashshan wuridosona; enta macheti yeekonna mela digetidosona.

⁶⁵ Goday dhiskofe barkiya asada dendis; woyne ushsha mathoy aadhida asada hanis.

⁶⁶ I ba morketa guye zaaridi shocis; enta merinaw yeellayis.

⁶⁷ Yoosefa dunkaaniya kadhis; Efreema kochaa dooribeenna.

⁶⁸ Shin Yihuda kochaanne I dosiya Xiyoone deriya dooris.

⁶⁹ Ba keethaa saloda dhoqu oothidi keexis; sa7ada merinaw essis.

⁷⁰ Ba aylliya Dawita dooridi, dorse heemmiya bessaafe ekis.

⁷¹ Dorse heemmiya bessafe denthidi, ba asaa Yayqooba, ba laata Isra7eele henthanaw ehis.

⁷² Dawiti enta suure wozanan heemmis; ba cincatethan kaalethis.