Mazmure 41 - Geeshsha Maxaafa

Hargetiyanne Bizza Asa Woosa

Zammaareta Halaqaas Xaafetida Dawita Mazmure.

¹ Manquwas qopiya asi anjetidaysa; meto gallas Goday iya ashshees.

² Goday iya naagees, de7on wothees; biitta bolla Goday iya anjees; Goday iya, iya morketa amuwas aathidi immenna.

³ I saketidi hiithan de7ishin Goday maaddees; hargiyafe iya pathees.

⁴ Taani, “Godaw, ta nena naaqida gisho, tana maara; ta hargiyafe tana patha” yaagas.

⁵ Ta morketi iitabaa ta bolla haasayidi, “I awude hayqandee? iya sunthay awude dogetandee?” yaagosona.

⁶ Tana be7anaw yaa oonika wordo odees; ba wozanan tana zigiriyabaa shiishees; kare keyidi ta sunthaa iissees.

⁷ Tana ixiya ubbay issife tana zigiroosona; iitabay iya gakees gidi qopoosona.

⁸ “Iya iita hargey oykis; I hiza hiixape dendenna” yaagosona.

⁹ Hari attoshin ta ammanetiya laggey, taara midaysi taw zoko zaaris.

¹⁰ Shin Godaw tana maara; ta entaw kushe zaarana mela, harge hiixape tana dentha.

¹¹ Ta morkey tana xoononna gisho, ne tanan ufaytanaysa ta erayis.

¹² Ne tana ta suuretetha gisho katisaasa; ne sinthan tana merinaw wothaasa.

¹³ Goday, Isra7eele Xoossay, merinaape merinaa gakanaw galatetto. Amin7i! Amin7i!