Mazmure 30 - Geeshsha Maxaafa

Qohope Attida Asa Galata

Keethe Anjisos Dawiti Yexida Mazmure.

¹ Abeeti Godaw, ne tana ollafe kessida gishonne ta morketi ufaytonna mela oothida gisho, ta nena dhoqu dhoqu oothana.

² Abeeti Godaw, ta Xoossaw tana maaddana mela, ta nena xeegin ne tana pathadasa.

³ Abeeti Godaw, duufo gelonnaada tana naagadasa; ollan wodhonnaada tana paxa ashshadasa.

⁴ Hinteno Xoossaa asaw, Godaas yexite; iya geeshsha sunthaa sabbite.

⁵ Iya hanqoy guutha wodesa, shin iya keehatethay de7o laytha ubbaasa. Qamma yeekishe aqiko, wonta zawi bayna ufaysi gidees.

⁶ Ta naagetada de7eysa erida wode “Hiza ta qaaxike” yaagas.

⁷ Abeeti Godaw, ne taw keehida wode, zumada tana minthada essadasa. Shin ne som7uwa hara soo zaarida wode, ta dagammas.

⁸ Abeeti Godaw, ta nena xeegas; nena maarota woossas;

⁹ “Ta duufo geliko nena ay go77ii? Biitta giddo gelida asi waatidi nena galatanaw danda7ii? Ne ammanetetha waatidi markatanee?

¹⁰ Abeeti Godaw, ne tana si7a; taw qadheta. Abeeti Godaw, ne taw maado gida” yaagas.

¹¹ Ta yeehuwa yethan laammadasa; kayo ma7uwa taape qaarada, tana ufaysi mayzadasa.

¹² Hessa gisho, ta nena sabbana; si77i giike. Abeeti Godaw, ta Xoossaw, ta nena merinaw galatana.